Aju takꞌun Pablo tuꞌn t-xi tmaꞌn tkanil colbil cye xjal mya judiy ke
3
Tuꞌn tlaj jlu in chin naꞌne Dios cyiꞌje,
akine Pablo,
pres kine tuꞌn tlaj ocslal kine tiꞌj Jesucrist,
ex pres kine tuꞌn tlaj in chin ajbene cyxole,
akeye xjal mya judiy.
2 Porque malo cybiye tzaꞌn tten tzaj tkꞌoꞌn Dios t-xtalbil weye tuꞌn t-xi nkꞌoꞌne cyeye.
3 Wecuye tzaj tchicꞌbaꞌn Dios aju yol ewantok nej,
ic tzaꞌn cab ox yol xi ntzꞌibane cyeye nej.
4 Oc tjaw cyschꞌiꞌne aju uꞌj ma txi ntzꞌibane cyeye,
cꞌelel cynicꞌe tiꞌj tzaꞌn tten sel nnicꞌe tiꞌj tyol Crist ewantok nej.
5 Aju yol lu ewantok nej mintiꞌ tzaj yecꞌun cye xjal tuj tkꞌijlalil ojtxi,
pero jaꞌlo ma tzaj yecꞌun cye ke apostl xjan ex cye t-sanjel Dios tuꞌnju Xewbaj Xjan.
6 Atzun jlu ma tzaj yecꞌun:
Ke xjal mya judiy ma cycꞌam jun etzbil junx cyucꞌil xjal judiy,
ex ma che oc ten tiꞌj junx cyximlal,
ex tuꞌnju ocslal ke tiꞌj Jesucrist at cyoclen tiꞌj ju yol tzaj ttziyan Dios,
nok tuꞌnju ma txi cyniman tkanil colbil.
7 Nok tuꞌn t-xtalbil Dios ma tzaj kꞌoꞌn woclene tuꞌn woque ajbel tiꞌj tkanil colbil,
ma tzaj kꞌoꞌn jlu weye tuꞌn tipumal Dios.
8 Akine mas tal chꞌin cywitz cycyakil ocslal;
pero ma tzaj tkꞌoꞌn Dios t-xtalbil weye tuꞌn t-xi npacbaꞌne tkanil colbil cye xjal mya judiy,
aju tkanil lu in yolin tiꞌj tkꞌinumabl Crist mlay tzꞌel baj knicꞌ tiꞌj.
9 Ex ma tzaj tkꞌoꞌn Dios t-xtalbil weye tuꞌn t-xi nchicꞌbaꞌne cye cycyakil xjal tzaꞌn tten tuꞌn tjapun ju yol ewan tucꞌil Dios atxix tuj tabkꞌiyil ojtxi,
ate Dios o binchante tcyakil t-xe tnejel.
10 Atzun t-ximbetz Dios,
tuꞌntzun t-xi yecꞌun cye nejenel ex cye keju at cyoclen tuj cyaꞌj alcye tnabl Dios junxilchak tten cyiꞌj cycyakil ocslal,
tuꞌn tel cynicꞌ tiꞌj alcye tnabl Dios.
11 Cub t-ximan Dios jlu atxix ojtxi tuꞌn tjapun tuꞌn Kajaw Jesucrist.
12 Ex tuꞌn Crist ma keꞌ kcꞌuꞌj ex at tzokpibl ke tuꞌn kpon lakꞌeꞌ twitz Dios,
nok tuꞌn kocslabl tiꞌj Crist.
13 Cyjaꞌtzun chin cubsale cywitze tuꞌn miꞌn tbaj cycꞌuꞌje tuꞌnju in chin yajlanjtze tuꞌn cylaje,
porque aju nnicꞌx wuꞌne,
tuꞌn toc te jun tzalajbil cyeye.
Aju tcꞌujlalil Crist kiꞌj
14 Tuꞌntzun tlaj jlu in chin cub ẍmejeꞌye twitz Tman Kajaw Jesucrist.
15 Tiꞌj Tman Kajaw Jesucrist tzajni xeꞌt cybi cycyakil cꞌloj cyiyjil,
keju ateꞌ tuj cyaꞌj ex keju ateꞌ twitz txꞌotxꞌ.
16 In chin cubsane twitz Dios tuꞌn ttzaj tkꞌoꞌn nimxix t-xtalbil cyeye tiꞌj ju tkꞌinumabl chmoꞌn tuj cyaꞌj,
ex tuꞌn cycyuwsanjtze tuj cyanmiye ex tuꞌn ttzaj kꞌoꞌn cyipumale tuꞌn T-xew Dios.
17 In chin cubsane twitz tuꞌn tnajan Crist tuj cyanmiye nok tuꞌn cyocslable,
icwit tten cycꞌujlalile ic tzaꞌn jun tzeꞌ at tlocꞌ ex tawan tib,
18 tuꞌn telxix cynicꞌe tiꞌj cyucꞌix cycyakil ocslal,
tzaꞌn tten tcꞌujlalil Crist,
nicꞌpun twitz,
nicꞌpun tnukbil,
nicꞌpun t-xeꞌ ex nicꞌpun twaꞌl,
19 ex tuꞌn cyojtzkinteye tcꞌujlalil Crist,
tuꞌntzun tnojxix tuj cyanmiye tuꞌn Dios,
masque mlay tzꞌel baj knicꞌ tiꞌj tcyakil.
20 Ate Dios at tipumal tuꞌn tbinchante tcyakil.
At tipumal tuꞌn ttzaj tkꞌoꞌn mastl twitzju in xi kkanin ex twitzju in ko ximan tiꞌj.
Tcyakil jlu ctzajel tkꞌoꞌn porque in akꞌnan tipumal tuj kanmi.
21 Nimanxwit tbi Dios cyuꞌn cycyakil ocslal nok tuꞌn Jesucrist tuj tcyakil tabkꞌiyil te jumajx.
Icxwitju.