3
¿Alcyetzun at-xix cye xjal judiy aju mintiꞌ cye txkantl xjal?
¿ex ti in ajben aju sircunsisyón?
2 Tuj tcyakil nimxix tajben jlu.
Porque tnejelxix tzaj tkꞌoꞌn Dios tyol cye xjal judiy.
3 Katzun ka at junjun cyxol mintiꞌ xi cyocslaꞌn,
¿baka nok tuꞌnju mintiꞌ xi cyocslaꞌn,
mintiꞌwt ma japun tuꞌn Dios aju tyol?
4 Ax toc ma japun.
Porque axix toc te Dios tyol,
masque cycyakil xjal in che nicꞌan yol,
ic tzaꞌn in tmaꞌn tuj Tuꞌjil:
Cꞌelel nicꞌbaj tiꞌja ka tzꞌaklxix tyola,
ex cbel cyiꞌj xjal tuꞌna oc toca tuj xjel cyuꞌn,
chi tuj Tuꞌjil.
5 Katzun tuꞌnju mya baꞌn in kbinchaꞌn mas in kꞌanchaꞌlin ka tzꞌaklxix te Dios,
¿ti oc kmaꞌ tiꞌj jlu?
(In chin yoline ic tzaꞌn in che yolin xjal.)
¿Myapelo tzꞌaklxix te Dios tuꞌnju in tkꞌoꞌn castiw?
6 Ax toc tzꞌaklxix.
Porque nokwit mya tzꞌaklxix te Dios,
¿tzaꞌntzun tten tuꞌn tcub cycastiw xjal tuꞌn?
7 At xjal in cymaꞌn cyjaꞌ:
Ka tuꞌnju in chin nicꞌane yol mas in kꞌanchaꞌlin ka axix toc tyol Dios te nimbil te,
¿tikuꞌntzun in kꞌmanjtz wiꞌje ka aj il kine ex tuꞌn woque tuj xjel?
Chi xjal.
8 Ka ic tten ic tzaꞌn in cymaꞌne,
kbinchamtzun mya baꞌn tuꞌn tul aju baꞌn.
At junjun in che siꞌmin yol wiꞌje ka ic in xi nmaꞌne;
pero tuj tumelxix tuꞌn tcub cysentens ke jlu.
Mi jun xjal tzꞌaklxix; kcyakil at kil
9 ¿Tzaꞌntzun tten jlu?
Akoꞌ judiy xjal,
¿maspelo baꞌn koꞌ cywitz xjal mya judiy ke?
Miꞌn.
Porque o txi kmaꞌne cye xjal judiy ex cye xjal mya judiy ke,
cycyakil ateꞌ tjakꞌ tipumal il.
10 Ic tzaꞌn in tmaꞌn tuj Tuꞌjil:
Mi aꞌl jun xjal tzꞌaklxix,
misicyer jun;
11 mi jun nneꞌl tnicꞌ tiꞌj,
mi jun in jyon tiꞌj Dios.
12 Cycyakil e jeꞌl txalpuj,
cycyakil e oc mintiꞌ cyajben.
Mi jun in binchan baꞌn,
misicyer jun.
13 Aju cykul mer ic tzaꞌn tjulil cyimni catl.
In che sbun tuꞌn cyakꞌ.
Ttxꞌabl lobaj at tuj cytziꞌ.
14 Nim in che yasun tuꞌn cytziꞌ ex nim tcꞌayil yol nneꞌtz tuj cytziꞌ.
15 In che kelan tuꞌn tcub jun xjal cyuꞌn.
16 In che bet in che xitun ex in che yajlanjtz xjal cyuꞌn;
17 ex mintiꞌ chꞌin cymojbabl cyib cyucꞌil mastl.
18 Mintiꞌ tchi Dios tuj cywitz,
chi tuj Tuꞌjil.
19 Baꞌn kuꞌn,
tcyakilju in tmaꞌn tuj ojtxi ley,
in tmaꞌn cye keju ateꞌ tjakꞌ ley,
tuꞌn tmaket cytziꞌ cycyakil xjal,
ex tuꞌn cyoc cycyakil xjal tuj xjel tuꞌn Dios tiꞌj cybinchben mya baꞌn;
20 porque mi jun xjal jacu tzꞌoc tkꞌoꞌn Dios te tzꞌaklxix tuꞌnju in tbinchaꞌn tcyakilju in tmaꞌn ley,
porque aju ley,
atzun tajben tuꞌn tel knicꞌ tiꞌj ka aj il koꞌ.
Ma ko oc te tzꞌaklxix nok tuꞌn kocslabl
21 Atzun jaꞌlo ma tzaj yecꞌun jun tumel tzaꞌn tten tuꞌn koc te tzꞌaklxix tuꞌn Dios,
mya tuꞌn ley tuꞌn koc te tzꞌaklxix,
nok oꞌcx in tzaj tyecꞌun ley alcye tumel tuꞌn koc te tzꞌaklxix,
ax icx in cymaꞌn t-sanjel Dios.
22 Nok tuꞌn kocslabl tiꞌj Jesucrist ko oquel te tzꞌaklxix twitz Dios.
Ma tzaj tkꞌoꞌn Dios jlu cye cycyakil keju ma che ocslan tiꞌj Jesús.
Porque jun elni koꞌ kcyakil.
23 Porque kcyakil o ko binchan il,
ex mintiꞌ in ko canun tuꞌn koc tzꞌaklxix ic tzaꞌn te Dios tzꞌaklxixte.
24 Pero nok cucx ko oquel te tzꞌaklxix nok tuꞌn t-xtalbil Dios,
tuꞌnju ma ko colpet tuꞌn Jesucrist.
25 Ma tzaj kꞌoꞌn Crist tuꞌn Dios tuꞌn tchjet kil tuꞌn tchcꞌel nok tuꞌn kocslabl tiꞌj,
tuꞌntzun tyecꞌunjtz ka tzꞌaklxix te Dios,
ex tuꞌnju tpasens at,
mintiꞌ cub tkꞌoꞌn cycastiw xjal tuꞌn tlaj cyil o cybincha ojtxi.
26 Tuꞌntzun tchicꞌbanjtz tuj tkꞌijlalil jaꞌlo ka tzꞌaklxix te Dios ex tuꞌn in che oc tkꞌoꞌn xjal te tzꞌaklxix nok tuꞌn cyocslabl tiꞌj Jesús.
27 ¿Tzaꞌntzun tten tuꞌn tjaw kniman kib?
Mintiꞌ tumel tuꞌn tjaw kniman kib.
¿Tikuꞌntzun tuꞌn miꞌn tjaw kniman kib?
¿Tuꞌnpeju ma txi kniman ju ley?
Miꞌn.
Nok oꞌcx tuꞌnju ma ko ocslan tiꞌj Jesús.
28 Cyjaꞌtzun ma tzꞌel knicꞌ tiꞌj,
ate xjal nnoꞌc te tzꞌaklxix tuꞌn Dios nok tuꞌn tocslabl,
ex mya tuꞌnju in tbinchaꞌn aju in tmaꞌn ley.
29 ¿Ate Dios oꞌcxpe Dios cye xjal judiy?
¿Myapetzun ax Dios cye xjal mya judiy ke?
Ax toc ax icx Cydios xjal mya judiy ke,
30 porque nok oꞌcx jun Dios at.
Ke xjal sircunsidarimaj che oquel kꞌoꞌn te tzꞌaklxix tuꞌn Dios nok tuꞌn cyocslabl,
ax icx keju mya sircunsidarimaj ax icx che oquel kꞌoꞌn te tzꞌaklxix tuꞌn Dios nok tuꞌn cyocslabl.
31 ¿Tuꞌnpetzunju kocslabl cꞌelel kiꞌn tipun ley?
Miꞌn.
Tuj juntl tumel,
mas cꞌoquel tipun ley kuꞌn.