3
Tuꞌnju ma che jaw ankꞌine tucꞌil Crist,
cykꞌoꞌnc cyximbetze tiꞌj ju at tuj cyaꞌj,
jatum taꞌ Crist kꞌukl ttxlaj Dios tuj bankꞌabaj.
2 Oꞌcx che ximane tiꞌj ju at tuj cyaꞌj,
mya aju at twitz txꞌotxꞌ.
3 Porque o che cyime,
ex aju cychwinklale ewan junx tucꞌil Crist tuj tcwent Dios.
4 Octzun tyecꞌunte tib Crist,
aju kꞌol cychwinklale,
ax icx cyeye oc che yecꞌetele junx tucꞌil tuꞌn cytene tucꞌil tuj tajwalil.
Aju ojtxi kchwinklal ex aju acꞌaj kchwinklal tuꞌn Crist
5 Cyjaꞌtzun,
cytzokpincje tcyakilju mya baꞌn in cybinchaꞌn xjal:
Aju yaẍbil,
ex ju ttzꞌilil,
tucꞌix ju achbil mya baꞌn,
tucꞌix ju cyajbile mya baꞌn,
tucꞌix ju in pon cycꞌuꞌje tiꞌj nimcu;
junx taꞌ jlu ic tzaꞌn in che cꞌulune cywitz ke tilbilal.
6 Tuꞌn tlaj tcyakil jlu in tzaj tkꞌoj Dios cyiꞌj ke xjal miban che bin;
maꞌxix jun castiw tzul cyiꞌj.
7 Ic tzaꞌn cyeye,
o cybinchaye tcyakil jlu ojtxi tej ateꞌxtoke tuj.
8 Atzun jaꞌlo cykꞌoncje tcyakil jlu:
Miꞌn che kꞌojine,
miꞌn tzaj tloꞌch cycꞌuꞌje,
miꞌn cybinchaye mya baꞌn,
miꞌn che yasune,
miꞌn che yoline tiꞌj tcꞌayil yol.
9 Miꞌn che nicꞌane yol cyxolxe,
porque ma tzꞌel cycotpiꞌne aju ojtxi cytene tucꞌix ju ojtxi cybinchbene.
10 Ex ma tzꞌoc cykꞌoꞌne ju acꞌaj cytene cucx tuꞌn cyoque te acꞌaj,
ic tzaꞌn tilbilal Dios aju chꞌisal cyeye,
ex tuꞌn telxix cynicꞌe tiꞌj.
11 Tuꞌntzun jlu,
mya part cyxilen xjal grieg mi xjal judiy,
mya part xjal sircunsidarin mi xjal mya sircunsidarin,
mya part jun xjal te junxitl tnam najchak mi keju xjal mintiꞌx chꞌin baꞌn cyuꞌn,
mya part cyxilen ke majen tzyuꞌn ex ke xjal tzokpiꞌn,
nok oꞌcxte Crist tibaj tcyakil ex at kucꞌil kcyakil.
12 Kꞌakꞌanx cycꞌuꞌje tiꞌj juntl,
cybinchame xtalbil,
miꞌn jaw cyniman cyibe,
che oque mans,
ten cypasense;
cybinchame jlu porque cꞌujlaꞌn keye tuꞌn Dios ex scꞌoꞌmaj keye tuꞌn,
tuꞌn cyoque tecuxix.
13 Tzicꞌx cyuꞌne aju cypaltil junjuntl,
cynajsam cyile cyxolxe ka at jun at tyol tiꞌj juntl;
ic tzaꞌn te Crist cub najsaꞌn cyile tuꞌn,
ax icx cyeye tuꞌn cybinchanteye icju.
14 Ex aju mas il tiꞌj twitz tcyakil jlu,
tuꞌn tten cycꞌujlalile,
porque tuꞌntzun jlu ktzuylaj kib kcyakil.
15 Awt Dios cawin tuj cyanmiye tuꞌn tten cymojbabl cyibe,
porque o che txconjtze tuꞌn tten jun mojbabl tib cyxolxe;
ex cykꞌonxe chjonte te Dios.
16 Nojxwit cyanmiye tuꞌn tyol Crist.
Cyxnakꞌtzam cyibe ex cykꞌonxe cynable cyxolxe,
tenxix cynable tiꞌj jlu.
Cybitzanxe bitz,
tucꞌix salmo,
tucꞌix bitz te Dios,
ex cykꞌonxe chjonte te Dios tuj cyanmiye.
17 Ex tcyakilju in cybinchaꞌne ex in cymaꞌne,
cybinchame tcyakil ic tzaꞌn tajbil Kajaw Jesús,
ex cykꞌonxe chjonte te Kman Dios nok tuꞌn Jesús.
Tzaꞌn tten tuꞌn kankꞌin cyxol kucꞌil
18 Akeye xuꞌj,
cynimanxe cychmile,
atzun jlu il tiꞌj porque ocslal keye tiꞌj Kajaw.
19 Akeye chmilbaj,
cycꞌujlam cyxuꞌjile ex miꞌn che yoline cyuw cye.
20 Akeye cꞌwaꞌlbaj,
cynimanx cymane tuj tcyakil,
porque in tzalaj Kajaw tiꞌj jlu.
21 Akeye mambaj,
miꞌn tzꞌoc cyicꞌleꞌne cycꞌwaꞌle,
tuꞌntzun miꞌn tbaj cycꞌuꞌj.
22 Akeye majen,
cucx tuꞌn t-xi cynimane cypatrone ateꞌ twitz txꞌotxꞌ,
miꞌn che ajbene nok tuꞌnju at jun toꞌyil cyeye ic tzaꞌn keju in che ximan tiꞌj oꞌcx tuꞌn cytzalaj xjal cyiꞌj;
nok oꞌcx che ajbene tuꞌn tcyakil cycꞌuꞌje,
tuꞌnju in che xobe twitz Dios.
23 Ex tcyakilju in cybinchaꞌne,
cybinchame tuꞌn tcyakil cyanmiye,
ic tzaꞌn te Kajaw in che ajbene ex mya cye xjal.
24 Porque baꞌn cyuꞌne,
ctzajel tkꞌoꞌn Kajaw jun etzbil cyeye te t-xel cyajbeble,
porque te Crist in che ajbene,
atzun mer Kajaw.
25 Aju in binchan mya baꞌn tiꞌj juntl,
axju mya baꞌn oc tcꞌmaꞌ te t-xel ju tbinchben,
porque mintiꞌ in tqueꞌyin Dios ti t-xilen xjal.