2 Akine Pablo,

lu cxel nmaꞌne cyeye,

ka ma che sircunsidarinjtze,

mintiꞌxlo tajben Crist cyeye.

3 Cxel ncyuwsaꞌne juntl maj cyeye,

ka at jun xjal ma sircunsidarinjtz,

entons il tiꞌj tuꞌn tjapun tuꞌn tcyakilju in tmaꞌn tley Moisés.

4 Jumajx ma tzꞌel cypaꞌn cyibe tiꞌj Crist,

akeye cyajbile tuꞌn cyoque te tzꞌaklxix twitz Dios nok tuꞌnju in cybinchaꞌne aju in tmaꞌn ley;

ma tzꞌel cypaꞌn cyibe tiꞌj t-xtalbil Dios.

5 Porque akoꞌ nok tuꞌnju Xewbaj Xjan kꞌukl kcꞌuꞌj tiꞌj tuꞌn koc kꞌoꞌn te tzꞌaklxix tuꞌn Dios nok tuꞌn kocslabl.

6 Porque tuꞌnju ma ko oc mojbaꞌn tucꞌil Jesucrist,

junx taꞌ ka sircunsidarimaj koꞌ ex ka mya sircunsidarimaj koꞌ,

mintiꞌ toclen jlu.

Aju mas ilxix tiꞌj,

tuꞌn tten kocslabl in tyecꞌun tib tuꞌn kcꞌujlalil.

7 Nej in che bete baꞌn.

¿Alcyetzun ma makonte cyeye tuꞌn miꞌn t-xi cynimane aju yol axix toc?

8 Ma cub tiꞌj cynable pero cyuꞌn xjal,

mya tuꞌn Dios aju txconte cyeye.

9 Che ximane tiꞌj jlu:

Aju tkꞌotjil pan in jaw mal tcꞌuꞌj tcyakil nok tuꞌn chꞌin t-samel.

10 Tuꞌnju ocslal koꞌ tiꞌj Crist,

ma keꞌ ncꞌuꞌje cyiꞌje,

ctel cyximbetze ic tzaꞌn weye;

atzun teju xjal in xitunte cynable,

tzul tcastiw tuꞌn Dios,

nok alxcye.

11 Atzun weye erman,

nokwit cucx t-xi nmaꞌne tuꞌn tbant sircunsisyón,

myawtlo cucx nyajlanjtze cyuꞌn xjal judiy.

Nokwit cucx t-xi nmaꞌne tuꞌn tbant sircunsisyón,

mintiꞌwtlo in tzaj cykꞌoj xjal tiꞌj ju yol in xi nmaꞌne tiꞌj tcrus Crist.

12 Pero akeju in che xitunte cynable ka il tiꞌj sircunsisyón,

baꞌnwt tel cycaparin cyib.

13 Porque erman,

o che txconjtze tuꞌn cytene tzokpiꞌn keye;

pero mya tuꞌnju tzokpiꞌn keye tuꞌn cybinchanteye tajbil cychibjale,

nok oꞌcx tuꞌn cyajbene cyxolxe ex tuꞌn cycꞌujlante cyibe.

14 Porque tcyakilju in tmaꞌn tuj ley in japun tuꞌn junx yol lu:

Cycꞌujlame ke cyucꞌile ic tzaꞌnx cyeye in cycꞌujlan cyibe,

chi tuj ley.

15 Katzun ma tzꞌoc cytxꞌan cyibe cyxolxe,

ex ka ma baj cychyon cyibe ic tzaꞌn ke jil,

cykꞌonque cwent cyiꞌje,

mya yajcu jacu che naje cycyakile cyuꞌnx cyibe.

16 Cyjaꞌtzun in xi nmaꞌne:

Che bete ic tzaꞌn tajbil Xewbaj Xjan tuꞌntzun miꞌn t-xi cynimane aju tajbil cychibjale.

17 Porque aju tajbil kchibjal mintiꞌ in cub tuj twitz aju in tmaꞌn Xewbaj Xjan,

ax icx te Xewbaj Xjan mintiꞌ in cub tuj twitz aju tajbil kchibjal,

ex akeju cabe lu cyajkꞌoj cyib.

Cyjaꞌtzun mintiꞌ tumel tuꞌn cybinchanteye baꞌn aju cyajbile tuꞌn tbant.

18 Pero ka ẍakluꞌn keye tuꞌn Xewbaj Xjan,

myatzun ateꞌye tjakꞌ ley.

19 Kꞌanchaꞌlxix aju in cybinchaꞌn xjal in xi cyniman tajbil cychibjal.

Atzun jlu in cybinchaꞌn:

In cybinchaꞌn aj pajil,

in che yaẍin,

in cybinchaꞌn aju ttzꞌilil,

in che achin,

20 in che cꞌulun cywitz ke tilbilal,

aj cyꞌaꞌ ke,

cyajkꞌoj cyib,

in che kꞌojin,

nnoꞌc txꞌaꞌl tiꞌj cycꞌuꞌj tiꞌj juntl,

in che jaw cyakpaj,

in baj cyicꞌlen cyib,

in cub ten pabl tib cyxol,

ex in che oc lpeꞌ tiꞌj jun xnakꞌtzbil mya baꞌn.

21 In tzaj tloꞌch cycꞌuꞌj,

byol xjal ke,

cꞌal kꞌeꞌn ke,

in che achin tuj ninkꞌij,

ex at mastl in cybinchaꞌn ic tzaꞌn jlu.

Baꞌn tuꞌn cybinteye jlu:

Akeju cucx cybinchante tcyakil jlu,

mlay che ocx tuj tcawbil Dios,

ic tzaꞌn o txi nmaꞌne cyeye.

22 Atzunju in tkꞌoꞌn Xewbaj Xjan atzun jlu:

Tuꞌn tten kcꞌujlalil,

tuꞌn ktzalaj,

tuꞌn tten kmojbabl kib,

tuꞌn tten kpasens,

tuꞌn kbinchante xtalbil te juntl,

tuꞌn tten kbanil,

tuꞌn kweꞌxix tuj kocslabl,

23 tuꞌn koc mans,

ex tuꞌn kjacꞌunte kib.

Mintiꞌ jun ley mayolte ke tiꞌj jlu.

24 Ex akeju ocslal ke tiꞌj Crist,

o jaw cykꞌoꞌn twitz crus aju tajbil cychibjal tucꞌix ju cyachbil,

tucꞌix ju in pon cycꞌuꞌj tiꞌj.

25 Ka at kchwinklal tuꞌn Xewbaj Xjan,

ax icx ko bet ic tzaꞌnx in tmaꞌn Xewbaj Xjan.

26 Miꞌn jaw kniman kib.

Miꞌn tzꞌoc kicꞌlen kib kxolx.

Miꞌn tzaj tloꞌch kcꞌuꞌj tiꞌj juntl.