In xi tkꞌoꞌn Pablo cynabl ocslal ex in cheꞌx tkꞌolbeꞌn
13
Atzun toxinmajiꞌn jlu tuꞌn nxiꞌye cyucꞌile.
Cbantel tiꞌj tcyakil ka ma che yolin cab ex ka ox testiw.
2 Tej nxi aje cyucꞌile tcabmajiꞌn,
at jun yol xi nmaꞌne cyeye,
ex jaꞌlo masque mi aꞌl kine cyucꞌile,
pero cxel nmaꞌne juntl maj cye keju o che binchan il ex cyeye cycyakile:
Ka ma chin pone juntl maj cyxole,
mlay ten npasense cyiꞌje.
3 Porque atzun cyajbile tuꞌn tel cynicꞌe wiꞌje ka tuꞌn Crist in chin yoline;
aju Crist at cyucꞌile,
mya mintiꞌwt tipun,
at tipun cyxole.
4 Masque mintiꞌ tipun Crist tej tjaw kꞌoꞌn twitz crus,
pero itzꞌx tuꞌn tipumal Dios;
icx keye atoꞌye tucꞌil Crist mintiꞌ kipune,
pero ko ankꞌile tucꞌil tuꞌn tipumal Dios tuꞌn kajbene cyxole.
5 Che ximane cyiꞌjxe ka waꞌl keꞌxe tuj cyocslable;
tzicꞌwit cywitze cyiꞌjxe.
¿Mintiꞌpe nneꞌl cynicꞌe tiꞌj ka at Jesucrist tuj cyanmiye?
Oꞌcxtzun ka mya ax toc ocslal keye,
mintiꞌtzun Crist tuj cyanmiye.
6 Cuchiwt tuꞌn tel cynicꞌe kiꞌje ka ax toc ocslal koꞌye.
7 In ko cubsane twitz Dios tuꞌn miꞌn cybinchanteye jun mya baꞌn;
myatzun oꞌcx kajbile tuꞌn kele baꞌn tuj cywitze,
atzun kajbile tuꞌn cybinchanteye aju baꞌn,
masque mya baꞌn ma ko ele tuj cywitze.
8 Porque mlay kbinchaye jun mya baꞌn tiꞌj ju yol axix toc,
nok oꞌcx in kcyuwsaꞌne ju yol axix toc.
9 Cyjaꞌtzun in ko tzalaje ka akoꞌye mintiꞌ kipune,
atzun cyeye at cyipune.
Ex in ko naꞌne Dios cyiꞌje tuꞌn ttzꞌaket-xix cynable.
10 Cyjaꞌtzun in xi ntzꞌibane jlu cyeye naꞌnxtok npone cyucꞌile,
tuꞌntzun miꞌn nyoline cyuw oc npone cyucꞌile ic tzaꞌnx woclene tzaj tkꞌoꞌn Kajaw,
tuꞌntzun cychꞌiye tuj cyocslable ex mya tuꞌn cycub numje.
11 Cyjaꞌtzun erman,
cylom cyibe,
tzꞌaket-xwit cynable,
cykꞌukbam cycꞌuꞌje,
junxwit cyximbetze,
tenwt cymojbabl cyibe.
Ex aju Dios kꞌolte kmojbabl kib ex at tcꞌujlalil,
ctel cyucꞌile.
12 Cykꞌolbem cyibe cyxolxe,
ex cytzꞌuban el cywitze tuꞌn tcyakil cycꞌujlalile.
13 In cheꞌx kꞌolbeꞌne cyuꞌn cycyakil ocslal.
14 Aju t-xtalbil Kajaw Jesucrist tenwt cyucꞌile,
tucꞌix tcꞌujlalil Dios,
ex tenwt cymojbabl cyibe cyxole tuꞌn Xewbaj Xjan.
Icxwitju.