Junx in ko akꞌnane in ko ajbene te Dios
3
Cyjaꞌtzun erman,
mintiꞌ in chin yoline cyucꞌile ic tzaꞌn in chin yoline cyucꞌil ocslal in cybinchaꞌn tajbil T-xew Dios;
nok oꞌcx in chin yoline cyucꞌile ic tzaꞌn naꞌnx t-xi cynimane T-xew Dios;
ic tzaꞌn tal cꞌwaꞌlx keye tuj cyocslable tiꞌj Crist.
2 Aju xnakꞌtzbil xi nkꞌoꞌne cyeye nok chꞌin tnabl;
ic cytene ic tzaꞌn jun tal cꞌwaꞌl nok taꞌl imj in xiꞌ tuꞌn ex mya wabj,
porque naꞌnxtok tbant cywane.
Ax icx jaꞌlo naꞌnx t-xi wabj cyuꞌne,
3 porque cucx t-xi cynimane aju cyexe cyajbile,
cucx ttzaj tloꞌch cycꞌuꞌje cyiꞌj mastl,
cucx cykꞌojine ex atx pabl tib cyxole.
¿Myapetzun ax cyajbile in xi cynimane,
ex in che ankꞌine ic tzaꞌn ke xjal mya ocslal ke?
4 Porque oc in tmaꞌn jun:
Te Pablo kine,
ex oc in tmaꞌn juntl:
Te Apolos kine,
¿myapetzun ax cyajbile in cybinchaꞌne icju ic tzaꞌn cye xjal in cybinchaꞌn?
5 ¿Titzun woclene?
¿Ex titzun toclen Apolos?
Ajbel koꞌye te Dios,
nok tuꞌn kyole ma che ocslane tiꞌj Kajaw ic tzaꞌnx ju koclene tzaj tkꞌoꞌn Dios.
6 Wuꞌne cuꞌx wawaꞌne iyaj,
atzunte Apolos oc ten aꞌlilte,
ex atzunte Dios chꞌisal te.
7 Cyjaꞌtzun,
aju awalte mintiꞌ toclen,
tucꞌix ju aꞌlilte mintiꞌ toclen;
nok oꞌcx Dios at toclen;
porque atzun chꞌisal te.
8 Aju awalte tucꞌix ju aꞌlilte junx taꞌ cyoclen;
ex teyle junjun oc tcꞌmaꞌ chojbil te tiꞌj ju takꞌunben.
9 Porque junx in ko akꞌnane,
in ko ajbene te Dios;
atzun cyeye tawal Dios keye.
Ax icx jun ja keye binchaꞌn keye tuꞌn Dios.
10 Aju t-xtalbil Dios tzaj tkꞌoꞌn weye tuꞌn tcub nkꞌoꞌne simyent ic tzaꞌn jun binchal ja nim tnabl,
ex juntl in jaw binchante ju ja tibaj simyent;
teyle junjun tuꞌn toc tkꞌoꞌn tcwent tiꞌj tzaꞌn tten tuꞌn tjaw tbinchaꞌn.
11 Porque mi aꞌl jun xjal jacu bant tuꞌn tuꞌn tcub tkꞌoꞌn juntl simyent,
nok oꞌcx aju simyent ma cub nkꞌoꞌne,
atzun Jesucrist.
12 Ka at jun xjal ma jaw tbinchaꞌn kꞌan pwak tibaj ju simyent lu,
ex ka sak pwak,
ex ka tal abj in che koptzꞌaj,
ex ka tzeꞌ,
ex ka chꞌim,
ex ka tkan cjoꞌn,
13 ckꞌanchaꞌlil takꞌunben teyle junjun,
porque cꞌelel tuj kꞌanchaꞌl tuj tkꞌijlalil jwisi,
porque tuꞌn kꞌakꞌ c-yecꞌetel nok alcyex takꞌunben junjun.
14 Ka at jun xjal ma cyaj ten takꞌunben aju jaw tbinchaꞌn tibaj simyent,
oc tcꞌmaꞌ chojbil te.
15 Ka at jun xjal ma cub tzꞌeꞌy takꞌunben,
biꞌxtzun cnajel takꞌunben,
pero ate xjal ccletel,
ic tzaꞌn tuj kꞌakꞌ otok tzꞌetz.
16 ¿Mintiꞌpetzun biꞌn cyuꞌne ka tja Dios keye ex najl T-xew Dios tuj cyanmiye?
17 Ka at jun xjal ma cub xitunte tja Dios,
ax Dios cbel xitunte xjal,
porque aju tja Dios xjante,
ex akeye tja Dios.
18 Cuchiwt mi jun tuꞌn t-sbun tib.
Ka at jun cyxole in ximan tiꞌj ka at tnabl ic tzaꞌn cye xjal tuj tkꞌijlalil jaꞌlo,
kꞌoꞌnc tib ic tzaꞌn mintiꞌ chꞌin baꞌn tuꞌn,
tuꞌntzun toc te aj nablxix.
19 Porque aju cynabl xjal mintiꞌ ttxolil nneꞌl tuj twitz Dios;
porque in tmaꞌn tuj Tuꞌjil:
In che tzyet ke aj nabl tuꞌn Dios masque jawni cywitz.
20 Ex juntl maj in tmaꞌn:
Baꞌn tuꞌn Kman,
mintiꞌ tajben aju cyximbetz ke aj nabl,
chi tuj Tuꞌjil.
21 Cyjaꞌtzun,
mi jun tuꞌn tmante ka at jun tmajen Dios mas baꞌn twitz juntl,
porque cyeye tcyakil,
22 ka a Pablo,
ex ka a Apolos,
ex ka a Pedro,
ex ka tcyakilju at,
ex ka aju chwinklal,
ex ka ju camic,
ex ka aju at jaꞌlo,
ex ka aju tzul,
cyetzune tcyakil;
23 ex akeye te Crist keye,
atzunte Crist te Dios te.