Tzaꞌn tten tuꞌn koc tzꞌaklxix
3
Cyjaꞌtzun erman che tzalajxe tiꞌj Kajaw.
Mlay chin sicte tuꞌn t-xi ntzꞌibane juntl maj axju yol xi ntzꞌibane cyeye nej,
ex jun onbil jlu te cyeye.
2 Ten cycwente cyiꞌje cye xjal ic cyten ic tzaꞌn txꞌyan;
ten cycwente cyiꞌje cye binchal mya baꞌn;
ten cycwente cyiꞌje cye keju in baj cykesin cyximlal.
3 Porque akeju axix toc ma tzꞌoc sircunsisyón cyiꞌj,
akoꞌ porque in ko cꞌulun te Dios tuj kanmi ex in ko tzalaj tiꞌj Jesucrist;
mya tiꞌj kxilen kꞌukl kcꞌuꞌj ex mya tiꞌj kbinchben.
4 Ic tzaꞌn weye,
nokwit waje tuꞌn tkeꞌ ncꞌuꞌje tiꞌj nxilene ex ka tiꞌj nbinchbene,
jaꞌlo tzꞌoc keꞌ ncꞌuꞌje tiꞌj.
Ka at juntl xjal taj tuꞌn tkeꞌ tcꞌuꞌj tiꞌj t-xilen ex ka tiꞌj tbinchben,
mlay pon ic tzaꞌn weye.
5 Porque tej witzꞌje in sircunsidarinjtze tuj twajxakin kꞌij;
tiyjil Israel kine,
ex tiyjil Benjamín kine;
ebrey xjal kine ex ebrey xjal ke nmane.
Parisey kine,
nim nganiye tiꞌj tley Moisés;
6 ex tuꞌnju at nim nganiye tiꞌj tley Moisés,
cyjaꞌtzun e yajlanjtz ke ocslal wuꞌne;
tcyakilju in tmaꞌn ley tuꞌn tjapun,
o bant wuꞌne,
mintiꞌ npaltile twitz ley.
7 Tcyakil jlu at tajben weye nej,
pero ya jaꞌlo mintiꞌtl tajben weye,
tuꞌn tlaj ma txi wocslaꞌne Crist.
8 Ax toc ma cub nximane tcyakil jlu mintiꞌtl tajben te weye,
nok oꞌcx waje tuꞌn wojtzkinteye Jesucrist aju Wajawe,
porque maꞌxix toclen jlu.
Tuꞌn tlaj Crist ma naj tcyakil wuꞌne,
ex tuj nwitze ma tzꞌoc ic tzaꞌn tzꞌis,
tuꞌntzun tcnet Crist wuꞌne ic tzaꞌn jun cambabl,
9 ex tuꞌn ntene tucꞌil mintiꞌ ma chin oque tzꞌaklxix wuꞌnx wibe tuꞌnju o nbinchaye aju in tmaꞌn ley,
nok oꞌcx tuꞌn wocslable tiꞌj Crist;
ma chin oque te tzꞌaklxix tuꞌn Dios tuꞌnju ma chin ocslane tiꞌj.
10 Wajbile tuꞌn wojtzkinteye Crist ex tuꞌn ncꞌmonteye tipumal te weye,
ic tzaꞌn tipumal Crist tej tjatz ankꞌin cyxol cyimni,
ex wajbile tuꞌn ticꞌx wuꞌne ic tzaꞌn te Crist icꞌx tuꞌn,
ex tuꞌn woque ic tzaꞌn te Crist tej tcyim,
11 tuꞌntzun ncanune tiꞌj tuꞌn njatz ankꞌine cyxol cyimni.
Ljoꞌnx kuꞌn tuꞌn kcanun tiꞌj jatum toc kwitz
12 Jaꞌlo naꞌnx ncanune tiꞌj ex naꞌnx ttzꞌaket-xix wuꞌne,
nok oꞌcx nnoꞌc tilil wuꞌne tuꞌn ncambanteye,
porque ic tzaꞌn weye ma chin cambanjtze tuꞌn Jesucrist.
13 Erman,
mintiꞌ in xi nmaꞌne ka ma ncambaye,
pero atzun jlu in nbinchaꞌne,
ma tzicꞌ tnaꞌl wuꞌne aju ma cyaj wiꞌjxiye,
ex nnoꞌc tilil wuꞌne tuꞌn ncanune tiꞌj ju tcub nwitze.
14 Ljoꞌnx wuꞌne tuꞌn ncanune tiꞌj jatum toc nwitze tuꞌn ncꞌmonteye jun oyaj,
porque max tuj cyaꞌj ma tzaj txocbil weye tuꞌn Dios,
tuꞌnju atine tucꞌil Jesucrist.
15 Cyjaꞌtzun tten,
kcyakil akoꞌ ma tzꞌaket knabl,
axwit jlu tuꞌn kximan tiꞌj;
katzun ka junxitl cyximbetze,
ax Dios ctzajel yecꞌunte cyeye.
16 Aju ma tzꞌel knicꞌ tiꞌj,
axtzunju tuꞌn kximan tiꞌj ex tuꞌn kbinchante.
17 Erman,
cycanoꞌmile wiꞌje,
ex cykꞌoꞌnque cwent cyiꞌj keju in che ankꞌin ic tzaꞌn ju yecꞌbil xi kkꞌoꞌne cyeye.
18 Porque nimcu xjal in che bet aj kꞌoj ke tiꞌj tcrus Crist,
nimcu maj o txi nmaꞌne cyeye cyiꞌj jlu,
ex jaꞌlo biꞌx in chin jaw okꞌe tuꞌn t-xi nmaꞌntle cyeye.
19 Che xeꞌl jlu tuj najen,
porque axju tachbil cycꞌuꞌj ma tzꞌoc te cydios;
ex in che tzalaj tiꞌj cychꞌixwi;
oꞌcx in che ximan tiꞌj aju at twitz txꞌotxꞌ.
20 Pero aju ktanmi atzun taꞌ tuj cyaꞌj;
atzun ctzajel Clol ke aju Kajaw Jesucrist,
aju in ko ayon tiꞌj.
21 Aju kximlal mintiꞌ chꞌin tbanil,
pero cchꞌexpetel tuꞌn Jesucrist,
cꞌoquel ic tzaꞌn t-ximlal Jesucrist tbanilxix,
tuꞌn tipumal cchꞌexpetel porque at tipumal tuꞌn tten tcyakil tjakꞌ tcawbil.