Ma ko clet tuꞌn t-xtalbil Dios
2
Akeye cyimni keye nej tuj twitz Dios tuꞌn tlaj cyile ex cybinchbene mya baꞌn,
atzun jaꞌlo ma tzaj tkꞌoꞌn Dios cychwinklale.
2 Nej cucx in cybinchaꞌne mya baꞌn,
in che oc lpeꞌye tiꞌj cymod xjal,
in xi cynimane tajaw il aju nejenel cye keju at cyipumal ateꞌ twitz cyaꞌj,
atzun xewbaj jlu aju in akꞌnan tuj cyanmi xjal miban che bin.
3 Cyxol keju miban che bin o ko ten kcyakil ojtxi,
junx kbinchben cyucꞌil,
o kbincha tajbil kchibjal,
ex o kbincha tajbil kximbetz,
ex tuꞌnju ktzajlenx mya baꞌn koꞌ,
cyjaꞌtzun at tkꞌoj Dios kiꞌj,
ic tzaꞌn cyiꞌj mastl xjal.
4 Pero ate Dios nimxix tkꞌakꞌbil tcꞌuꞌj,
ex nimxix tcꞌujlalil kiꞌj,
5 cyjaꞌtzun ma tzaj tkꞌoꞌn Dios kchwinklal junx tucꞌil Crist,
masque cyimnitok koꞌ nej tuꞌn tlaj kil.
Cyjaꞌtzun nok tuꞌn t-xtalbil Dios ma che clete.
6 Ex ma ko jaw ankꞌin tuꞌn Dios junx tucꞌil Crist,
ax icx ma ko cub tkꞌukbaꞌn tuj cyaꞌj junx tucꞌil,
7 tuꞌntzun ttzaj tyecꞌun tuj tabkꞌiyil tzul aju t-xtalbil nimxix ex tcꞌujlalil kiꞌj tuꞌn Jesucrist.
8 Porque ma che clete tuꞌn t-xtalbil Dios nok tuꞌn cyocslable.
Mya cyuꞌnxe ma che clete,
jun oyaj jlu ma tzaj tkꞌoꞌn Dios.
9 Mya tuꞌn cyakꞌunbene baꞌn ma che clete,
tuꞌntzun mi jun tuꞌn tjaw tniman tib.
10 Porque takꞌunben Dios koꞌ,
ex ma tzaj tkꞌoꞌn Dios kchwinklal acꞌaj tuꞌnju ocslal koꞌ tiꞌj Jesucrist,
tuꞌn kbinchante aju baꞌn;
ojtxi cub t-ximan Dios alcyeju baꞌn tuꞌn kbinchante.
Ma bant kten tucꞌil Dios nok tuꞌn Crist
11 Cyjaꞌtzun,
cynaꞌntze tzaꞌn cytene ojtxi,
akeye mya tiyjil xjal judiy keye.
Oc kꞌoꞌn cybiye mya sircunsidarin keye cyuꞌn ke xjal judiy,
keju toc cybi sircunsidarin ke,
tuꞌn tkꞌab xjal in bant ju sircunsisyón tiꞌj cychibjal.
12 Ojtxi mintiꞌ Crist cyucꞌile,
te junxitl tnam keye,
mintiꞌ cyoclene tiꞌj tnam Israel,
ex mintiꞌ cyoclene tiꞌj ju yol cyaj bant tiꞌj tuꞌn Dios cyucꞌil;
mintiꞌ jatum tuꞌn toc keꞌ cycꞌuꞌje,
ex ateꞌye twitz txꞌotxꞌ mintiꞌ Dios cyucꞌile.
13 Ojtxi najchak ateꞌye,
atzun jaꞌlo ma che ul lakꞌbaꞌne tuꞌn cytene nikayin ttxlaj Dios tuꞌn tchcꞌel Jesucrist,
tuꞌnju at cymojbabl cyibe tucꞌil.
14 Ate Crist mojbalte ke,
porque cabe tnam junx ma che oc tuꞌn,
tzaꞌnx ke xjal judiy ax icx ke xjal mya judiy,
aju peꞌn tcub cyxol cabe tnam tuꞌn miꞌn cymojbante cyib ma cub t-xitun Crist.
15 Tuꞌn tcyimlen Crist el ju icꞌbil cyxol,
porque el tiꞌn Crist aju ley tucꞌix mandamyent junxilchak tten,
tuꞌntzun cyoc cabe tnam te junx ex tuꞌn cyoc te acꞌaj,
tuꞌntzun tten cymojbabl cyib.
16 Ex tuꞌnju cyim Crist twitz crus,
junx ma bant cyten cycabil tnam tucꞌil Dios,
biꞌx naj kꞌoj cyxol tuꞌn Crist tej tcyim twitz crus.
17 Ultzun Crist,
xi tmaꞌn tkanil baꞌn cyeye,
akeye ateꞌye najchak nej,
ax icx xi tmaꞌn cye xjal judiy ateꞌ nikayin,
tuꞌntzun tten cymojbabl cyibe.
18 Porque nok tuꞌn Crist at koclen tuꞌn kocx kcabil twitz Kman Dios tuꞌn junx Xewbaj Xjan,
tzaꞌnx ke xjal judiy ax icx ke xjal mya judiy.
19 Cyjaꞌtzun mya stranjer xjal keye jaꞌlo,
ex mya betin xjal keye,
nok oꞌcx ma che oque cytanmil cyibe cyucꞌil cycyakil ocslal,
ex cyerman cyibe cyucꞌil ke tcꞌwaꞌl Dios.
20 Ic cytene ic tzaꞌn jun ja,
tcub keye tibaj jun simyent cub kꞌoꞌn cyuꞌn apostl ex cyuꞌn t-sanjel Dios,
ax Jesucrist ju xak te scyini te simyent.
21 Ttzuylaj tib ju ja tiꞌj Crist,
ex niban tjaw chꞌiy jun ja xjan tuꞌn toc te tja Dios,
nok tuꞌn Kajaw.
22 Ax icx cyeye,
tuꞌnju ocslal keye tiꞌj Crist,
niban cyjaw binchaꞌne junx cyucꞌil mastl tuꞌn cyoque te tnajbil Dios tuꞌn Xewbaj Xjan.