Cub tmansin tib Crist, cyjaꞌtzun ma jaw nimsaꞌn
2
Cyjaꞌtzun,
ka ma tzaj kꞌoꞌn cynable tuꞌn Crist,
ex ka ma kꞌukbanjtz cycꞌuꞌje tuꞌn tcꞌujlalil,
ex ka at cymojbabl cyibe tucꞌil Xewbaj Xjan,
ex ka at cycꞌuꞌje tiꞌj juntl ex ka in kꞌakꞌan cycꞌuꞌje tiꞌj juntl,
2 cytzalajsame ncꞌuꞌje,
junxwit cynable,
junxwit cycꞌujlalile cyxolxe,
junxwit cyximbetze,
mojl takꞌpon cyuꞌne cycyakile.
3 Miꞌn cybinchaye jun tiꞌxti tucꞌil kꞌoj,
ex miꞌn jaw cyniman cyibe,
nok oꞌcx tuꞌn tcub cymansin cyibe,
teyle junjun baꞌn tuꞌn t-ximan cyiꞌj txkantl ocslal ka at mas cyoclen twitz.
4 Teyle junjun mya nok oꞌcx tuꞌn toc tkꞌoꞌn tcwent tiꞌj aju at tajben te,
ax icx tuꞌn toc tkꞌoꞌn tcwent tiꞌj aju at tajben cye mastl.
5 Junxwit cyximbetze ic tzaꞌn t-ximbetz Jesucrist.
6 Ate Crist junx taꞌ ic tzaꞌn Dios,
pero mintiꞌ cub t-ximan tuꞌn miꞌn tcyaj ttzokpiꞌn toclen ic tzaꞌn Dios,
7 nok oꞌcx cyaj ttzokpiꞌn toclen,
oc tkꞌon tib te majen,
ex oc ic tzaꞌn ke xjal.
8 Tejtzun toc ic tzaꞌn xjal,
mas cub tmansin tib,
xi tniman tajbil Dios,
ex xi tkꞌon tib tuꞌn tcyim,
masque atzun tuꞌn tcyim twitz crus.
9 Cyjaꞌtzun,
mas jaw nimsaꞌn tuꞌn Dios tibaj tcyakil,
ex oc tkꞌoꞌn Dios jun tbi mas maꞌ t-xilen twitz cybi cycyakil,
10 tuꞌntzun cycub ẍmejeꞌ cycyakil cꞌulul twitz Jesús oc cybinte aju tbi,
tzaꞌnx keju ateꞌ tuj cyaꞌj,
icx keju ateꞌ twitz txꞌotxꞌ,
ex keju ateꞌ tjakꞌxi txꞌotxꞌ;
11 ex tuꞌn cymante cycyakil:
Ax toc ate Jesucrist Kajaw,
tuꞌntzun tjaw nimsaꞌn tbi Kman Dios.
Ke ocslal ic cyten ic tzaꞌn jun spicꞌun cyxol xjal
12 Cyjaꞌtzun erman,
akeye at ncꞌuꞌje cyiꞌje,
cucx in xi cynimane nyole;
ic tzaꞌn xi cynimane tej ntene cyucꞌile,
ax icx jaꞌlo cucx t-xi cynimane mi aꞌl kine cyucꞌile.
Japunx cyuꞌne aju in tmaꞌn colbil cyeye,
atwit tchi Dios tuj cywitze tuꞌn cyxobe twitz.
13 Porque ate Dios in akꞌnan tuj cyanmiye tuꞌn tten cyganiye tiꞌj ju tajbil ax icx tuꞌn cybinchanteye.
14 Oc tbant nok alcyexcu cyuꞌne,
miꞌn txiꞌ jun cyyole tiꞌj juntl ex miꞌn tzaj jun yol cyxole,
15 tuꞌn cytene mintiꞌ cypaltile ex tuꞌn cytene mintiꞌ jun mya baꞌn tuj cyximbetze,
nok oꞌcx tuꞌn cyoque te tcꞌwaꞌl Dios mintiꞌ chꞌin tzꞌil cyiꞌje cyxol ke xjal mya baꞌn ke ex miban che bin.
Ic cytene ic tzaꞌn ke cheꞌw in che koptzꞌaje cyxol xjal ateꞌ tuj klolj.
16 Cymanxe ju yol te chwinklal cye,
tuꞌntzun ntzalaje tuj tkꞌijlalil oc tul Crist,
ka mya nokx gan otok tzꞌoc tilil wuꞌne ex mya nokx gan otok chin akꞌnane.
17 Masque ma chin cyime tuꞌn tlaj takꞌun Crist,
pero in chin tzalaje tiꞌj,
porque jun oyaj jlu in xi nkꞌoꞌne te Dios junx tucꞌil ju cyoyaje.
Aju cyoyaje in xi cykꞌoꞌne atzunju,
cyajbeble te Dios nok tuꞌn cyocslable.
Cyjaꞌtzun junx in chin tzalaje cyucꞌile cycyakile.
18 Ax icxtzun cyeye che tzalajxe ex che tenxe alegr junx wucꞌile.
Timotey ex Epafrodito
19 Ka ic tajbil Kajaw Jesús,
ximan wuꞌne tuꞌn t-xi nsamaꞌn naje Timotey cyucꞌile,
tuꞌntzun tkeꞌ ncꞌuꞌje oc nbinteye tkanil cyiꞌje.
20 Porque mintiꞌ juntl at wucꞌile ic tzaꞌn te Timotey,
at tcꞌuꞌj cyiꞌje tuꞌn tonin cyucꞌile.
21 Porque cycyakil oꞌcx nnoꞌc tilil cyuꞌn tiꞌj ju at tajben cye,
ex mya tiꞌj ju tajbil Jesucrist.
22 Porque ojtzkiꞌn cyuꞌne tzaꞌn tten tzꞌakꞌnan Timotey,
ic tzaꞌn jun cꞌwaꞌlbaj in ajben te tman,
icxtzun ma tzꞌajben Timotey wucꞌile tuꞌn tpacbanjtz tkanil colbil.
23 Cyjaꞌtzun ximan wuꞌne tuꞌn t-xi nsamaꞌne Timotey cyucꞌile,
pero nej tuꞌn nbinteye tzaꞌn taꞌ ncawse.
24 Ex kꞌukl ncꞌuꞌje tiꞌj Kajaw,
ax icx weye chin pol naje cyucꞌile.
25 Pero ma cub nximane ka il tiꞌj tuꞌn t-xi nsamaꞌne Epafrodito cyucꞌile aju wermaniye ex in onin wucꞌile tuj akꞌuntl,
ex soldad junx wucꞌile;
atzun cysanjele ex ajbel weye tiꞌj ju at tajben weye.
26 Porque nimxix o tajbe tuꞌn t-xiꞌ queꞌyil cyeye cycyakile,
ex nimxix tzaj tbis tuꞌnju otok cybiye ka otok yabt.
27 Ax toc o yabt,
chꞌixmi o cyim;
pero tzaj kꞌakꞌan tcꞌuꞌj Dios tiꞌj,
mya oꞌcx tiꞌj tzaj kꞌakꞌan tcꞌuꞌj Dios,
icx wiꞌje,
tuꞌntzun miꞌn ttzaj mastl nbise.
28 Cyjaꞌtzun cxel nsamaꞌn naje,
tuꞌntzun cytzalaje oc cylonteye juntl maj twitz ex tuꞌn tel chꞌin nbise.
29 Cycꞌmomtzune tuꞌn tcyakil tzalajbil tuꞌnju ocslal tiꞌj Kajaw,
ex cycꞌujlame keju ic cyten ic tzaꞌn te;
30 porque chꞌixmi xcyim tuꞌnju in ajben tuj takꞌun Crist,
xi toyin tib tuꞌn tcyim tuꞌn tul tiꞌn ju onbil weye,
aju mintiꞌ tumel tuꞌn cyule kꞌol te.