AJU UꞌJ XI TTZꞌIBAN APOSTL PABLO CYE AJ FILIPOS
Jun kꞌolbebl tuꞌn apostl Pablo
1
Akine Pablo tucꞌix Timotey,
tmajen Jesucrist koꞌye,
in xi ktzꞌibane cyeye cycyakile ocslal keye tiꞌj Jesucrist ateꞌye tuj tnam Filipos,
cyucꞌix ke cwentil ex ke diácono.
2 Awt Kman Dios tucꞌix Kajaw Jesucrist che tzaj kꞌonte xtalbil cyeye ex tuꞌn tkeꞌxix cycꞌuꞌje.
Pablo in naꞌn Dios cyiꞌj ocslal
3 Tcyakil maj oc in che tzaj nnaꞌne,
in xi nkꞌoꞌne chjonte te Dios aju in chin ajbene te.
4 Cucx in chin naꞌne Dios cyiꞌje cycyakile tucꞌil tzalajbil,
5 in chin tzalaje tuꞌnju in che onine wucꞌile tuꞌn tpacbanjtz tkanil colbil atxix tnejel kꞌij ax icx jaꞌlo.
6 Kꞌukl ncꞌuꞌje tiꞌj jlu:
Ic tzaꞌn ma xeꞌt jun akꞌuntl baꞌn tuꞌn Dios tuj cyanmiye,
ax icxtzun cjapunel tuꞌn tuj tkꞌijlalil oc tul Jesucrist.
7 Tuj tumelxix tuꞌn nximane tiꞌj jlu cyiꞌje cycyakile porque at ncꞌuꞌje cyiꞌje;
porque ma cycꞌame t-xtalbil Dios junx wucꞌile,
ex in che onine wucꞌile tuj presbil weye,
ax icx ic tzaꞌn in chin oc tene colol tiꞌj tkanil colbil twitz cawil ex tuꞌn t-xi ncyuwsaꞌne axix toc tiꞌj.
8 Porque ate Dios testiw wiꞌje,
nimxix ncꞌujlalile cyiꞌje cycyakile,
ic tzaꞌn tcꞌujlalil Jesucrist.
9 Atzun jlu in xi nkanine te Dios;
tuꞌn tten mas cycꞌujlalile ex tuꞌn tten mas cynable ex tuꞌn telxix cynicꞌe tiꞌj tcyakil,
10 tuꞌntzun tbant cyscꞌone tiꞌj alcyeju mas baꞌn,
tuꞌntzun tten sak tuj cyanmiye ex mintiꞌ cypaltile tuj tkꞌijlalil oc tul Crist.
11 Atzun waje tuꞌn cytene tzꞌaklxix tuj tcyakil nok tuꞌn tipumal Jesucrist,
tuꞌntzun tjaw nimsaꞌn tbi Dios ex tuꞌn t-xi kꞌoꞌn chjonte te.
In chin ankꞌine tucꞌil Crist
12 Erman,
waje tuꞌn cybinteye;
tcyakilju ma baj wiꞌje ma tzꞌajben tuꞌn tel lakꞌeꞌ mastl tkanil colbil.
13 Cyjaꞌtzun cycyakil soldad ateꞌ tuj cwartel,
cyucꞌix ke mastl,
ma tzꞌel cynicꞌ wiꞌje,
pres kine tuꞌn tlaj in chin ajbene te Crist.
14 Ex nimxix erman ma keꞌxix cycꞌuꞌj tiꞌj Crist tuꞌn tlaj pres kine,
ex mas nnoꞌc tilil cyuꞌn tuꞌn t-xi cymaꞌn tyol Dios mintiꞌ cyxobil.
15 Ax toc at junjun xjal in che pacban tiꞌj Crist tuꞌnju at tloꞌch cycꞌuꞌj tiꞌj juntl ex tuꞌnju at chꞌin cykꞌoj,
atzun junjuntl in che pacban tuꞌn tcyakil cycꞌuꞌj.
16 At junjun in che pacban tiꞌj Crist tuꞌnju at chꞌin cykꞌoj wiꞌje,
mya tuꞌn tcyakil cycꞌuꞌj,
cyajbil tuꞌn ttzaj mas nbise tuj pres;
17 atzun junjuntl in che pacban tiꞌj Crist tuꞌnju at cycꞌujlalil,
porque baꞌn cyuꞌn ma chin cub kꞌoꞌne tzalu tuꞌn ncoline tiꞌj tkanil colbil.
18 ¿Titzun cxel nmaꞌne?
Katzun tuj tumel in che pacban tiꞌj Crist ex ka mya tuj tumel,
pero in chin tzalaje tiꞌj jlu,
porque in che pacban tiꞌj Crist.
Ex cucx chin tzalajele,
19 porque baꞌn wuꞌne oc chin tzokpetele tuꞌn cynaꞌj Diose ex tuꞌnju ma tzaj kꞌoꞌn T-xew Jesucrist te onil weye.
20 Porque atzun wajbile ex kꞌukl ncꞌuꞌje tiꞌj,
tuꞌn miꞌn ttzaj nchꞌixwiye,
nok oꞌcx tuꞌn tkeꞌ ncꞌuꞌje tuꞌn nyoline tuꞌntzun tjaw nnimsaꞌne tbi Crist,
ic tzaꞌn ojtxi ax icx jaꞌlo,
ka tuꞌn wankꞌine ex ka tuꞌn ncyime.
21 Porque ka itzꞌ kine tucꞌil Crist in chin ankꞌine,
ex ka ma chin cyime,
atzun jun ncambableju.
22 Ka tuꞌn wankꞌintle cab kꞌij tzalu,
jacu chin akꞌnane chꞌintl tuꞌn tchꞌiy takꞌun Kajaw.
Pero mintiꞌ nneꞌl nnicꞌe tiꞌj alcye mas baꞌn tuꞌn tjaw nscꞌoꞌne.
23 At cabe nximbetze,
pero mintiꞌ nneꞌl nnicꞌe tiꞌj alcye mas baꞌn.
Tuj jun tumel waje tuꞌn ncyime ex tuꞌn ntene tucꞌil Crist,
porque mas baꞌn jlu;
24 pero tuj juntl tumel mas baꞌn te cyeye tuꞌn wankꞌintle cab kꞌij.
25 Kꞌukl ncꞌuꞌje tiꞌj jlu ex baꞌn wuꞌne,
cucx chin tele cyucꞌile cycyakile tuꞌntzun cychꞌiye ex tuꞌn cytzalaje tuj cyocslable.
26 Cyjaꞌtzun tten jacu che tzalaje wiꞌje oc npone juntl maj cyucꞌile,
tuꞌnju ocslal keye tiꞌj Jesucrist.
27 Oꞌcx chin cubsale cywitze tuꞌn cyankꞌine baꞌnxix,
ic tzaꞌnx tkanil colbil in yolin tiꞌj Crist.
Cyjaꞌtzun,
ka ma chin pone queꞌyil cyeye ex ka mintiꞌ ẍin pone,
pero wajbile tuꞌn nbinteye tkanil cyiꞌje,
cucx cytene waꞌlxix keye,
junx cyanmiye ex junx cynable,
ex junx nnoꞌc tilil cyuꞌne tuꞌn cycoline tiꞌj cyocslable,
aju ma tzaj kꞌoꞌn cyeye tuꞌn tkanil colbil.
28 Ex mintiꞌ tuꞌn cyxobe cywitz keju in che kꞌojin cyiꞌje;
ka in che kꞌojin cyiꞌje,
atzun jun yecꞌbil cye tuꞌn cyxiꞌ tuj najen,
pero atzun te cyeye,
atzun jun yecꞌbil tuꞌn cyclete;
ax Dios in tzaj yecꞌunte jlu.
29 Porque ma tzaj kꞌoꞌn jun cyoclene mya nok oꞌcx tuꞌn cyocslane tiꞌj Crist,
ax icx tuꞌn ticꞌx cyuꞌne tuꞌn tlaj.
30 Nnoꞌc tilil tuꞌn ticꞌx cykꞌoj xjal cyuꞌne ic tzaꞌn weye;
o cyile ojtxi tzaꞌn tten icꞌx cykꞌoj xjal wuꞌne,
ex jaꞌlo ma pon tkanil cyucꞌile,
cucx ticꞌx wuꞌne.