2
Porque waje tuꞌn cybinteye,
nimxix in chin naꞌne Dios cyiꞌje,
ex cyiꞌj keju ateꞌ tuj tnam Laodicea,
ex cyiꞌj cycyakil keju naꞌnx toc cyqueꞌyin nwitze.
2 Waje tuꞌn tkꞌukbanjtz cycꞌuꞌje,
ex tuꞌn tten cymojbabl cyibe tuꞌn cycꞌujlalile,
ex tuꞌn telxix cynicꞌe tiꞌj tuꞌntzun tkeꞌxix cycꞌuꞌje,
ex tuꞌn tel cynicꞌe tiꞌj tyol Kman Dios ewantok nej,
in yolin tiꞌj Crist.
3 Porque atzun taꞌ tcyakil tbanil nabl tucꞌil Crist,
tewan tib,
ex tcyakil ojtzkiꞌn tuꞌn Crist.
4 Ma txi nmaꞌne jlu cyeye tuꞌn miꞌn cysbunjtze cyuꞌn xjal in cub tiꞌj cynabl xjal tuꞌn cyyol.
5 Porque masque mi aꞌl kine cyucꞌile pero aju wanmiye at cyucꞌile,
in chin tzalaje tuꞌnju baꞌn cytene in xi nbiꞌne,
ex tuꞌnju waꞌl keꞌxixe tuj cyocslable tiꞌj Crist.
6 Cyjaꞌtzun,
ic tzaꞌn ma cycꞌame Kajaw Jesucrist,
icxtzun tuꞌn cyankꞌine junx tucꞌil.
7 Cyawam cyibe tiꞌj Crist ex cybinchaꞌn jawe cychwinklale tibaj,
porque ate Crist simyent;
che weꞌxixe tuj cyocslable ic tzaꞌn ju xnakꞌtzbil ma cycꞌame,
ex nimxix cykꞌonxe chjonte te Dios.
Aju acꞌaj kchwinklal tuꞌn Crist
8 Ten cycwente cyiꞌje tuꞌn miꞌn cysbunjtze tuꞌn cyxnakꞌtzbil xjal tuj cyex cynabl in tzaj,
ex tuꞌn miꞌn cysbunjtze tuꞌn cysbubl nokx gan;
porque in che oc lpeꞌ tiꞌj ju yol cyajni kꞌmaꞌn cyuꞌn cytijil xjal,
in che oc lpeꞌ tiꞌj jun xnakꞌtzbil mya tzꞌaklxix in cykꞌoꞌn xjal,
mintiꞌ in che oc lpeꞌ tiꞌj Crist.
9 Porque tcyakilju tten Dios najl tuj t-ximlal Crist,
10 atzun cyeye ma che tzꞌakete tuꞌnju cymojbabl cyibe tucꞌil Crist.
Ate Crist nejenel cyibaj cycyakil keju at cyipumal ex at cyoclen twitz txꞌotxꞌ ex tuj cyaꞌj.
11 Tuꞌnju ocslal keye tiꞌj Crist ma che sircunsidarinjtze,
mya tuꞌn cykꞌab xjal ma bant jlu,
nok oꞌcx tuꞌn Crist ma che sircunsidarinjtze,
tuꞌnju ma tzꞌel cycotpiꞌne aju ojtxi cytene mya baꞌn,
tucꞌix ju tajbil cychibjale.
12 Junx e cuꞌx makuꞌne tucꞌil Crist tej cybyane,
ex junx ma che jaw ankꞌine tucꞌil Crist tuꞌnju ma keꞌ cycꞌuꞌje tiꞌj tipumal Dios,
aju jaw ankꞌin Crist tuꞌn cyxol cyimni.
13 Cyimni keye nej tuꞌn tlaj cyile ex tuꞌn tlaj cucx cybinchanteye tajbil cychibjale,
atzun jaꞌlo ma tzaj tkꞌoꞌn Dios cychwinklale junx tucꞌil Crist,
ex ma cub tnajsaꞌn tcyakil cyile.
14 Cub tnajsaꞌn Dios aju tuꞌjil kcꞌas jatum in tmaꞌn ka at kil,
biꞌx el tiꞌn,
cyaj tclawsiyiꞌn twitz crus.
15 Tuꞌn Crist cub cyiꞌj ke nejenel mintiꞌ kꞌanchaꞌl ex keju at cyipumal;
e cub tkꞌoꞌn tuꞌn cyqueꞌyinjtz cyuꞌn cycyakil xjal,
cub cyiꞌj tuꞌn tej tjaw kꞌoꞌn twitz crus.
Cykꞌoꞌnc cyximbetze tiꞌj ju at tuj cyaꞌj
16 Cyjaꞌtzun,
miꞌn txi cykꞌoꞌne ambil cye xjal tuꞌn cyyolin cyiꞌje tuꞌn tlaj alcye in xi cywaꞌne ex in xi cycꞌaꞌne,
ex ka tiꞌj jun ninkꞌij,
ex ka tiꞌj tuꞌn ticꞌset ninkꞌij oc ttzaj queꞌyin acꞌaj xjaw,
ex ka tiꞌj ju kꞌij te ojlabl.
17 Tcyakil jlu nok jun techal tiꞌj ju attok tulel,
pero ate Crist ttxuylal,
ex tcyakil jlu tiꞌj Crist in japun baj.
18 Miꞌn txi cykꞌoꞌne ambil tuꞌn tel kꞌiꞌn cycambable cyuꞌn xjal nok nnoꞌc cykꞌon cyib mans ke,
ex in cymaꞌn tuꞌn cycꞌulun xjal cywitz anjel.
In che yolin tiꞌj ju naꞌnx cylonte,
ex nokx gan in jaw cyniman cyib tuꞌn cyex cynabl.
19 Mya cytzyun cyib tiꞌj Crist aju wibaj,
porque tuꞌn Crist in chꞌiy tcyakil t-ximlal,
tcꞌaꞌch tib ex ttzyun tib tuꞌn tyakamil ex tuꞌn tbotxꞌil,
in chꞌiy porque a Dios chꞌisal te.
20 O che cyime tucꞌil Crist tuꞌn cytzokpete tjakꞌ ju xnakꞌtzbil mya tzꞌaklxix in cykꞌoꞌn xjal,
¿tikuꞌntzun in xi cykꞌon cyibe tjakꞌ cyxnakꞌtzbil xjal mer ic tzaꞌn atx cyoclene cyxol?
21 Achaktzun cymandamyent jlu:
Miꞌn tzaj ttzyuꞌna jlu,
miꞌn txi tnicꞌbeꞌna jlu,
miꞌn tzꞌoc tmacoꞌna jlu,
che chi.
22 Tcyakil jlu cymandamyent xjal ex cyxnakꞌtzbil xjal,
tcyakil jlu cnajel oc tbaj tajben cye xjal.
23 Ke xjal in che japun ke mandamyent lu cyuꞌn,
mer ic tzaꞌn at cynabl,
porque cyuꞌnx cyib in cub cyximan tzaꞌn tten tuꞌn cycꞌulun,
in cyyecꞌun cyib mans ke,
ex in baj cycꞌixbisaꞌn cyximlal;
pero mlay maket tajbil cychibjal tuꞌn tcyakil jlu.