Che tzalajxe cucxju tiꞌj Kajaw
4
Cyjaꞌtzun erman,
che weꞌxixe tuj cyocslable tiꞌj Kajaw,
akeye at ncꞌuꞌje cyiꞌje ex wajbile tuꞌn toc nqueꞌyine cywitze,
cyuꞌne in chin tzalaje,
ex akeye ncambable,
akeye at ncꞌuꞌje cyiꞌje.
2 Akeye erman Evodia tucꞌix erman Síntique,
chin cubsale cywitze tuꞌn cytene junx cynable,
tuꞌnju ocslal keye tiꞌj Kajaw.
3 Ax icx teya wucꞌil ma japun tuꞌna tuj akꞌuntl,
chin cubsale teya,
onina cyiꞌj xuꞌj lu,
porque junx e akꞌnan wucꞌile tuꞌn tpacbanjtz tkanil colbil,
ex tucꞌix Clement ex mastl e onin wucꞌile tuj akꞌuntl,
tzꞌiban cybi tuj tuꞌjil chwinklal.
4 Cucx che tzalaje tiꞌj Kajaw.
Cxel nmaꞌne juntl maj cyeye:
Che tzalajxe.
5 Tzꞌelxwit nicꞌbaj cyiꞌje cyuꞌn cycyakil xjal ka mejor cymodiye.
In lakꞌex ttzaj tkꞌijlalil tuꞌn tul Kajaw.
6 Mi jun tuꞌn tbaj cycꞌuꞌje tiꞌj;
tcyakil cymanxe te Dios tuj cynaꞌj Diose;
cykaninxe te,
ax icx cykꞌonxe chjonte te.
7 Cyjaꞌtzun ckebil cycꞌuꞌje tuꞌn Dios;
mas maꞌ t-xilen jlu twitz tcyakil cynabl xjal,
tuꞌn jlu cꞌoquel cwentin cyanmiye ex cyximbetze,
tuꞌnju at cymojbabl cyibe tucꞌil Jesucrist.
Che ximane tiꞌj alcye ju baꞌn
8 Jaꞌlotzun erman,
atzun che ximane tiꞌj:
Tcyakilju axix toc,
tcyakilju baꞌn tuꞌn tnimanjtz,
tcyakilju tzꞌaklxix,
tcyakilju sakxix,
tcyakilju tbanilxix ex tcyakilju in yolinjtz baꞌn tiꞌj.
Ka at jun tbanilxix,
ex ka at jun baꞌn tuꞌn tjaw nimsaꞌn,
atzun che ximane tiꞌj jlu.
9 Cybinchame aju ma tzꞌel cycanoꞌne wiꞌje,
aju ma cycꞌame weye,
aju ma cybiye weye,
ex aju ma cyile wiꞌje;
atzun jlu cybinchame,
ex ctel Dios cyucꞌile,
aju kꞌukbalte cycꞌuꞌje.
O tcꞌam Pablo oyaj cyuꞌn ocslal tuj Filipos
10 Nim ma chin tzalaje tiꞌj Kajaw,
porque ma cub cyximane tuꞌn cyonine juntl maj wiꞌje.
Cucx in che ximane wiꞌje,
pero mintiꞌ cnet jun tumel cyuꞌne tuꞌn cyonine wiꞌje.
11 Mya tuꞌnju atx taj weye ma txi nmaꞌne jlu,
porque ma chin nakꞌete tuꞌn ntzalaje ka at weye ex ka mintiꞌ.
12 Ojtzkiꞌmaj wuꞌne ka tuꞌn ntene tuj mebayil ex ka tuꞌn tten nim weye;
tuj tcyakil xnakꞌtzaꞌmaj kine,
ka tuꞌn tnoj ncꞌuꞌje ex ka tuꞌn ticꞌx weꞌyaj wuꞌne,
ka tuꞌn ntene nim at weye,
ex ka tuꞌn ntene mintiꞌ at weye.
13 Tcyakil jacu tzicꞌx wuꞌne ex jacu bant wuꞌne,
porque ate Crist in kꞌonte wipumale.
14 Pero baꞌn ma cybinchaye tuꞌnju ma che onine wucꞌile tuj yajbil weye.
15 Ax icx biꞌn cyuꞌne,
akeye aj Filipos,
tej t-xeꞌt wuꞌne tuꞌn npacbane tiꞌj tkanil colbil,
ex tej wetze tuj txꞌotxꞌ Macedonia,
mintiꞌ tzaj cykꞌoꞌn ocslal tuj juntl tnam jun oyaj weye,
oꞌcx akeye tzaj cykꞌoꞌne jun oyaj te t-xel ju xtalbil o cycꞌame weye.
16 Porque tej ntene tuj tnam Tesalónica,
tzaj cysamaꞌne jun oyaj cab ox maj tuꞌn tajben weye.
17 Myatzun toc ncꞌuꞌje tiꞌj tuꞌn ncꞌmonteye jun oyaj,
pero aju wajbile tuꞌn cycꞌmonteye nimxix t-xelju ma tzaj cykꞌoꞌne.
18 Tcyakil at weye ex sobr at weye,
mintiꞌ atx taj weye,
porque ma ncꞌame te Epafrodito aju oyaj tzaj cysamaꞌne;
aju oyaj ma tzaj cysamaꞌne ic tten ic tzaꞌn storac at tcꞌocꞌjal,
ex ic tten ic tzaꞌn jun oyaj in tcꞌmoꞌn Dios ex in tzalaj tiꞌj.
19 Tcyakilju atx taj cyeye ctzajel tkꞌoꞌn Dios cyeye,
aju Dios in chin ajbene te;
nok tuꞌn Jesucrist ctzajel tkꞌoꞌn,
porque nimxix tkꞌinumabl Dios at ex tbanilxix.
20 Nimanxwit tbi Kman Dios tuj tcyakil tabkꞌiyil te jumajx.
Icxwitju.
Jun kꞌolbebl tuꞌn Pablo te bajsbil yol
21 Cykꞌonxe nkꞌolbeble cye cycyakil ocslal tiꞌj Jesucrist.
Ke erman ateꞌ wucꞌile in cheꞌx kꞌolbeꞌne cyuꞌn.
22 In cheꞌx kꞌolbeꞌne cyuꞌn cycyakil ocslal ex cyuꞌn keju in che ajben tuj tja gobierni.
23 Aju t-xtalbil Kajaw Jesucrist tenwt cyucꞌile cycyakile.
Icxwitju.