AJU UꞌJ XI TTZꞌIBAN APOSTL PABLO CYE AJ GALASIA
Xi ttzꞌiban Pablo jun uꞌj cye ocslal tuj junjun tnam tuj Galasia
1
Akine Pablo apostl kine,
mya cyuꞌn xjal ma chin oque te apostl,
nok oꞌcx tuꞌn Jesucrist ex tuꞌn Kman Dios aju jatz ankꞌin Jesucrist tuꞌn cyxol cyimni.
2 In xi ntzꞌibane cyeye akeye ocslal tuj junjun tnam tuj txꞌotxꞌ Galasia,
ex in cheꞌx kꞌolbeꞌne cyuꞌn cycyakil erman ateꞌ wucꞌile.
3 Awt Kman Dios tucꞌix Kajaw Jesucrist che kꞌonte xtalbil cyeye ex tuꞌn tkeꞌxix cycꞌuꞌje.
4 Ate Jesucrist xi tkꞌon tib tuꞌn tcyim tuꞌn tchjet kil ex tuꞌn kclet tuꞌn tuj tkꞌijlalil jaꞌlo mya baꞌn,
ic tzaꞌnx tajbil Kman Dios.
5 Nimanxwit tbi Dios tuj tcyakil tabkꞌiyil te jumajx.
Icxwitju.
Mintiꞌ juntl tkanil colbil
6 Ma jaw naj nnable tuꞌnju ma tzꞌel cypaꞌn naj cyibe tiꞌj Dios aju txcon cyeye nok tuꞌn t-xtalbil Crist,
ex ma che oc lpeꞌye tiꞌj tkanil juntl colbil junxitl tten.
7 Mintiꞌ juntl tkanil colbil,
pero at junjun xjal nneꞌl tzpet cynable cyuꞌn,
ex cyajbil tuꞌn tchꞌexpet aju tkanil colbil in tzaj tkꞌoꞌn Crist.
8 Pero ka at jun xjal ma txi tpacbaꞌn junxitl tkanil colbil cyeye mya ic tten ic tzaꞌn tkanil colbil xi kmaꞌne cyeye,
baꞌn tuꞌn tcub t-sentens tuꞌn tnaj,
ka akine ex ka jun anjel in tzaj tuj cyaꞌj.
9 Ic tzaꞌn xi nmaꞌne cyeye nej,
icxtzun cxel nmaꞌne juntl maj cyeye jaꞌlo:
Ka at jun xjal in pacban tiꞌj tkanil jun colbil junxitl tten ex mya ic tten ic tzaꞌn tkanil colbil ma cybiye,
baꞌn tuꞌn tcub t-sentens xjal lu tuꞌn tnaj.
10 ¿Alcye nnoꞌc tilil wuꞌne?
¿Apeloju tuꞌn cyyolin xjal baꞌn wiꞌje,
ex ka aju tuꞌn tyolin Dios baꞌn wiꞌje?
¿Apetzunlo nnoꞌc tilil wuꞌne tuꞌn cytzalaj xjal wiꞌje?
Miꞌn,
porque nokwit cucx toc tilil wuꞌne tuꞌn cytzalaj xjal wiꞌje,
myawtlo tmajen Crist kine.
Tzaꞌn tten oc Pablo te apostl
11 Erman,
waje tuꞌn cybinteye jlu,
aju tkanil colbil in xi npacbaꞌne,
mya cyuꞌn xjal xbant.
12 Porque mya cyuꞌn xjal tzaj cykꞌoꞌn weye,
ex mintiꞌ in xnakꞌtzanjtze cyuꞌn xjal tiꞌj,
nok oꞌcx tuꞌn Jesucrist tzaj tyecꞌun weye.
13 Porque biꞌmaj cyuꞌne tzaꞌn ntene ojtxi tej ocslaꞌnxtok cyocslabl xjal judiy wuꞌne;
nimxix e cub nyajlaꞌne cycyakil ocslal etzan ke tuꞌn Dios ex oc tilil wuꞌne tuꞌn cynaj.
14 Tej ntene tuj cyocslabl xjal judiy,
mas nejni kine cywitz nimcu nxjalile junx wabkꞌiyile cyucꞌil,
porque mas nimxix nganiye tiꞌj ju yol cyaj kꞌmaꞌn cyuꞌn nxeꞌchele.
15 Pero ate Dios jaw scꞌonte weye naꞌnxtok witzꞌje,
ex in txconjtze tuꞌn nok tuꞌn t-xtalbil.
16 Ex baꞌn ela tuj twitz Dios tuꞌn ttzaj tyecꞌun Tcꞌwaꞌl weye,
tuꞌntzun t-xi npacbaꞌne tkanil colbil tuꞌn Crist cyxol ke xjal mya judiy ke.
Cyjaꞌtzun mintiꞌ xi nkanine jun consej cye xjal,
17 ex mintiꞌ in jaxe tuj tnam Jerusalén cyucꞌil apostl,
akeju nej e oc te apostl nwitze;
nok oꞌcx inxe tuj txꞌotxꞌ Arabia,
ex in ajtz meltzꞌaje juntl maj tuj Damasco.
18 Tbajlenxitzun ox abkꞌi,
in jaxe tuj Jerusalén queꞌyilte Pedro,
ex ax in tene olaj kꞌij tucꞌil.
19 Pero mintiꞌ juntl apostl o wile,
nok oꞌcx te Jacobo o wile,
aju titzꞌin Kajaw.
20 Aju yol ma txi ntzꞌibane cyeye ax toc,
in queꞌyin Dios tiꞌj mintiꞌ in chin nicꞌane yol.
21 Te tibajxitzun,
inxe tuj txꞌotxꞌ Siria ex tuj txꞌotxꞌ Cilicia.
22 Ex naꞌnxtok tojtzkinjtz nwitze cyuꞌn ke ocslal etzan ke tuꞌn Crist ateꞌ tuj junjun tnam tuj txꞌotxꞌ Judey.
23 Oꞌcx otok cybi in cymaꞌn mastl ocslal wiꞌje:
Aju xjal o yajlan ke ojtxi ex o kꞌojin tiꞌj kocslabl,
atzun jaꞌlo in xi tpacbaꞌn tkanil baꞌn tiꞌj kocslabl,
che chi.
24 Ex xi cykꞌoꞌn chjonte te Dios wiꞌje.