6
Akeye cꞌwaꞌlbaj,
cynimanxe cymane ic tzaꞌn in tmaꞌn Kajaw,
porque tuj tumelxix jlu.
2 Atzun tnejel mandamyent jlu at t-xel tuꞌn Dios ka ma japun:
Cynimanxe cymane ex cytxuye,
3 tuꞌntzun tel baꞌn cyeye ex tuꞌn cytene nim kꞌij twitz txꞌotxꞌ,
chi tuj Tuꞌjil.
4 Icx cyeye mambaj,
miꞌn tzꞌoc cyicꞌleꞌne cycꞌwaꞌle tuꞌn miꞌn ttzaj cykꞌoj,
nok oꞌcx cychꞌiysame ex cycaꞌwinxe ex cykꞌonxe cynabl ic tzaꞌn in tmaꞌn Kajaw.
5 Akeye majen,
cynimanxe cypatrone ateꞌ twitz txꞌotxꞌ,
che xobe cywitz ex tenwt cychiylal cyeye,
che ajbene cye tuꞌn tcyakil cyanmiye,
ic tzaꞌn te Kajaw in che ajbene.
6 Mya oꞌcx tuꞌn cyajbene ka at jun toꞌyil cyeye,
ic tzaꞌn keju in che ajben nok oꞌcx tuꞌn cytzalaj xjal cyiꞌj;
atzun cyeye che ajbene ic tzaꞌn tmajen Crist keye,
cybinchame tajbil Dios tuꞌn tcyakil cyanmiye.
7 Che ajbene tuꞌn tcyakil cycꞌuꞌje ic tzaꞌn te Kajaw in che ajbene ex mya cye xjal.
8 Porque baꞌn cyuꞌne,
teyle junjun alcye in tbinchaꞌn baꞌn,
tzul tkꞌoꞌn Kajaw t-xel te,
ka tzyuꞌn te majen ex ka tzokpiꞌn.
9 Icx cyeye patrón,
cybinchame baꞌn cyucꞌil cymajene,
ex miꞌn che oc cyxobtzaꞌne;
porque baꞌn cyuꞌne,
aju Cyajaw majen ex Cyajawe at tuj cyaꞌj,
ex baꞌn cyuꞌne mintiꞌ in tqueꞌyin Kajaw ti t-xilen xjal.
Aju macbil in tzaj tkꞌoꞌn Dios ke tuꞌn tajben tuj kꞌoj
10 Jaꞌlotzun erman,
cycyuwsam cyibe tuꞌnju at cymojbabl cyibe tucꞌil Kajaw,
ex tzꞌocwit cyipune tuꞌn tipumal nimxix.
11 Cykꞌoꞌnque cyiꞌje tcyakilju in ajben te kꞌojbil,
aju ma tzaj tkꞌoꞌn Dios cyeye,
tuꞌntzun cyweꞌxixe twitz ju sbubl tuꞌn tajaw il.
12 Porque mya cyucꞌil xjal in ko kꞌojin,
nok oꞌcx cyucꞌil keju nejenel mintiꞌ kꞌanchaꞌl,
ex cyucꞌil keju at cyipumal,
ex cyucꞌil keju in che cawin tuj klolj twitz txꞌotxꞌ,
ex cyucꞌil ke juꞌẍ mya baꞌn ke nim cyajlal ateꞌ twitz cyaꞌj.
13 Cyjaꞌtzun,
cytzyume tcyakilju in ajben te kꞌojbil,
aju in tzaj tkꞌoꞌn Dios cyeye,
cykꞌoꞌnque cyiꞌje tuꞌn tbant cyweꞌxixe oc tul tkꞌijlalil mya baꞌn,
ex tuꞌn miꞌn cyyucche oc tjapun baj tcyakil cyuꞌne.
14 Cyjaꞌtzun che weꞌxixe,
cycꞌaloꞌnc cycꞌuꞌje tuꞌnju yol axix toc;
che oque tzꞌaklxix,
ic tten jlu ic tzaꞌn jun chicyet cꞌuxbil nnoꞌc cykꞌoꞌn soldad cyiꞌj tuꞌn cyclet.
15 Nok banin cytene tuꞌn cyxiꞌye pacbal tkanil baꞌn tuꞌn tbant cyten xjal tucꞌil Dios,
ic tten jlu ic tzaꞌn jun soldad banin tten ex toc t-xajab.
16 Ax icx tuꞌn toc keꞌ cycꞌuꞌje tiꞌj Dios,
ic tten jlu ic tzaꞌn jun makbil tuꞌn cyclete ex tuꞌn tyupit tcyakil plech in cꞌant in tzaj t-xoꞌn tajaw il.
17 Ex keꞌ cycꞌuꞌje tiꞌj ju colbil cyeye,
ic tten jlu ic tzaꞌn jun pasbil cꞌuxbil tuꞌn tjax cykꞌoꞌne tuj cywiꞌye;
ex cytzyume ju spad in tzaj tkꞌoꞌn Xewbaj Xjan,
atzun tyol Diosju.
18 Che naꞌne Dios tcyakil kꞌij ic tzaꞌn in tmaꞌn Xewbaj Xjan,
che naꞌne Dios tiꞌj tcyakil ex che cubsane twitz Dios,
che xkꞌukine ex miꞌn che kꞌajene tuꞌn cycubsane twitz Dios cyiꞌj cycyakil ocslal.
19 Ax icx che naꞌne Dios wiꞌje tuꞌn ttzaj tkꞌoꞌn Dios yol weye,
tuꞌntzun nyoline mintiꞌ nxobile,
tuꞌn t-xi nchicꞌbaꞌne tkanil colbil aju ewantok nej.
20 Ma chin ocxe tuj pres tuꞌn tlaj presentant kine tiꞌj tkanil colbil baꞌn,
pero che naꞌne Dios wiꞌje tuꞌn t-xi npacbaꞌne tkanil colbil mintiꞌ nxobile,
ex tuꞌn nyoline tuj tumelxix.
Jun kꞌolbebl tuꞌn Pablo, te bajsbil yol
21 Tcyakil cxel tmaꞌn Tíquico cyeye tuꞌntzun cybinteye ti in baj weye ex alcye in nbinchaꞌne.
Ate erman lu at kcꞌuꞌje tiꞌj,
ex in japunxix tuꞌn tuj takꞌun Kajaw.
22 Cyjaꞌtzun ma txi nsamaꞌne cyucꞌile,
tuꞌntzun cybinteye tzaꞌn ktene,
ex tuꞌn tkꞌukbanjtz cycꞌuꞌje tuꞌn.