Cꞌmet Pablo cyuꞌn mastl apostl
2
Tbajlenxitzun cyajlaj abkꞌi,
in jaxe juntl maj tuj Jerusalén tucꞌix Bernabé ex tucꞌix Tito xi wucꞌine.
2 A Dios tzaj yecꞌunte weye tuꞌn njaxe,
ex in yoline oꞌcx cyucꞌil keju at mas cyoclen cyxol ocslal.
Xi ntxꞌolbaꞌne cye aju tkanil colbil in xi npacbaꞌne cye xjal mya judiy,
tuꞌntzun nbinteye ka baꞌn wakꞌunbene tuj cywitz ex ka nokx gan.
3 Aju wucꞌile Tito,
masque grieg xjal,
pero mintiꞌ oc jwers tiꞌj tuꞌn t-sircunsidarinjtz,
4 masque at junjun erman xmletzꞌ ke o cyajbe tuꞌn t-sircunsidarinjtz Tito,
ocx cykꞌon cyib kxole tuj ewaj nok tuꞌn cybinte tiꞌj ju tzokpibl keye tuꞌn Jesucrist,
atzun cyximbetz tuꞌn ktene juntl maj tjakꞌ tley Moisés.
5 Pero mintiꞌ xi kcuyine tuꞌn ktene jun rat tjakꞌ cycawbil,
nok oꞌcx cub kximane cucx tuꞌn tten aju tkanil colbil cyucꞌile,
aju yol axix toc.
6 Ex akeju at cyoclen cyxol ocslal mintiꞌ jun yol acꞌaj tzaj cymaꞌn weye;
(masque at cyoclen cyxol ocslal,
pero mintiꞌ waje tiꞌj,
porque mintiꞌ in tqueꞌyin Dios ti t-xilen xjal).
7 Cyjaꞌtzun mintiꞌ jun yol acꞌaj tzaj cymaꞌn weye,
nok oꞌcx el cynicꞌ tiꞌj woclene tzaj tkꞌoꞌn Dios tuꞌn t-xi npacbaꞌne tkanil colbil cye xjal mya judiy,
ic tzaꞌn te Pedro tzaj kꞌoꞌn toclen tuꞌn t-xi tpacbaꞌn tkanil colbil cye xjal judiy.
8 Porque tuꞌn Dios oc kꞌoꞌn Pedro tuꞌn toc te apostl tuꞌn tajben cyxol xjal judiy,
ex tuꞌnx Dios in oc kꞌoꞌne te apostl tuꞌn wajbene cyxol xjal mya judiy.
9 Eltzun cynicꞌ Jacobo wiꞌje,
tucꞌix Pedro ex Juan el cynicꞌ tiꞌj tzaꞌn tten tzaj tkꞌoꞌn Dios woclene.
Ake jlu ic cyten ic tzaꞌn nejenel cyxol ocslal,
ex tzaj cykꞌoꞌn cykꞌab weye ex te Bernabé,
te jun yecꞌbil tuꞌn toc kucꞌin kibe cyucꞌil,
tuꞌn kxiꞌye akꞌnal cyxol xjal mya judiy,
atzun cye tuꞌn cyakꞌnan cyxol xjal judiy.
10 Nok oꞌcx tzaj cymaꞌn keye tuꞌn kximane cyiꞌj meba,
ax jlu ximan wuꞌne tuꞌn nbinchanteye.
Baj ilin Pedro tuꞌn Pablo tuj tnam Antioquiy
11 Tejtzun tpon Pedro tuj tnam Antioquiy in jaw tzokpaje tiꞌj,
oc nmaꞌne tibaj twitz porque at til.
12 Porque naꞌnxtok cypon junjun xjal tzajni ke tucꞌil Jacobo,
junx in waꞌn Pedro cyucꞌil ke xjal mya judiy;
tejtzun cypon ke xjal lu,
chebale el lakꞌeꞌ Pedro cyiꞌj xjal mya judiy ex mintiꞌ waꞌntl cyucꞌil,
porque in xob cywitz ke xjal nimanx ju sircunsisyón cyuꞌn.
13 Ax icx ke mastl ocslal judiy cub cymeltzꞌuꞌn cynabl ic tzaꞌn te Pedro;
cyjaꞌtzun tucꞌix te Bernabé cub tiꞌj tnabl cyuꞌn,
cub tmeltzꞌuꞌn tnabl.
14 Pero tej nlonteye mintiꞌ in che bet tuj tumel ic tzaꞌnx ju yol axix toc,
ic tzaꞌnx in tmaꞌn tkanil colbil,
xi nmaꞌne te Pedro cywitz cycyakil:
Aya judiy xjal,
pero in ankꞌina ic tzaꞌn ke xjal mya judiy,
ex ma cyaj tcolina cyley xjal judiy;
¿tzaꞌntzun tten nnoꞌc tkꞌoꞌna jwers cyiꞌj ke xjal mya judiy tuꞌn t-xi cyniman cyley xjal judiy?
Nchiye te.
Ke xjal judiy in che clet tuꞌn cyocslabl ic tzaꞌn ke mastl xjal
15 Akoꞌ judiy xjal koꞌ kitzꞌjlenx,
ex mya tzajni koꞌ cyxol xjal aj il ke,
akeju ateꞌ cyuj mastl nasyon.
16 Pero baꞌn kuꞌn,
mlay tzꞌoc jun xjal te tzꞌaklxix twitz Dios tuꞌnju in tbinchaꞌn aju in tmaꞌn tley Moisés,
nok oꞌcx cꞌoquel te tzꞌaklxix twitz Dios nok tuꞌn tocslabl tiꞌj Jesucrist.
Cyjaꞌtzun icx ke ma ko ocslan tiꞌj Jesucrist tuꞌntzun koc te tzꞌaklxix twitz Dios nok tuꞌn kocslabl tiꞌj Jesucrist,
ex mya tuꞌnju in kbinchaꞌn aju in tmaꞌn ley.
Porque mi jun xjal jacu tzꞌoc te tzꞌaklxix twitz Dios tuꞌnju in tbinchaꞌn aju in tmaꞌn ley.
17 Akekoꞌ judiy nnoꞌc tilil kuꞌn tuꞌn koc te tzꞌaklxix twitz Dios nok tuꞌn Crist,
ex tuꞌn jlu ma tzꞌel knicꞌ tiꞌj ax aj il koꞌ ic tzaꞌn ke txkantl xjal,
¿apetzun in tmaꞌn jlu ka tuꞌn Crist ma ko oc aj il?
Miꞌn.
18 Ka ma jaw nbinchaꞌne juntl maj aju otok cub nxitune nej,
at wile tiꞌj.
19 Porque tuꞌnxju ley ma chin cyime tuꞌn miꞌn ntentle tjakꞌ ley,
tuꞌntzun wankꞌine tucꞌil Dios ex tuꞌn wajbene te.
20 Junx ma chin jaw kꞌoꞌne tucꞌil Crist twitz crus,
ex mya wuꞌnx wibe in chin ankꞌine,
ate Crist najl tuj wanmiye ex in tzaj tkꞌoꞌn nchwinklale jaꞌlo,
tuꞌn wankꞌine twitz txꞌotxꞌ nok tuꞌn wocslable tiꞌj Tcꞌwaꞌl Dios in cꞌujlanjtze tuꞌn,
ex xi tkꞌon tib tuꞌn tcyim tuꞌntzun nclete.
21 Mlay tzꞌel wicꞌune aju t-xtalbil Dios;
porque nokwit at tumel tuꞌn koc te tzꞌaklxix twitz Dios nok tuꞌnju in kbinchaꞌn aju in tmaꞌn ley,
entons nokxlo gan cyim Crist.