Aju cyakꞌun apostl
4
Cyjaꞌtzun,
che ximanwt xjal kiꞌje ka ajbel koꞌye te Crist,
ex tuj kcwente ma tzaj kꞌoꞌn tuꞌn t-xi kmaꞌne tyol Dios aju ewantok nej.
2 Cyjaꞌtzun,
akeju ma tzaj kꞌoꞌn akꞌuntl tuj cycwent,
teyle junjun ilxix tiꞌj tuꞌn tjapun tajbebl tuꞌn.
3 Ka ma chin oque tuj xjel cyuꞌne ex ka cyuꞌn xjal,
mya maꞌxix t-xilen jlu tuj nwitze;
ex mya wuꞌnxe in chin oque tuj xjel.
4 Mintiꞌ naꞌn wuꞌne ka at jun mya baꞌn o nbinchaye,
pero myatzun tuꞌn jlu tuꞌn t-xi nmaꞌne ka tzꞌaklxix kine,
ate Kajaw ckꞌmalte ka at wile ex ka mintiꞌ.
5 Cyjaꞌtzun miꞌn txi cymaꞌn naje jun cyyole tiꞌj juntl,
che ayone tiꞌj Kajaw oc tul,
ate cchicꞌbalte aju ewan tuj klolj,
ex cꞌelel tuj kꞌanchaꞌl tuꞌn,
aju in che ximan xjal tiꞌj tuj cyanmi;
cyjaꞌtzun teyle junjun oc tcꞌmaꞌ nimbil te tuꞌn Dios.
6 Tcyakil jlu ma txi ntzꞌibane cyeye erman,
in chin yoline wiꞌjxe ex tiꞌj Apolos tuꞌn koque te jun yecꞌbil cyeye,
tuꞌntzun tel cycanoꞌne kiꞌje,
tuꞌntzun tjapun cyuꞌne aju tzꞌiban tuj Tuꞌjil,
tuꞌntzun miꞌn tjaw cyniman cyibe ex tuꞌn miꞌn cymanteye ka mas baꞌn jun tmajen Dios twitz juntl.
7 Porque ¿alcye ma kꞌmante ka mas baꞌn keye twitz juntl?
¿Ex atpe jun at cyucꞌile mya tuꞌn Dios tzaj kꞌoꞌn cyeye?
Katzun ma tzaj kꞌoꞌn cyeye tuꞌn Dios,
¿tikuꞌntzun in jaw cyniman cyibe ic tzaꞌn mya tuꞌn Dios tzaj kꞌoꞌn cyeye?
8 In cymaꞌne ka nojni cycꞌuꞌje wen,
ex ka ma che oque te kꞌinun,
ex ka ma che oque te rey,
atzun keye mintiꞌ koclene tuj cywitze.
Cuchiwt ax toc ma che oque te rey,
tuꞌntzun icx keye tuꞌn koque te rey junx cyucꞌile.
9 Porque tuj nnable,
akoꞌye apostl ma ko oc kꞌoꞌne tuꞌn Dios te cyqueꞌybetz xjal,
ma ko oque mas tal chꞌin cywitz cycyakil xjal,
mer ic tzaꞌn ma cub ksentense tuꞌn kcyime;
porque ma ko oque te cyqueꞌybetz cycyakil,
cywitz anjel ex cywitz xjal.
10 Ma ko oc kꞌoꞌne mintiꞌ knable tuꞌn tlaj Crist,
atzun cyeye ma che oque te aj nabl tucꞌil Crist.
Keye mintiꞌ kipune,
atzun cyeye at cyipune.
Akeye in che nimanjtze,
atzun keye icꞌun koꞌye.
11 Cucx ticꞌx weꞌyaj kuꞌne,
cucx in txket tiꞌj kcꞌuꞌje,
cucx ktene mintiꞌ kxbalune,
cucx in ko oc bjuꞌne,
ex mintiꞌ kjaye.
12 Nim in ko sicte in ko akꞌnane tuꞌn kkꞌabe.
Oc in ko oc yasoꞌne,
in ko yoline baꞌn cyiꞌj xjal.
Oc in ko yajlanjtze,
nnicꞌx kuꞌne.
13 Oc in che siꞌmin xjal yol kiꞌje,
in cheꞌx ktzakꞌweꞌne tuj mansbajil.
Ma ko oc kꞌoꞌne te mintiꞌ kajbene,
ma ko oque ic tzaꞌn tzꞌis tuj cywitz cycyakil xjal.
14 Mintiꞌ in xi ntzꞌibane jlu tuꞌn ttzaj cychꞌixwiye,
nok oꞌcx tuꞌn t-xi nkꞌoꞌne cynable,
ic tzaꞌn ncꞌwaꞌl keye cꞌujlaꞌn keye wuꞌne.
15 Porque masque at laj mil kꞌol xnakꞌtzbil cyeye tiꞌj Crist,
pero mya nim cymane at;
porque ma chin oque te cymane tuꞌnju ocslal keye tiꞌj Jesucrist tuꞌnju xi nmaꞌne tkanil colbil cyeye.
16 Cyjaꞌtzun chin cubsale cywitze tuꞌn tel cycanoꞌne wiꞌje.
17 Tuꞌntzun jlu ma txi nsamaꞌne Timotey cyucꞌile.
A Timotey ncꞌwaꞌle at-xix ncꞌuꞌje tiꞌj ex ocslalxix tiꞌj Kajaw,
ctzajel tnaꞌn cyeye tzaꞌn ntene tuj wocslable tiꞌj Crist,
ic tzaꞌn xnakꞌtzbil in xi nkꞌoꞌne tuj tcyakil lugar ex cyxol cycyakil ocslal.
18 Pero at junjun cyeye jawni cywitz,
tuj cynabl ka mlay chin pontle cyucꞌile.
19 Pero chin xel naje cyucꞌile ka tajbil Kajaw;
cꞌeleltzun nnicꞌe cyiꞌj keju jawni cywitz ka ax toc at cyipumal,
mya nok oꞌcx tuꞌnju cyyol cꞌelel nnicꞌe cyiꞌj.
20 Porque jun xjal ma canun tuj tcawbil Dios,
mya tuꞌn tyol cꞌelel knicꞌ tiꞌj,
nok oꞌcx tuꞌnju tbinchben.
21 ¿Alcye cyajbile?
¿Cyajpeye tuꞌn nxiꞌye cyucꞌile tuꞌn cybaj wasyaline,
ex ka tuꞌn tten ncꞌujlalile cyiꞌje ex mans kine?