Tzaꞌn tten tuꞌn cyankꞌin ke tcꞌwaꞌl Dios
5
Cycanoꞌmile tiꞌj Dios,
porque tcꞌwaꞌl Dios keye,
cꞌujlaꞌnxix keye tuꞌn.
2 Cucx cycꞌujlam cyibe ic tzaꞌnte Crist ma ko tcꞌujla ex xi tkꞌon tib tuꞌn tcyim te kxel ic tzaꞌn jun tal ẍneꞌl in cub te chojbil kil,
atzun jun oyaj at tcꞌocꞌjal ex in tzalaj Dios tiꞌj.
3 Atzunju yaẍbil ex tcyakil ttzꞌilil,
ex tcyakilju in pon cycꞌuꞌj xjal tiꞌj,
mintiꞌ tuꞌn cyyoline tiꞌj,
porque mya baꞌn tuꞌn cyyolin ocslal tiꞌj jlu.
4 Ex miꞌn che yoline tiꞌj tcꞌayil yol,
ex ka jun yol mintiꞌ tnabl,
ex ka jun yakbil mya baꞌn,
porque mya baꞌn jlu;
mas baꞌn tuꞌn t-xi cykꞌoꞌne chjonte te Dios.
5 Porque baꞌn jlu cyuꞌne,
ke xjal in che yaẍin,
ex ke xjal tzꞌil tuj cyanmi,
ex ke xjal in pon cycꞌuꞌj tiꞌj kꞌinumabl,
mintiꞌ cyoclen tiꞌj tcawbil Crist,
aju ax tcawbil Dios,
porque ka ma pon kcꞌuꞌj tiꞌj kꞌinumabl,
junx taꞌ jlu ic tzaꞌn in ko cꞌulun cywitz ke tilbilal.
6 Cycwentim cyibe tuꞌn miꞌn cycub sbuꞌne tuꞌn jun yol nokx gan,
porque tuꞌn tlaj tcyakil jlu in tzaj tkꞌoj Dios cyiꞌj ke xjal miban che bin.
7 Cyjaꞌtzun miꞌn tzꞌoc cymojban cyibe cyucꞌil.
8 Porque ojtxi ateꞌye tuj klolj,
atzun jaꞌlo ateꞌye tuj spicꞌun tuꞌnju ocslal keye tiꞌj Kajaw;
che ankꞌintzune tuj spicꞌun porque te spicꞌun keye.
9 Porque aju in tzaj tkꞌoꞌn spicꞌun ke,
atzun tuꞌn kbinchante baꞌn,
ex tuꞌn kbet tuj tumelxix,
ex tuꞌn kyolin axix toc.
10 Tzꞌelx cynicꞌe tiꞌj alcyeju baꞌn tuj twitz Kajaw.
11 Ex miꞌn tzꞌoc cykꞌon cyibe tiꞌj ju in binchanjtz tuj klolj mintiꞌ jun baꞌn in tkꞌoꞌn,
nok oꞌcx tuꞌn t-xi cymayoꞌne.
12 Porque chꞌixbil tuꞌn kyolin tiꞌj ju in cybinchaꞌn xjal tuj ewaj.
13 Pero tcyakil nneꞌl tuj kꞌanchaꞌl oc tcanun spicꞌun tiꞌj;
porque tcyakil nneꞌl tuj kꞌanchaꞌl tuꞌn spicꞌun.
14 Cyjaꞌtzun at jun yol in tmaꞌn cyjaꞌ:
Aya in tana,
kꞌiꞌmel twatla ex weꞌctza cyxol cyimni,
ex cbel ten t-spicꞌumal Crist tibaja,
chitzun.
15 Cyjaꞌtzun che ximane tiꞌj tzaꞌn tten tuꞌn cybete;
miꞌn che bete mintiꞌ cynable,
nok oꞌcx tuꞌn tten cynable.
16 Tzꞌajbenxwit tcyakil kꞌij cyuꞌne tuꞌn cybinchanteye baꞌn,
porque mya baꞌn ju tkꞌijlalil jaꞌlo.
17 Cyjaꞌtzun,
miꞌn che oque mintiꞌ cynable,
nok oꞌcx tuꞌn tel cynicꞌe tiꞌj alcyeju tajbil Kajaw.
18 Miꞌn che cꞌane kꞌeꞌn;
porque tuꞌntzun jlu mintiꞌ chꞌin cyjucꞌbil cyib xjal;
nok oꞌcx tuꞌn tnoj tuj cyanmiye tuꞌn Xewbaj Xjan.
19 Che yoline cyiꞌj salmo cyxolxe ex che bitzane;
cybitzanxe bitz te Dios,
che bitzane ex cykꞌonxe chjonte te Kajaw tuꞌn tcyakil cyanmiye.
20 Cucx cykꞌonxe chjonte te Kman Dios tiꞌj tcyakil,
nok tuꞌn Kajaw Jesucrist.
Tzaꞌn tten tuꞌn cyankꞌin ocslal tuj cyja
21 Cynimanx cyibe cyxolxe tuꞌnju at tchi Crist tuj cywitze.
22 Akeye xuꞌj,
cynimanxe cychmile ic tzaꞌn in xi cynimane Kajaw.
23 Porque ate xinak nejenel te xuꞌj,
ic tzaꞌn te Crist nejenel cye cycyakil ocslal;
ex ax Crist Clol cye;
atzun cye ocslal t-ximlal Crist ke.
24 Ic tzaꞌn cye ocslal in xi cyniman Crist,
icxtzun cye xuꞌj tuꞌn t-xi cyniman cychmil tuj tcyakil.
25 Akeye chmilbaj,
cycꞌujlam cyxuꞌjile ic tzaꞌn te Crist ma che tcꞌujla cycyakil ocslal ex xi tkꞌon tib tuꞌn tcyim tuꞌn cyclet,
26 tuꞌntzun cyel tpaꞌn tuꞌn cyajben ocslal oꞌcx te Dios,
cybajlenxi txꞌjet tuꞌn tyol Dios;
ic tzaꞌn tuꞌn aꞌ otok che baj txꞌjet.
27 Tuꞌntzun cycub ten ke ocslal twitz Dios tbanilxix che queꞌyin,
mintiꞌ chꞌin tzꞌil cyiꞌj ex mintiꞌ chꞌin yuꞌch twitz cyxbalun ex mintiꞌ juntl mya baꞌn cyiꞌj,
nok oꞌcx tuꞌn cyajben oꞌcx te Dios ex mintiꞌ chꞌin cypaltil.
28 Ax icx ke chmilbaj cycꞌujlam cyxuꞌjil ic tzaꞌn in cycꞌujlaꞌn cyximlal.
Aju xjal in tcꞌujlaꞌn t-xuꞌjil in tcꞌujlan tib.
29 Porque mi jun xjal nneꞌl ticꞌun t-ximlal,
nok oꞌcx in tcꞌaꞌchan ex cwentin tuꞌn,
ic tzaꞌn in tbinchaꞌn Crist cye cycyakil ocslal.
30 Porque atzun atoꞌc tiꞌj t-ximlal Crist,
ex tiꞌj tchibjal ex tiꞌj tbakil.
31 Cyjaꞌtzun tten,
cyjel tkꞌoꞌn xinak tman ex ttxuꞌ,
ex cmojebil tucꞌil t-xuꞌjil ex che oquel cycabil te junx.
32 Aju yol lu maꞌ t-xilen,
mlay tzꞌel knicꞌ tiꞌj kuꞌnx kib;
aju yol in xi nmaꞌne in yolin tiꞌj Crist ex cyiꞌj cycyakil ocslal.
33 Cyjaꞌtzun tten teyle junjun cyeye,
cꞌujlam t-xuꞌjil ic tzaꞌn in tcꞌujlan tib,
ax icx te xuꞌj nimanx tchmil.