In pacban apostl Pablo tiꞌj Crist aju jaw kꞌoꞌn twitz crus
2
Cyjaꞌtzun erman,
tej npone cyucꞌile tuꞌn t-xi nmaꞌne cyeye aju yol axix toc tzaj tchicꞌbaꞌn Dios,
mya nmak yol xi nmaꞌne cyeye ex mya nmak nabl.
2 Porque tej ntene cyxole,
cub nximane tuꞌn miꞌn nyoline tiꞌj juntl,
nok oꞌcx tiꞌj Jesucrist aju jaw kꞌoꞌn twitz crus.
3 Tej ntene cyxole mintiꞌ wipune,
ex nim in chin xobe,
ex in chin luꞌlune.
4 Aju nyole ex aju pacbabl xi nmaꞌne cyeye,
mya jun yol te xmoxbil ex mya ic tzaꞌn cynabl xjal,
nok oꞌcx cub tiꞌj cynable tuꞌn tipumal Xewbaj Xjan,
5 tuꞌn miꞌn toc ten cyocslable tiꞌj cynabl xjal,
nok oꞌcx tiꞌj tipumal Dios.
Tuꞌn Xewbaj Xjan nneꞌl knicꞌ tiꞌj Dios
6 Pero at jun nabl in ko yoline tiꞌj cyxol keju ma tzꞌoc cycꞌuꞌj tuj cyocslabl,
pero mya aju nabl at cyxol xjal te twitz txꞌotxꞌ ex mya cynabl ke nejenel ateꞌ cyxol xjal chꞌix cynaj.
7 Atzun in ko yoline tiꞌj tnabl Dios aju mintiꞌ biꞌn cyuꞌn xjal,
aju nabl ewantok nej,
aju bant tiꞌj tuꞌn Dios atxix t-xe tnejel naꞌnxtok tbant twitz txꞌotxꞌ,
tuꞌn kcꞌmonte jun koclen maꞌxix ex te jumajx.
8 Mi aꞌl jun cye nejenel ateꞌ tuj tkꞌijlalil jaꞌlo ma tzꞌel tnicꞌ tiꞌj jlu;
porque nokwit el cynicꞌ tiꞌj,
miwtlo jaw cykꞌoꞌn Kajaw twitz crus,
aju maꞌxix toclen.
9 Pero ic tzaꞌn in tmaꞌn tuj Tuꞌjil:
Aju bajx til xjal ex bajx tbi ex bajx canun tuj tanmi,
atzunju ma tbincha Dios cye keju in che cꞌujlan te.
Chi tuj Tuꞌjil.
10 Ma tzaj tyecꞌun Dios jlu ke tuꞌn Xewbaj Xjan;
porque ate Xewbaj Xjan tcyakil in baj tqueꞌyin,
ax icx ju t-ximbetz Dios,
aju mlay tzꞌel knicꞌ tiꞌj.
11 Porque mlay tzꞌel tnicꞌ jun xjal tiꞌj t-ximbetz juntl xjal.
Axte xjal nneꞌl tnicꞌ tiꞌjx t-ximbetz.
Icxtzun te Dios,
mi aꞌl jun xjal ma tzꞌel tnicꞌ tiꞌj t-ximbetz,
nok oꞌcx aju T-xew Dios nneꞌl tnicꞌ tiꞌj.
12 Atzun ke,
mintiꞌ ma kcꞌam knabl ic tzaꞌn cynabl xjal,
nok oꞌcx ma kcꞌam T-xew Dios,
tuꞌntzun tel knicꞌ tiꞌj t-xtalbil Dios ma tzaj tkꞌoꞌn ke.
13 In ko yoline tiꞌj jlu,
pero mintiꞌ ma ko xnakꞌtzanjtze tiꞌj tuꞌn cynabl xjal,
nok oꞌcx ma ko xnakꞌtzanjtze tiꞌj tuꞌn Xewbaj Xjan,
cyjaꞌtzun in xi kchicꞌbaꞌne aju in tmaꞌn T-xew Dios cye keju ma cycꞌam T-xew Dios.
14 Aju xjal mintiꞌ T-xew Dios tuj tanmi mintiꞌ in tcꞌmoꞌn aju in tzaj tkꞌoꞌn T-xew Dios,
porque mintiꞌ ttxolil yol nneꞌla tuj twitz;
ex mlay tzꞌel tnicꞌ tiꞌj,
porque nok oꞌcx tuꞌn T-xew Dios jacu tzꞌel nicꞌbaj tiꞌj.
15 Atzunju xjal at T-xew Dios tuj tanmi nnoꞌc tkꞌoꞌn tcyakil tuj malbil,
tuꞌn tel tnicꞌ tiꞌj alcye baꞌn ex alcye mya baꞌn;
atzun te mlay tzꞌoc tuj malbil tuꞌn juntl.
16 Porque in tmaꞌn tuj Tuꞌjil:
¿Atpe jun xjal o tzꞌel tnicꞌ tiꞌj tnabl Kman?
¿Atpe jun xjal o kꞌonte xnakꞌtzbil te?
Chi tuj Tuꞌjil.
Atzun ke ma kcꞌam tnabl Crist.