Ate Xewbaj Xjan mojbalte ke tuꞌn kten junx
4
Akine pres tuꞌn tlaj tbi Kajaw,
chin cubsale cywitze tuꞌn cybete tuj tumelxix,
porque ma che txconjtze tuꞌn Dios.
2 Cymansincu cyibe ex che oque mans;
ten cypasense ex tzicꞌxcu cyuꞌne cyxolxe,
ex cycꞌujlam cyibe.
3 Tzꞌoc tililx cyuꞌne cucx tuꞌn tten cymojbabl cyibe,
aju in tkꞌoꞌn Xewbaj Xjan,
porque cytzuylaj cyibe tuꞌnju cymojbabl cyibe.
4 Nok junx kximlal,
ex junx Xewbaj Xjan,
ex ma che txconjtze tuꞌn Dios tuꞌn toc keꞌ cycꞌuꞌje oꞌcx tiꞌj ju ctzajel tkꞌoꞌn cyeye.
5 Junx Kajaw,
junx kocslabl,
junx byabl ke.
6 Junx Dios ex Mambaj ke kcyakil;
ate Dios kibaj kcyakil,
ex in akꞌnan kxol kcyakil,
ex at tuj kanmi kcyakil.
7 Pero teyle junjun ke ma tzaj tkꞌoꞌn Dios t-xtalbil tuꞌn tten koclen ic tzaꞌnxju tzaj tmaloꞌn Crist.
8 Porque in tmaꞌn tuj Tuꞌjil:
Tej tjax tuj cyaꞌj,
xi tiꞌn txkan pres tucꞌil ex xi tkꞌoꞌn cyoclen xjal,
chi tuj Tuꞌjil.
9 Ex aju yol tej tjax,
¿ti in tmaꞌn?
Atzun in tmaꞌn,
nej otok cuꞌx aj tjakꞌxi txꞌotxꞌ.
10 Aju cuꞌx aj tjakꞌxi txꞌotxꞌ,
axtzunju ma jax,
max ma japun tibajxi cyaꞌj tuꞌn tten tuj tcyakil.
11 Ex ax Crist oc kꞌonte cyoclen ocslal tuꞌn cyoc junjun te apostl,
ex junjuntl tuꞌn cyoc te t-sanjel Dios,
ex junjuntl tuꞌn cyoc te pacbal tkanil colbil,
ex junjuntl tuꞌn cyoc te pastor ex xnakꞌtzal,
12 tuꞌntzun cyxnakꞌtzet-xix ke ocslal tuꞌn cyajben tuj akꞌuntl,
tuꞌn tchꞌiy ju Iglesi aju t-ximlal Crist.
13 Cyjaꞌtzun tuꞌn tmojeꞌ kocslabl junx,
ex junx tuꞌn kojtzkintexix Tcꞌwaꞌl Dios,
ex tuꞌn ttzꞌaket-xix knabl,
tuꞌntzun ttzꞌaket-xix kuꞌn ic tzaꞌn te Crist tzꞌaklxix.
14 Cyjaꞌtzun miꞌn ko oc ic tzaꞌn jun cꞌwaꞌl in meltzꞌajeꞌ tnabl,
ex miꞌn ko jaw sutin tuꞌnju xnakꞌtzbil in cykꞌoꞌn xjal ic tten ic tzaꞌn cykꞌikꞌ,
porque in che sbun ex in cymaꞌn yol xmeletzꞌ tuꞌn cyel tzpet xjal.
15 Atzun ke,
ko lpeꞌc tiꞌj ju yol axix toc tucꞌil kcꞌujlalil,
ko chꞌiy tuj tcyakil atoꞌc tiꞌj Crist,
porque atzun kwiꞌju.
16 Atzun ke t-ximlal Crist koꞌ,
ex tuꞌn Crist in chꞌiy t-ximlal ttzuylaj tib ex tmojban tib tuꞌn tyakmil,
ex cycyakil ateꞌc tiꞌj Crist in cyonin cyib cyxolx nok alcyex cyakꞌun,
ex in che chꞌiy tuꞌnju in cycꞌujlan cyib.
Aju acꞌaj kchwinklal tuꞌnju ocslal koꞌ tiꞌj Crist
17 Atzun jlu cxel nmaꞌne ex cxel ncyuwsaꞌne cyeye tuj tbi Kajaw:
Miꞌn che ankꞌintle ic tzaꞌn ke txkantl xjal mya ocslal ke in che ankꞌin tucꞌil cyximbetz nokx gan.
18 Tuj klolj taꞌ cynabl,
ex cypaꞌn cyib tiꞌj ju chwinklal in tkꞌoꞌn Dios,
porque mintiꞌ nneꞌl cynicꞌ tiꞌj,
tuꞌnju cyuw cyanmi.
19 Ex tuꞌnju mintiꞌtl nneꞌl cynicꞌ tiꞌj alcyeju baꞌn ex alcyeju mya baꞌn,
ma txi cykꞌon cyib tuj achbil,
tuꞌn cybinchante tcyakil ttzꞌilil aju in ponxix cycꞌuꞌj tiꞌj.
20 Atzun cyeye,
mya ic tten xnakꞌtzbil ma cycꞌame tiꞌj Crist,
21 porque ma cybiye tyol ex ma che xnakꞌtzanjtze tuꞌn,
ic tzaꞌnx ju yol axix toc at tucꞌil Jesús.
22 Cycotpiꞌmele cyiꞌje aju ojtxi cytene,
ex cykꞌoncje aju ojtxi cychwinklale,
porque aju ojtxi cytene niban tnaj tuꞌnju in pon tcꞌuꞌj tiꞌj nimcu ex in t-sbun tib.
23 Cyjaꞌtzun,
tzꞌocwit cyanmi te acꞌaj tucꞌix cynable,
24 ex cykꞌoꞌnque cyiꞌje aju acꞌaj cytene,
porque o che binchanjtze tuꞌn cyoque ic tzaꞌn tilbilal Dios,
tuꞌn cyoque tzꞌaklxix ex xjan tuꞌnju yol axix toc.
25 Cyjaꞌtzun,
cykꞌoncje aju nicꞌaj yol;
che yoline axix toc cyucꞌil mastl,
porque junx atoꞌc tiꞌj junx kximlal.
26 Ka ma tzaj cykꞌoje,
pero miꞌn cybinchaye il;
miꞌn txi cycꞌuꞌne kꞌoj ocxi tex kꞌij.
27 Ex miꞌn txi cykꞌoꞌne ambil te tajaw il.
28 Aju baꞌn tzꞌelkꞌan nej,
miꞌn tzꞌelkꞌantl,
nok oꞌcx tuꞌn takꞌnan tuꞌn tkꞌab tuꞌn tbinchante jun akꞌuntl tuj tumelxix,
tuꞌntzun tcnet aju in ajben te,
ex tuꞌn t-xi tkꞌoꞌn chꞌin teju atx taj te.
29 Miꞌn cymaye jun tcꞌayil yol,
nok oꞌcx tuꞌn cyyoline tiꞌj ju yol baꞌn,
tuꞌntzun toc cynabl mastl,
ex tuꞌn tajben te jun onbil te cye keju in che bin tiꞌj.
30 Miꞌn tzaj tbis Xewbaj Xjan cyuꞌne,
aju T-xew Dios,
porque ma tzꞌoc kꞌoꞌn jun sey cyiꞌje tuꞌn Xewbaj Xjan tuꞌn tkeꞌxix cycꞌuꞌje tiꞌj ju colpibl cyeye tuj tkꞌijlalil tzul.
31 Cycolincje kꞌoj,
miꞌn che jaw cyakpaje,
miꞌn tzaj tloꞌch cycꞌuꞌje,
miꞌn che jaw schꞌine tuꞌn cykꞌoje,
miꞌn che yasune,
miꞌn che ximane mya baꞌn tiꞌj juntl.
32 Aju mas baꞌn,
atwit cycꞌuꞌje cyiꞌje cyxolxe,
kꞌakꞌanx cycꞌuꞌje tiꞌj juntl,
cynajsame cyile cyxolxe ic tzaꞌn te Dios cub tnajsaꞌn cyile nok tuꞌn Crist.