¿Alcye mas baꞌn, apeju ojtxi ley ex ka aju kocslabl?
3
Akeye erman aj Galasia mintiꞌ cynable.
¿Alcye ma tzꞌoc cyꞌaꞌn cyeye tuꞌn miꞌn t-xi cynimane aju yol axix toc?
Porque xi npacbaꞌne cyeye mer ic tzaꞌn tjaw Jesucrist twitz crus cyxole.
2 Oꞌcx waje tuꞌn nbinteye jlu cyeye:
Aju Xewbaj Xjan ma cycꞌame,
¿tuꞌnpeju in cybinchaꞌne aju in tmaꞌn tley Moisés,
ex ka tuꞌnju ma txi cyocslaꞌne tkanil colbil?
3 ¿Mintiꞌpetzun cynable?
Nej tzaj xeꞌt cyocslable tuꞌn tipumal Xewbaj Xjan.
¿Yajtzun jaꞌlo,
cyajpeye tuꞌn ttzꞌakset cyocslable tuꞌnx cybinchbene?
4 ¿Nokpetzun gan ma tzicꞌx nimcu cyuꞌne?
Cuchiwt mya nokx gan.
5 Ate Dios in tzaj kꞌonte Xewbaj Xjan cyeye,
ex in tbinchaꞌn tbinchben nim tipumal cyxole.
¿Tikuꞌn in tbinchaꞌn Dios jlu cyxole?
Mintiꞌ in tbinchaꞌn tuꞌnju in cybinchaꞌne aju in tmaꞌn tley Moisés,
nok oꞌcx tuꞌnju ma txi cyocslaꞌne tkanil colbil.
6 Ic tzaꞌn te Abraham xi tocslaꞌn tyol Dios,
ex cyjaꞌtzun oc kꞌoꞌn te tzꞌaklxix tuꞌn Dios,
7 cyjaꞌtzun tzꞌelx cynicꞌe tiꞌj,
akeju at cyocslabl,
atzun ke jlu tiyjil Abraham.
8 Ex kꞌmaꞌmaj tuj Tuꞌjil atxix ojtxi tuꞌn cyoc txkantl xjal te tzꞌaklxix tuꞌn Dios nok tuꞌn cyocslabl,
akeju mya judiy ke;
cyjaꞌtzun pacbanjtz tkanil baꞌn te Abraham atxix ojtxi:
Nok tiꞌja che cyꞌiwlanjtzel xjal cyuj cycyakil nasyon,
chi Dios.
9 Cyjaꞌtzun cycyakil keju in che ocslan,
che bel cyꞌiwlaꞌn junx tucꞌil Abraham aju ocslal.
10 Pero cycyakil keju kꞌukl cycꞌuꞌj tiꞌj tuꞌn cyclet tuꞌnju in cybinchaꞌn aju in tmaꞌn tley Moisés,
tcub cysentens porque in tmaꞌn tuj Tuꞌjil:
Cycyakil xjal akeju mintiꞌ in japun ley cyuꞌn,
aju tzꞌiban tuj Tuꞌjil,
ex mintiꞌ in cybinchaꞌn tcyakil,
tcub cysentens.
11 Cyjaꞌtzun,
chicꞌlxix taꞌ,
mi jun xjal jacu tzꞌoc te tzꞌaklxix twitz Dios tuꞌnju in tbinchaꞌn aju in tmaꞌn ley,
porque in tmaꞌn tuj Tuꞌjil:
Aju xjal tzꞌaklxix,
nok tuꞌn tocslabl cꞌankꞌil,
chi tuj Tuꞌjil.
12 Aju tley Moisés mya junx taꞌ tucꞌil ju ocslabl,
porque in tmaꞌn ley:
Aju xjal ma japun tcyakil jlu tuꞌn,
cꞌankꞌil tuꞌn.
13 Tuꞌn Crist ma ko etz tcolpiꞌn tjakꞌ ju sentens tcub tuꞌn ley,
porque ate Crist xi ikante ksentens;
porque in tmaꞌn tuj Tuꞌjil:
Aju xjal in jaw yobin tiꞌj jun tzeꞌ,
tcub t-sentens tuꞌn Dios,
chi tuj Tuꞌjil.
14 Xi tikan Crist ksentens tuꞌntzun tcanun tcyꞌiwbil Dios cyibaj ke xjal mya judiy,
akeju ocslal ke tiꞌj Jesucrist,
ic tzaꞌn tzaj ttziyan Dios te Abraham,
ex tuꞌn kcꞌmonte kcyakil aju Xewbaj Xjan,
aju tzaj ttziyan Dios ke,
nok tuꞌn kocslabl.
Mya junx taꞌ ju ojtxi ley tucꞌil ju yol tzaj ttziyan Dios te Abraham
15 Erman,
cxel nmaꞌne jun techal cyeye ic tzaꞌn in cybinchaꞌn xjal:
Ka at cabe xjal ma bant tiꞌj jun yol cyuꞌn,
masque cyex cye xjal cyyol,
pero mlay bant tuꞌn tcub xitj ex mlay bant tuꞌn tchꞌexpet tuꞌn toc juntl yol tiꞌj,
porque otok bant tiꞌj cyuꞌn.
16 Cyjaꞌtzun tzaj ttziyan Dios tyol te Abraham ex te tiyjil.
Mintiꞌ in tmaꞌn:
Cye tiyjila chiwt,
porque mintiꞌ in yolin tiꞌj nim tiyjil Abraham,
nok oꞌcx in yolin tiꞌj junx tiyjil.
Te tiyjila,
chi Tuꞌjil.
Ate Crist tiyjil Abraham.
17 Atzun jlu in xi nmaꞌne:
Aju yol cyaj bant tiꞌj tuꞌn Dios tucꞌil Abraham mlay bant tuꞌn tcub xitj tuꞌn tley Moisés,
ex mlay bant tuꞌn tel kꞌiꞌn tipun ju yol lu tuꞌn ley,
porque ate ley tzaj kꞌoꞌn te tibajxi,
otok baj 430 abkꞌi.
18 Porque nokwit tuꞌn tley Moisés tuꞌn ttzaj tkꞌoꞌn Dios aju ketzbil,
miwtlo tzaj ttziyan Dios tyol te Abraham ojtxi.
Pero jlu tzaj ttziyan Dios tyol te Abraham tuꞌn ttzaj tkꞌoꞌn tetzbil.
19 Entons ¿titzun tajben aju tley Moisés?
Pwes tzaj kꞌoꞌn te tibajxi yecꞌulte cyil xjal,
pero mya tuꞌn tten te jumajx,
nok oꞌcx tuꞌn tajben naꞌnxtok tul tiyjil Abraham.
Porque te tiyjil Abraham tzaj ttziyan Dios tyol;
pero tej ttzaj kꞌoꞌn aju ley,
mya ic tten,
porque tzaj tmaꞌn Dios cye anjel tuꞌn ttzaj cykꞌoꞌn aju ley te Moisés,
atzunte Moisés xi tkꞌoꞌn cye xjal.
20 Pero tej ttzaj ttziyan Dios tyol te Abraham,
mintiꞌ ajben juntl xjal tuꞌn Dios tuꞌn t-xi tmaꞌn te Abraham,
porque acute Dios o yolin.
¿Titzun tajben aju ojtxi ley?
21 ¿Atpetzun tkꞌoj tley Moisés tiꞌj ju yol tzaj ttziyan Dios nej?
Mintiꞌ.
Porque nokwit at tumel tuꞌn ttzaj kꞌoꞌn kchwinklal tuꞌn ley,
ax toc jacwitlo ko oc te tzꞌaklxix twitz Dios tuꞌnju in kbinchaꞌn aju in tmaꞌn ley.
22 Pero in tmaꞌn tuj Tuꞌjil,
cycyakil xjal pres ke tjakꞌ il.
Tuꞌntzun tlaj jlu ma tzaj tkꞌoꞌn Dios cye ocslal aju tziyimaj tuꞌn,
nok tuꞌnju at cyocslabl tiꞌj Jesucrist.
23 Pero naꞌnxtok tul Crist,
aju tuꞌn kocslan tiꞌj,
lamoꞌn koꞌ tjakꞌ ley,
lamoꞌn koꞌ in ko ayon tiꞌj jun ocslabl attok ttzajel yecꞌun.
24 Cyjaꞌtzun,
ate ley ic tten ic tzaꞌn jun majen cwentil cye tal cꞌwaꞌl.
Ate ley cwentil ke tuꞌn kpon tiꞌn tucꞌil Crist,
tuꞌntzun koc te tzꞌaklix twitz Dios nok tuꞌn kocslabl.
25 Pero tejtzun tul ju ocslabl,
mya il tiꞌj aju cwentil ke.
26 Porque cycyakile tcꞌwaꞌl Dios keye nok tuꞌn cyocslable tiꞌj Jesucrist.
27 Porque cycyakile,
akeye ma che byane tuꞌn cyoc mojbaꞌne tucꞌil Crist,
ma tzꞌoc cykꞌoꞌne Crist cyiꞌje ic tzaꞌn jun xbalun tuꞌn cyoque te acꞌaj.
28 Ya jaꞌlo junx taꞌ ju xjal judiy tucꞌil ju xjal grieg;
junx taꞌ ju xjal tzyuꞌn te majen tucꞌil ju xjal tzokpiꞌn;
junx taꞌ xinak tucꞌil ju xuꞌj;
porque cycyakile ma che oque te junx tiꞌj Jesucrist.
29 Katzun te Crist keye,
ax toc tiyjil Abraham keye,
ex at cyoclene tiꞌj etzbil,
ic tzaꞌnx tyol Dios tzaj ttziyan te Abraham.