Tuꞌn koninte kib kxolx
6
Erman,
ka at jun cyxole ma cub tzꞌak tuj jun til,
cywaꞌbanctze juntl maj akeye at tipumal Xewbaj Xjan cyucꞌile,
tuj cheba cymanxe te.
Ten cycwente cyiꞌje,
mya yajcu icx cyeye che oque tuj joybil cyiꞌje.
2 Che onine tiꞌj cyikatz mastl,
cyjaꞌtzun tten tuꞌn tjapun tley Crist cyuꞌne.
3 Porque alcye in ximan tiꞌjx ka at toclen ex mintiꞌ toclen,
in cub t-sbun tib.
4 Teyle junjun tuꞌn ticꞌ twitz tiꞌj tex takꞌunben;
cyjaꞌtzun baꞌn tuꞌn ttzalaj tiꞌj takꞌunben ex mya tiꞌj takꞌunben juntl.
5 Porque teyle junjun tuꞌn t-xi tikan tex tikatz.
6 Aju in xnakꞌtzanjtz tiꞌj tyol Dios,
baꞌn tuꞌn t-xi tkꞌoꞌn chꞌin teju xnakꞌtzal te tiꞌj tcyakilju baꞌn at te.
7 Miꞌn che el tzpete tiꞌj:
Ate Dios mlay bant t-xmayinjtz,
porque alcyeju in cuꞌx tawaꞌn xjal,
axtzunju cjawil tchmoꞌn.
8 Porque aju xjal in tbinchaꞌn tajbil tchibjal,
cnajel tuꞌn tajbil tchibjal.
Atzunju in tbinchaꞌn tajbil Xewbaj Xjan,
ctel tchwinklal te jumajx tuꞌn Xewbaj Xjan;
ic tten jlu ic tzaꞌn jun awal in cuꞌx awet ex in jaw chmet twitz.
9 Cyjaꞌtzun miꞌn ko sict tuꞌn kbinchante aju baꞌn;
porque oc kcꞌmaꞌ t-xel oc tpon tkꞌijlalil,
ka mintiꞌ ma ko cub numj.
10 Cyjaꞌtzun tcyakil maj ka at tumel,
kbincham baꞌn cye cycyakil,
ex tnejelxix cye ke erman tuj ocslabl.
In xi tkꞌoꞌn Pablo cynabl ocslal ex in cheꞌx tkꞌolbeꞌn
11 Cyqueꞌyinxe ke nmak letr ma che cub ntzꞌibane cyeye,
tuꞌnx nkꞌabe ma cub ntzꞌibane.
12 Cycyakil keju nimxix cyajbil tiꞌj sircunsisyón,
atzun ke in che oc jwersin te cyeye tuꞌn cysircunsidarinjtze,
atzun cyajbil tuꞌn cyten baꞌn cyucꞌil xjal ex tuꞌn miꞌn cyyajlanjtz tuꞌn tlaj ju yol tiꞌj tcrus Crist.
13 Porque ax keju sircunsidarimaj ke mintiꞌ in japun ley cyuꞌn;
nok oꞌcx cyajbil tuꞌn cyoc jwersine cyuꞌn tuꞌn cysircunsidarinjtze,
tuꞌntzun tjaw cyniman cyib tuꞌnju otok che sircunsidarinjtze.
14 Pero weye mlay chin tzalaje tiꞌj juntl,
nok oꞌcx tuꞌn ntzalaje tiꞌj tcrus Kajaw Jesucrist,
porque tuꞌnju cyim Crist twitz crus,
ic tzaꞌn cyimni ma che oc cycyakil tiꞌxti at twitz txꞌotxꞌ tuj nwitze,
ax icx weye in nnaꞌne ic tzaꞌn cyimni ma chin oque tuj cywitz.
15 Porque nok tuꞌnju ocslal koꞌ tiꞌj Crist,
junx taꞌ ka sircunsidarimaj koꞌ ex ka mya sircunsidarimaj koꞌ;
aju mas il tiꞌj,
tuꞌn koc te acꞌaj.
16 Cycyakil keju in che bet ic tzaꞌnx in tmaꞌn ju yol lu,
atzun keju axix toc aj Israel ke ex etzan ke tuꞌn Dios;
tenwt cymojbabl cyib ex tzajxwit kꞌakꞌan tcꞌuꞌj Dios cyiꞌj.
17 Texju jaꞌlo cuchiwt mi jun tzꞌoc icꞌlen te weye porque toc techal cꞌixbleꞌn tiꞌj nximlale,
aju techal lu in tyecꞌun ka ax toc tmajen Kajaw Jesús kine.
18 Erman,
tenwt t-xtalbil Kajaw Jesucrist tuj cyanmiye.
Icxwitju.