AJU UꞌJ XI TTZꞌIBAN APOSTL PABLO CYE AJ EFESO
Jun kꞌolbebl tuꞌn apostl Pablo
1
Akine Pablo apostl kine te Jesucrist nok tuꞌn tajbil Dios.
In xi ntzꞌibane cyeye,
akeye ateꞌye tuj tnam Efeso,
etzan keye tuꞌn Dios,
ocslal keye tiꞌj Jesucrist ex waꞌl keꞌxixe.
2 Awt Kman Dios tucꞌix Kajaw Jesucrist che tzaj kꞌonte xtalbil cyeye ex tuꞌn tkeꞌxix cycꞌuꞌje.
In tzaj tkꞌoꞌn Dios t-xtalbil ke nok tuꞌn Crist
3 Nimanxwit tbi Dios,
aju Tdios Kajaw Jesucrist ex Tman,
porque ma ko cub tcyꞌiwlaꞌn;
tcyakilju cyꞌiwbil at tuj cyaꞌj ma tzaj tkꞌoꞌn Xewbaj Xjan ke tuꞌnju at kmojbabl kib tucꞌil Crist.
4 Cyjaꞌtzun o ko jaw t-scꞌoꞌn atxix naꞌnxtok tbant twitz txꞌotxꞌ,
tuꞌn kten tucꞌil Crist,
tuꞌn kajben oꞌcx te,
ex tuꞌn kten twitz mintiꞌ chꞌin tzꞌil kiꞌj.
5 Tuꞌn tcꞌujlalil Dios cub t-ximan atxix ojtxi tuꞌn koc te tcꞌwaꞌl nok tuꞌn Jesucrist,
cub t-ximan icju porque baꞌn ela tuj twitz.
6 Cyjaꞌtzun,
cucx in xi kkꞌoꞌn chjonte te Dios tuꞌnju t-xtalbil tbanilxix;
nok tuꞌn t-xtalbil ma ko cꞌmet tuꞌn,
tuꞌnju ocslal koꞌ tiꞌj Tcꞌwaꞌl aju cꞌujlaꞌn tuꞌn.
7 Nok tuꞌn Crist ma ko colpet tuꞌnju tchcꞌel,
ex ma najset kil tuꞌnju t-xtalbil nimxix.
8 Nimxix t-xtalbil tzaj tkꞌoꞌn ke tuꞌn ttzꞌaket-xix knabl ex tuꞌn telxix knicꞌ tiꞌj.
9 Ma tzaj tyecꞌun Dios ju tajbil ke,
aju ewantok nej,
porque baꞌn ela tuj twitz icju,
ex tuꞌnx cub t-ximan icju,
10 tuꞌn toc tmojbaꞌn tcyakil tjakꞌ tcawbil Crist oc tjapun baj tkꞌijlalil;
keju ateꞌ tuj cyaꞌj ex keju ateꞌ twitz txꞌotxꞌ.
11 Tuꞌnju ocslal koꞌ tiꞌj Crist ma tzaj kꞌoꞌn jun ketzbil,
ojtxi cub t-ximan Dios jlu tuꞌn ttzaj tkꞌoꞌn ke,
porque tcyakil in tbinchaꞌn Dios ic tzaꞌnx tajbil ex ic tzaꞌnx ximaꞌmaj tuꞌn.
12 Atzun t-ximbetz Dios,
tuꞌn tjaw knimsaꞌn tbi ex tuꞌn t-xi kkꞌoꞌn chjonte te,
akekoꞌ nej oc keꞌ kcꞌuꞌje tiꞌj Crist aju at toclen tuꞌn Dios.
13 Ax icx cyeye,
tej t-xi cybiꞌne ju yol axix toc,
aju tkanil colbil cyeye,
ex tej t-xi cyocslaꞌne Crist,
ma che oc mojbaꞌne tucꞌil,
ex ma tzꞌoc kꞌoꞌn jun sey cyiꞌje tuꞌn Xewbaj Xjan,
aju tziyimaj tuꞌn Dios.
14 Ate Xewbaj Xjan ma tzaj kꞌoꞌn te jun señ tuꞌn kcꞌmonte jun ketzbil.
Ocxi tjapun baj tkꞌijlalil tuꞌn kcolpet,
maxitzun ctzajel kꞌoꞌn ju ketzbil tuꞌntzun tjaw knimsaꞌn tbi Dios ex tuꞌn t-xi kkꞌoꞌn chjonte te.
In cubsan Pablo twitz Dios tuꞌn ttzaj tkꞌoꞌn cynabl ocslal
15 Cyjaꞌtzun,
ic tzaꞌn weye,
atxix tej nbinteye tiꞌj cyocslable at tiꞌj Kajaw Jesús ex tiꞌj cycꞌujlalile at cyiꞌj cycyakil ocslal,
16 cucx t-xi nkꞌoꞌne chjonte te Dios cyiꞌje,
ex cucx in che tzaj nnaꞌne tuj nnaꞌj Diose.
17 In chin cubsane twitz Tdios Kajaw Jesucrist,
aju Mambaj maꞌxix toclen,
tuꞌn ttzaj tkꞌoꞌn cynable ex tuꞌn ttzaj tchicꞌbaꞌn cyeye tuꞌn telxix cynicꞌe tiꞌj Dios.
18 Ex in xi nkanine te Dios tuꞌn ttzaj t-spicꞌbaꞌn tuj cynable tuꞌn tel cynicꞌe tiꞌj ju ctzajel tkꞌoꞌn Dios cyeye tuj cyaꞌj tuꞌnju ma che txconjtze tuꞌn,
ex waje tuꞌn tel cynicꞌe tiꞌj ju etzbil nimxix ex tbanilxix ctzajel tkꞌoꞌn Dios cye ocslal,
19 ex tuꞌn tel cynicꞌe tiꞌj tipumal nimxix,
aju ma tzaj tkꞌoꞌn ke ex tuꞌn tajben ke,
akoꞌ ma ko ocslan.
Junx taꞌ tipumal ma tzaj tkꞌoꞌn ke ic tzaꞌn tipumal
20 tej tjatz ankꞌin Crist tuꞌn cyxol cyimni ex xi tmaꞌn tuꞌn tcub keꞌ ttxlaj tuj bankꞌabaj tuj cyaꞌj,
21 ex tuꞌn tten mas toclen cyibaj cycyakil ke nejenel ex keju at cyoclen ex keju at cyipumal ex keju in che cawin,
ex mas at toclen tbi twitz cybi cycyakil,
mya nok oꞌcx tuj tkꞌijlalil jaꞌlo,
ax icx tuj tkꞌijlalil tzul.
22 Ex tcyakil cub tkꞌoꞌn Dios tjakꞌ tcawbil Crist,
ex xi tkꞌoꞌn Dios toclen Crist tuꞌn toc te nejenel cyibaj cycyakil ocslal.
23 Atzun cye cycyakil ocslal ic tzaꞌn t-ximlal Crist ke.
Ex tuꞌn Crist in tzꞌaket-xix ju Iglesi,
porque tuꞌn Crist tzꞌaklxix tcyakil aju at.