4
Cyjaꞌtzun in xi nmaꞌne:
Matok tal cꞌwaꞌlx ju etzal,
junx taꞌ ic tzaꞌn jun majen,
masque a tajaw tcyakil.
2 Porque toc tuj tcwent cwentil te ex tuj tcwent mayordom,
acutzun in japun tkꞌijlalil ic tzaꞌn kꞌmaꞌmaj tuꞌn mambaj.
3 Icx ke,
ic kten nej ic tzaꞌn ke cꞌwaꞌl,
atoꞌ tjakꞌ tcawbil cyxnakꞌtzbil xjal,
aju xnakꞌtzbil mya tzꞌakl.
4 Pero tej tjapun tkꞌijlalil,
tzaj t-samaꞌn Dios Tcꞌwaꞌl,
ul itzꞌj tiꞌj xuꞌj,
ex ul itzꞌj tjakꞌ tipumal tley Moisés,
5 tuꞌntzun kcolpet tuꞌn,
akoꞌ atoꞌ tjakꞌ ley,
tuꞌn kcꞌmonte koclen tuꞌn koc te tcꞌwaꞌl Dios.
6 Ex tuꞌnju tcꞌwaꞌl Dios keye,
cyjaꞌtzun ma tzaj t-samaꞌn Dios T-xew Tcꞌwaꞌl tuj cyanmiye;
ex aju Xewbaj at tuj cyanmiye in tmaꞌn te Kman Dios cyjaꞌ:
Tat,
chi.
7 Cyjaꞌtzun,
mya majentl keye,
tcꞌwaꞌl Dios keye:
ex tuꞌnju tcꞌwaꞌl Dios keye,
ax icx at cyoclene tiꞌj ju etzbil tzul tkꞌoꞌn Dios cyeye nok tuꞌn Crist.
In bisun Pablo cyiꞌj ocslal
8 Tuj tkꞌijlalil ojtxi mintiꞌ el cynicꞌe tiꞌj Dios,
ex in che ajbene cye keju dios mya ax toc Dios ke.
9 Atzun jaꞌlo ma tzꞌel cynicꞌe tiꞌj Dios,
ex ka a Dios ma tzꞌel tnicꞌ cyiꞌje,
¿tzaꞌntzun tten tuꞌn t-xi cybiꞌne juntl maj aju xnakꞌtzbil mintiꞌ tipun ex mintiꞌ tajben,
ex cyaje tuꞌn cyoque te majen tuꞌn cyajbene juntl maj te?
10 Cucx niman junjun kꞌij cyuꞌne,
tucꞌix junjun xjaw,
tucꞌix junjun tkꞌijlalil,
ex junjun abkꞌi.
11 Ma tzaj nbise cyiꞌje,
mya yajcu nokx gan ma chin akꞌnane cyxole.
12 Erman,
chin cubsale cywitze tuꞌn cyoque ic tzaꞌn kine,
porque weye o chin oque ic tzaꞌn cyeye.
Mintiꞌ jun mya baꞌn ma cybinchaye wiꞌje.
13 Porque baꞌn cyuꞌne,
xi npacbaꞌne tkanil colbil cyeye nej tuꞌn tlaj jun yabil tzaj wiꞌje.
14 Masque tzaj jun cybise tuꞌn nlaje,
tuꞌn tlaj yabil tiꞌj nximlale,
pero mintiꞌ in el cyicꞌune ex mintiꞌ in etz cylajoꞌne,
nok oꞌcx in cꞌmonjtze cyuꞌne mer ic tzaꞌn jun t-anjel Dios kine ex mer ic tzaꞌn Jesucrist kine tuj cywitze.
15 ¿Jatumtzun taꞌ cytzalajbile aju at wiꞌje nej?
Ax kine testiw cyiꞌje,
nokwit at tumel tuꞌn tbant cyuꞌne,
owtlo jatz cyiꞌne tbakꞌ cywitze tuꞌn ttzaj cykꞌoꞌne te weye.
16 Atzun jaꞌlo ¿tuꞌnpeju ma txi nmaꞌne ju yol ax toc cyeye,
ma chin oque te aj kꞌoj cyiꞌje?
17 At junjun xjal nim cygan cyiꞌje ex mejor che xmoxin,
pero mya baꞌn cyximbetz,
atzun cyajbil tuꞌn tel cypaꞌn cyibe kiꞌje,
tuꞌntzun cyoc lpeꞌye cyiꞌj.
18 Pwes baꞌn cucx tuꞌn tten cygan xjal cyiꞌje,
pero ka ax toc baꞌn cyximbetz,
ex ka cucx tuꞌn tten cygan cyiꞌje tcyakil maj,
mya nok oꞌcx ic tzaꞌn atine cyxole.
19 Akeye tal ncꞌwaꞌle,
ma tzaj juntl maj cꞌixcꞌoj wiꞌje tuꞌn cylaje,
ic tzaꞌn jun xuꞌj oc in ul itzꞌj tal,
nnoꞌc tilil wuꞌne tuꞌn cyoque ic tzaꞌn te Crist.
20 Wajbile tuꞌn ntene cyxole jaꞌlo ex tuꞌn nyoline tuj junxitl tumel;
porque mintiꞌ nneꞌl nnicꞌe tiꞌj alcye cbantel wuꞌne cyiꞌje.
Aju techal tiꞌj Sara ex tiꞌj Agar
21 Cymantze weye,
akeye cyajbile tuꞌn cytene tjakꞌ tley Moisés:
¿bajxpe cybiye ti in tmaꞌn ley?
22 Porque in tmaꞌn tuj Tuꞌjil,
ate Abraham tzaj cabe tcꞌwaꞌl;
jun tzaj tiꞌj Agar aju xuꞌj majen,
atzun juntl tzaj tiꞌj Sara aju mer t-xuꞌjil ex mya majen.
23 Pero aju cꞌwaꞌl tal ju xuꞌj majen itzꞌj ic tzaꞌn in che itzꞌj mastl cꞌwaꞌl,
atzunju cꞌwaꞌl tal ju xuꞌj mya majen,
itzꞌj nok tuꞌn tjapun aju yol tzaj ttziyan Dios te Abraham.
24 At jun nabl tiꞌj jlu.
Porque akeju cabe xuꞌj lu,
atzun in yolin tiꞌj cabe yol cyaj bant tiꞌj ojtxi.
Tnejel yol,
atzun tzaj kꞌoꞌn twi witz Sinaí,
in che oc xjal te majen tuꞌn cyitzꞌjlenx,
atzun in yolin jlu tiꞌj xuꞌj Agar.
25 Porque ate xuꞌj Agar,
atzun in yolin tiꞌj ju witz Sinaí tuj txꞌotxꞌ Arabia;
aju witz Sinaí junx taꞌ tucꞌil ju tnam Jerusalén at jaꞌlo,
porque aju tnam Jerusalén ma tzꞌoc te majen cyucꞌix cycyakil xjal najl ke tuj.
26 Atzunju tnam Jerusalén aju at tuj cyaꞌj,
atzun ktxuꞌ kcyakil,
ex mya majen.
27 Porque in tmaꞌn tuj Tuꞌjil:
Tzalajxa aya xuꞌj miban alina ex mintiꞌ jun tala ma tzul itzꞌj.
Schꞌina tuꞌn tzalajbil,
aya xuꞌj mintiꞌ ma tila cꞌixcꞌoj tuꞌn talina.
Porque aju xuꞌj o cyaj colin tuꞌn tchmil mas elaꞌ tal at twitz ju xuꞌj at tchmil,
chi tuj Tuꞌjil.
28 Cyjaꞌtzun erman,
icx ke ma ko oc tcꞌwaꞌl Dios tuꞌnju yol tzaj ttziyan Dios,
ic tzaꞌn te Isaac.
29 Pero icx in baj jaꞌlo ic tzaꞌn o baj ojtxi;
aju cꞌwaꞌlbaj o itzꞌj tuꞌn tipumal Xewbaj Xjan o yajlanjtz tuꞌnju cꞌwaꞌlbaj o itzꞌj tuꞌn tajbil xjal.
30 Pero ¿titzun in tmaꞌn tuj Tuꞌjil?
Ljoꞌmexa aju xuꞌj majen tucꞌix ju tal,
porque aju cꞌwaꞌl tal ju xuꞌj majen mintiꞌ toclen tiꞌj tetzbil tman,
nok oꞌcx aju cꞌwaꞌl tal ju xuꞌj mya majen at toclen tiꞌj etzbil,
chi tuj Tuꞌjil.
31 Cyjaꞌtzun erman,
mya tal ju xuꞌj majen koꞌ,
nok oꞌcx tal ju xuꞌj mya majen.