4
Akeye patrón,
cybinchame aju tzꞌaklxix ex tuj tumelxix cye cymajene,
porque baꞌn cyuꞌne icx cyeye at jun cypatrone tuj cyaꞌj.
2 Cucx che naꞌne Dios,
che xkꞌukine tuj naꞌj Dios ex cykꞌonxe chjonte te Dios.
3 Ax icx che naꞌne Dios kiꞌje,
tuꞌn ttzaj tyecꞌun Kajaw jun tumel jatum tuꞌn t-xi kpacbaꞌne tyol Dios,
ex tuꞌn t-xi kchicꞌbaꞌne tyol Crist aju attok tuj ewaj nej;
tuꞌntzun tlaj ju yol lu pres kine.
4 Che naꞌne Dios wiꞌje,
tzaꞌn tten tuꞌn t-xi nchicꞌbaꞌne ju yol lu,
porque il tiꞌj tuꞌn t-xi nmaꞌne.
5 Tenx cynable tzaꞌn tten tuꞌn cybete tuj tumelxix cywitz xjal mya ocslal ke;
tzꞌajbenxwit tcyakil kꞌij cyuꞌne tuꞌn cybinchanteye ju baꞌn.
6 Cheba che yoline tcyakil maj,
atwit tchyaꞌl cyyole,
tuꞌntzun tel cynicꞌe tiꞌj tzaꞌn tten tuꞌn t-xi cytzakꞌweꞌne teyle junjun xjal.
Jun kꞌolbebl tuꞌn Pablo te bajsbil yol
7 Tcyakilju tzaꞌn ntene cxel ttxꞌolbaꞌn Tíquico cyeye;
atzun kerman at kcꞌuꞌj tiꞌj,
in japunxix tuꞌn tuj tajbebl,
ex tmajen Kajaw junx kucꞌile.
8 Cyjaꞌtzun ma txi nsamaꞌne Tíquico cyucꞌile,
tuꞌntzun cybinteye tzaꞌn ktene,
ex tuꞌn tkꞌukbanjtz cycꞌuꞌje tuꞌn.
9 Tucꞌix Onésimo ma txi nsamaꞌne,
atzun jun erman at kcꞌuꞌj tiꞌj ex in japunxix tuꞌn tuj akꞌuntl,
ax tzaj cyxole.
Tcyakilju in baj tzalu cxel cymaꞌn cyeye.
10 In cheꞌx kꞌolbeꞌne tuꞌn Aristarco aju at wucꞌile tuj pres;
ex in cheꞌx kꞌolbeꞌne tuꞌn Marcos,
cyerman cyib tucꞌil Bernabé.
O txi nmaꞌne jlu cyeye,
ka ma pon Marcos cyucꞌile cycꞌmome.
11 Ex in cheꞌx kꞌolbeꞌne tuꞌn Jesús aju Justo tbi;
oꞌcx ke jlu cyxol ke ocslal judiy in che onin wucꞌile tuꞌn tpacbet tcawbil Dios,
ex nim ma kꞌukbanjtz ncꞌuꞌje cyuꞌn.
12 In cheꞌx kꞌolbeꞌne tuꞌn Epafras aju tmajen Jesucrist ax tzaj cyxole.
Cucx nnoꞌc tilil tuꞌn tuꞌn tnaꞌn Dios cyiꞌje,
tuꞌntzun cyweꞌxixe,
ex tuꞌn ttzꞌaket-xix cynable,
ex tuꞌn tjapun cyuꞌne tcyakilju tajbil Dios.
13 Porque ma wile,
tocxix tcꞌuꞌj Epafras cyiꞌje ex cyiꞌj keju ateꞌ tuj tman Laodicea ex cyiꞌj keju ateꞌ tuj tnam Hierápolis.
14 In cheꞌx kꞌolbeꞌne tuꞌn doctor Lucas aju at kcꞌuꞌj tiꞌj,
ex in cheꞌx kꞌolbeꞌne tuꞌn Demas.
15 Cykꞌonxe kkꞌolbeble cye ke erman ateꞌ tuj tnam Laodicea;
ex cykꞌonxe kkꞌolbeble te Ninfas ex cye ocslal nnoꞌc cychmon cyib tuj tja.
16 Oc tbaj schꞌiꞌn ju uꞌj lu cyxole,
cysamanxe tuj tnam Laodicea tuꞌn tjaw schꞌiꞌn cyxol ke ocslal,
ax icx ju uꞌj xi nsamaꞌne cye aj Laodicea,
baꞌn tuꞌn tjaw cyschꞌiꞌne.
17 Cymanxe te Arquipo cyjaꞌ:
Kꞌoꞌnc tcꞌuꞌja tiꞌj tuꞌn tjapun tuꞌna aju tajbebla o tzaj kꞌoꞌn teya tuꞌn Kajaw,
che chicuye te.
18 Akine Pablo in xi ntzꞌibane ju kꞌolbebl lu tuꞌnx nkꞌabe.
Cynaꞌntze tiꞌj ju presbil weye.
Aju t-xtalbil Dios tenwt cyucꞌile.
Icxwitju.