AJU UꞌJ XI TTZꞌIBAN APOSTL PABLO CYE AJ COLOSAS
Jun kꞌolbebl tuꞌn apostl Pablo
1
Akine Pablo apostl kine te Jesucrist nok tuꞌn tajbil Dios,
tucꞌix erman Timotey at wucꞌile.
2 In xi ntzꞌibane cyeye,
akeye erman ateꞌye tuj tnam Colosas,
ocslal keye tiꞌj Crist ex waꞌl keꞌxixe.
Awt Kman Dios tzaj kꞌonte xtalbil cyeye ex tuꞌn tkeꞌxix cycꞌuꞌje.
In cubsan Pablo twitz Dios cyiꞌj ocslal
3 Cucx in ko naꞌne Dios cyiꞌje ex in xi kkꞌoꞌne chjonte te Dios aju Tman Kajaw Jesucrist,
4 porque ma kbiye at cyocslable tiꞌj Jesucrist ex at cycꞌujlalile cyiꞌj cycyakil ocslal,
5 porque in che ayone tiꞌj ju ctzajel tkꞌoꞌn Dios cyeye cꞌuꞌn tuj cyaꞌj;
ojtxi cybiye jlu,
atxix tej tpacbanjtz tkanil colbil cyeye,
aju yol axix toc.
6 Ic tzaꞌn ma pon tkanil colbil tuj tcyakil twitz txꞌotxꞌ,
icxtzun ma pon cyucꞌile.
Aju tkanil colbil ic tten ic tzaꞌn jun awal in tkꞌoꞌn twitz ex in chꞌiyixi tuj tcyakil twitz txꞌotxꞌ,
ax icx in chꞌiy cyxole atxix tej cybinteye ex tej cyojtzkinteye t-xtalbil Dios axix toc.
7 Atzun jlu o che xnakꞌtzanjtze tiꞌj tuꞌn Epafras,
aju akꞌnal junx kucꞌile ex at kcꞌuꞌje tiꞌj.
Ate Epafras tmajen Crist,
in ajben cyeye,
ex in japunxix tuꞌn tuj akꞌuntl.
8 Ax icx ma tzaj tchicꞌbaꞌn keye tiꞌj cycꞌujlalile in tzaj tkꞌoꞌn Xewbaj Xjan.
9 Cyjaꞌtzun,
atxix tej kbinteye jlu,
cucx knaꞌne Dios cyiꞌje,
ex in ko kanine te Dios tuꞌn cyojtzkinteye tcyakilju tajbil ex tuꞌn ttzaj tkꞌoꞌn Xewbaj Xjan cynable tuꞌn telxix cynicꞌe tiꞌj tcyakil,
10 tuꞌntzun cybete baꞌnxix ic tzaꞌn tajbil Kajaw,
ex tuꞌn ttzalaj Kajaw cyiꞌje tuj tcyakil,
ex tuꞌn cybinchanteye baꞌn tuj tcyakil,
ic tzaꞌn jun awal in tkꞌoꞌn twitz,
ex tuꞌn telxix cynicꞌe tiꞌj Dios junjun kꞌij.
11 Cuchiwt tuꞌn tocxix cyipune tuꞌn tipumal Dios tbanilxix,
tuꞌntzun ticꞌx cyuꞌne tuj tcyakil ex tuꞌn tten cypasense ex tuꞌn cytzalaje.
12 Cykꞌonxe chjonte te Kman Dios,
porque ma tzaj tkꞌoꞌn koclen tuꞌn kcꞌmonte jun etzbil junx cyucꞌil ocslal ateꞌ tuj spicꞌun.
13 Ma ko clet tuꞌn Dios,
ma ko etz tiꞌn tuj tipumal klolj,
ma ko pon tiꞌn tuj tcawbil Tcꞌwaꞌl aju cꞌujlaꞌn tuꞌn,
14 ex ma ko colpet tuꞌn Crist [nok tuꞌnju tchcꞌel],
ex ma najset kil tuꞌn.
Ma bant kten tucꞌil Dios nok tuꞌnju tcyimlen Crist
15 Ate Crist tilbilal Dios mintiꞌ kꞌanchaꞌl,
ate Crist Tcꞌwaꞌl Dios,
oꞌcxte attok nej naꞌnxtok tbant tcyakil,
ex a tajaw tcyakil.
16 Porque nok tuꞌn Crist o tbincha Dios tcyakil,
tcyakilju at tuj cyaꞌj ex tcyakilju at twitz txꞌotxꞌ,
tcyakilju kꞌanchaꞌl ex tcyakilju mintiꞌ kꞌanchaꞌl,
cyucꞌix ke cawbil,
cyucꞌix keju in che cawin,
cyucꞌix ke nejenel,
cyucꞌix keju at cyoclen;
tcyakil o bant nok tuꞌn Crist,
tcyakil o bant tuꞌn tajben te.
17 Attok te Crist nej tej naꞌnxtok tbant tcyakil,
ex nok tuꞌn Crist cytzuylaj cyib cycyakil.
18 Ax icx xi tkꞌoꞌn Dios toclen Crist tuꞌn toc te nejenel cyibaj cycyakil ocslal,
akeju cyoc te t-ximlal,
ex tiꞌj Crist in tzaj cychwinklal cycyakil ocslal,
porque ate Crist jatz itzꞌj nej cyxol cyimni tuꞌntzun tten mas toclen twitz tcyakil.
19 Porque baꞌn ela tuj twitz Dios tuꞌn toc Crist ic tzaꞌnx te Dios tuj tcyakil.
20 Ex baꞌn ela tuj twitz Dios tuꞌn tbant cyten cycyakil tucꞌil nok tuꞌn Crist,
cycyakil keju ateꞌ twitz txꞌotxꞌ,
ax icx keju ateꞌ tuj cyaꞌj,
ex ma bant tuꞌn Crist tuꞌn tten cymojbabl cyib xjal tucꞌil Dios tuꞌnju tchcꞌel el twitz crus.
21 Ax icx cyeye najchak ateꞌye tiꞌj Dios ojtxi,
ex aj kꞌoj keye tiꞌj Dios tuj cyanmiye tuꞌnju in cybinchaꞌntoke mya baꞌn,
22 atzun jaꞌlo ma bant cytene tucꞌil Dios tuꞌn Crist,
tej tcꞌixbisanjtz t-ximlal ex tej tcyim,
tuꞌntzun cypon kꞌiꞌne twitz Dios sak tuj cyanmiye,
mintiꞌ chꞌin tzꞌil cyiꞌje,
ex mintiꞌ cypaltile.
23 Cyjaꞌtzun tzꞌoc tililx cyuꞌne cucx tuꞌn tten cyocslable ex tuꞌn cyweꞌxixe,
ex miꞌn cyaj cycoline tkanil colbil aju ma keꞌ cycꞌuꞌje tiꞌj,
aju o cybiye ex in pacbanjtz cye cycyakil xjal tuj tcyakil twitz txꞌotxꞌ;
akine Pablo ma chin oc kꞌoꞌne tuꞌn wajbene tuꞌn tpacbet tkanil colbil.
Aju takꞌun Pablo tuꞌn tajben cyxol ocslal
24 In chin tzalaje jaꞌlo tuꞌnju nnicꞌx wuꞌne tuꞌn cylaje,
nnicꞌx wuꞌne tuj nximlale tuꞌntzun tel elset aju yajbil te Crist,
aju atxtok taj tuꞌn ticꞌx tuꞌn tiꞌj iglesi,
aju iglesi atzun t-ximlal Cristju.
25 Ma chin oc kꞌoꞌne ajbel cyxol cycyakil ocslal,
atzun wakꞌune tzaj tmaꞌn Dios weye tuꞌn wajbene cyeye,
tuꞌntzun t-xi npacbaꞌne tcyakil tyol Dios.
26 Aju yol lu ewantok ojtxi atxix t-xe tnejel,
atzun jaꞌlo ma tzaj tyecꞌun Dios cye ke ocslal tiꞌj.
27 Cub t-ximan Dios tuꞌn ttzaj tyecꞌun jlu cye ocslal,
tuꞌn tel cynicꞌ tiꞌj ju yol lu ewantok nej,
maꞌ t-xilen ex tbanilxix ju yol lu cye xjal mya judiy,
ex atzun in tmaꞌn ju yol lu:
At Crist tuj cyanmiye,
ex tuꞌnju at Crist tuj cyanmiye,
kꞌukl cycꞌuꞌje tiꞌj tuꞌn cypone tuj cyaꞌj.
28 In ko pacbane tiꞌj Crist,
ex in xi kkꞌoꞌne cynabl cycyakil xjal,
ex in xi kkꞌoꞌne xnakꞌtzbil cye cycyakil xjal tuꞌn ttzꞌaket-xix cynabl,
tuꞌn cypon kiꞌne cycyakil xjal twitz Dios tzꞌaklxix ke tuj cyocslabl tiꞌj Jesucrist.
29 In chin akꞌnane wen tuꞌn tjapun jlu,
nnoꞌc tilil wuꞌne tuꞌn tipumal Crist,
ex in chin cyuwsanjtze tuj wanmiye tuꞌn tipumal.