AJU TCABIN UꞌJ XI TTZꞌIBAN APOSTL PABLO CYE AJ CORINT
Xi ttzꞌiban apostl Pablo jun uꞌj cye ocslal tuj Corint
1
Akine Pablo,
apostl kine te Jesucrist nok tuꞌn tajbil Dios,
ex tucꞌix erman Timotey at wucꞌile.
In xi ktzꞌibane cyeye akeye ocslal ateꞌye tuj tnam Corint,
etzan keye tuꞌn Dios,
cyucꞌix cycyakil ocslal ateꞌ tuj tcyakil txꞌotxꞌ Acaya.
2 Awt Kman Dios tucꞌix Kajaw Jesucrist che kꞌonte xtalbil cyeye ex tuꞌn tkeꞌxix cycꞌuꞌje.
Aju yajbil te Pablo
3 Knimsaꞌnctz tbi Dios aju Tman Kajaw Jesucrist,
atzunte Mambajju cucx in kꞌakꞌan tcꞌuꞌj kiꞌj,
ex atzunte Diosju cucx in tkꞌukbaꞌn kcꞌuꞌj.
4 In tkꞌukbaꞌn Dios kcꞌuꞌj tuj tcyakil yajbil ke,
tuꞌntzun tbant kkꞌukbante cycꞌuꞌj keju in che yajlanjtz,
ic tzaꞌn ke ma kꞌukbanjtz kcꞌuꞌj tuꞌn Dios.
5 Porque ic tzaꞌn nim in ko yajlanjtz tuꞌn tlaj ocslal koꞌ tiꞌj Crist,
ax icxtzun nim in kꞌukbanjtz kcꞌuꞌj tuꞌnx Crist.
6 Cyjaꞌtzun,
ka ma ko yajlanjtze,
at tajben jlu tuꞌn tkꞌukbanjtz cycꞌuꞌje ex tuꞌn cyclete;
ex ka ma kꞌukbanjtz kcꞌuꞌje tuꞌn Dios,
ax icx at tajben jlu tuꞌn tkꞌukbanjtz cycꞌuꞌje;
cyjaꞌtzun in kꞌukbanjtzxix cycꞌuꞌje tuꞌn ticꞌx cyuꞌne ic tzaꞌnx keye nnicꞌx kuꞌne.
7 Ma keꞌxix kcꞌuꞌje cyiꞌje;
porque biꞌn kuꞌne,
ic tzaꞌn in che yajlanjtze junx kucꞌile,
ax icxtzun ckꞌukbanjtzel cycꞌuꞌje tuꞌn Dios junx kucꞌile.
8 Erman,
kajbile tuꞌn cybinteye tiꞌj ju yajbil keye tzaj tuj Asia.
Mer ic tzaꞌn tjakꞌ jun iktz o cub betzꞌane,
mintiꞌ kipaye ex o kmaye ka tuꞌn knaje.
9 Ex o knaꞌye mer ic tzaꞌn otok cub ksentense tuꞌn kcyime.
Pero tzaj ju yajbil lu kiꞌje tuꞌn miꞌn toc keꞌ kcꞌuꞌje kiꞌjxe,
nok oꞌcx tuꞌn toc keꞌ kcꞌuꞌje tiꞌj Dios aju in che jaw ankꞌin cyimni tuꞌn.
10 O clettzune tuꞌn Dios tuj jun camic xobajilxix,
ax icx jaꞌlo in ko clete tuꞌn,
ex kꞌukl kcꞌuꞌje tiꞌj Dios cucx ko cletele tuꞌn.
11 Ax icx cyeye che onine kiꞌje tuj naꞌj Dios;
porque ka at nimcu erman in che naꞌn Dios kiꞌje,
ax icx nimcu erman cxel cykꞌoꞌn chjonte te Dios tuꞌnju t-xtalbil Dios in tzaj tkꞌoꞌn keye,
tuꞌnju cucx in che naꞌne Dios kiꞌje.
Tikuꞌn yaj xiꞌ Pablo tuj Corint
12 Atzun jlu in ko tzalaje tiꞌj:
Ax kanmiye in kꞌmante tzaꞌn ktene,
ma ko tene cyxol xjal ax icx cyxole yalnix tiꞌj knable ex junx kyole,
tuꞌn Dios in tzaj tkꞌoꞌn jlu,
ma ko tene cyxole mintiꞌ xko oc lpeꞌye tiꞌj cynabl xjal,
nok oꞌcx keꞌ kcꞌuꞌje tiꞌj t-xtalbil Dios.
13 Porque mintiꞌ in xi ntzꞌibane juntl yol cyeye,
nok oꞌcx in xi ntzꞌibane aju in jaw cyschꞌiꞌne ex nneꞌl cynicꞌe tiꞌj;
ex kꞌukl ncꞌuꞌje tiꞌj,
cꞌelel baj cynicꞌe tiꞌj tcyakil.
14 Ic tzaꞌn ma tzꞌel chꞌin cynicꞌe tiꞌj tuꞌn cytzalaje kiꞌje,
ax icx keye tuꞌn ktzalaje cyiꞌje tuj tkꞌijlalil oc tul Kajaw Jesús.
15 Atzun jlu kꞌukl ncꞌuꞌje tiꞌj;
cyjaꞌtzun cub nximane nej tuꞌn nxiꞌye cyucꞌile tuꞌntzun cytzalaje oc ntene cab maj cyucꞌile.
16 Cub nximane tuꞌn wicꞌe cyucꞌile oc nxiꞌye tuj Macedonia,
octzun wajtze tuj Macedonia tuꞌn wul meltzꞌaje juntl maj cyucꞌile,
ex tuꞌn ttzaj cykꞌoꞌne chꞌin onbil weye tuꞌn tajben tuj nbeye oc nxiꞌye tuj txꞌotxꞌ Judey.
17 Aju nximbetze lu,
¿nokpelo elacyim cub nximane?
¿Apetzun cub nximane tuꞌn t-xi nmaꞌne tuꞌn nxiꞌye,
ex ya miꞌn chinxtle,
ic tzaꞌn in cybinchaꞌn xjal?
18 Pero ate Dios ax toc testiw wiꞌje,
aju kyole in xi kmaꞌne cyeye mintiꞌ in meltzꞌajeꞌ.
19 Porque akine tucꞌix Sílvano ex Timotey xi kpacbaꞌne tkanil tiꞌj Jesucrist cyxole,
aju Tcꞌwaꞌl Dios;
ate Jesucrist mintiꞌ meltzꞌajeꞌ tyol;
junx tyol ex axix toc.
20 Porque tcyakilju tzaj ttziyan Dios ax toc ex in japun nok tuꞌn Crist;
cyjaꞌtzun nok tuꞌn Jesucrist in xi kkꞌoꞌne chjonte te Dios ex in kmaꞌne:
Icxwitju.
21 Axte Dios in cyuwsante ke tuꞌnju ocslal koꞌ tiꞌj Crist,
ex ax ma tzaj kꞌonte koclen.
22 Ex ax Dios ma tzꞌoc kꞌonte sey kiꞌj,
ex ma tzaj tkꞌoꞌn ju Xewbaj Xjan tuj kanmi,
atzun jun señ jlu tuꞌn ttzaj tkꞌoꞌn mastl ke.
23 Ax Dios ma tzꞌoc nkꞌoꞌne te testiw wiꞌje,
naꞌnx nxiꞌye juntl maj tuj Corint tuꞌn miꞌn ttzaj cybise wuꞌne.
Lu Dios in queꞌyin ka mya ax toc nyole.
24 Myatzun kajbile tuꞌn koc tene cawil cyeye tiꞌj cyocslable,
porque waꞌl keye tuj cyocslable;
nok oꞌcx kajbile tuꞌn konine cyucꞌile tuꞌn tten cytzalajbile.