Aju o tzaj yecꞌun te Pablo ic tzaꞌn tuj witzicꞌ
12
Ax toc mya tuj tumel tuꞌn tbaj nyolin wibe;
pero cxel nmaꞌne aju o wile ic tzaꞌn tuj witzicꞌ ex aju tzaj tyecꞌun Kajaw weye.
2 At jun xjal ojtzkiꞌn wuꞌne ocslal tiꞌj Crist,
ma bant-xi cyajlaj abkꞌi jaw jubchaꞌn,
xi kꞌiꞌn tuj toxin col cyaꞌj.
Mintiꞌ biꞌn wuꞌne ka tucꞌix t-ximlal xi kꞌiꞌn ex ka mya tucꞌix t-ximlal;
ate Dios ojtzkilte.
3 Ojtzkiꞌn ju xjal lu wuꞌne,
pero mintiꞌ baꞌn wuꞌne ka tucꞌix t-ximlal ex ka miꞌn tej t-xi kꞌiꞌn tuj cyaꞌj;
oꞌcx te Dios baꞌn tuꞌn.
4 Aju xjal lu jaw jubchaꞌn,
xiꞌ tuj cyaꞌj,
ex o tbi yol mlay bant tuꞌn kyolin tiꞌj,
mintiꞌ toclen jun xjal tuꞌn tyolin tiꞌj.
5 Tiꞌj ju xjal lu jacu chin tzalaje,
pero mlayx chin tzalaje wiꞌjxe,
nok oꞌcx jacu chin tzalaje tuꞌnju mintiꞌ wipune.
6 Nokwit waje tuꞌn tbaj nyolin wibe,
tuj tumelxix jlu porque jaculo txi nmaꞌne ax toc;
pero mlay baj nyolin wibe tuꞌntzun miꞌn cyximan xjal wiꞌje ka mas woclene,
oꞌcx tuꞌn cyximan wiꞌje tuꞌnju nnoꞌc cyqueꞌyin ex in cybiꞌn wiꞌje.
7 Ex tuꞌn miꞌn tjaw nnimanxix wibe tuꞌn tlaj ju tzaj tyecꞌun Dios weye maꞌxix toclen,
cyjaꞌtzun tzaj kꞌoꞌn jun cꞌixcꞌoj wiꞌje,
mer ic tzaꞌn jun chꞌiꞌx tuj nchibjale;
tuꞌn Satanás tzaj samaꞌn jlu tuꞌn ncꞌixbisanjtze tuꞌn,
tuꞌntzun miꞌn tjaw nnimanxix wibe.
8 Ox maj in cubsane twitz Kajaw tiꞌj jlu tuꞌn tel tiꞌn cꞌixcꞌoj wiꞌje.
9 Pero tzaj tmaꞌn Kajaw weye:
Acux aju nxtalbile ma txi nkꞌoꞌne teya;
porque ic tzaꞌn mintiꞌ tipuna,
mas in tzꞌaket tipumala wuꞌne,
chi Kajaw.
Cyjaꞌtzun mas in chin tzalaje tuꞌnju mintiꞌ wipune,
tuꞌntzun tcub ten tipumal Crist wibaje.
10 Cyjaꞌtzun in chin tzalaje tuꞌnju nnicꞌx wuꞌne tuꞌn tlaj tbi Crist;
in chin tzalaje ka mintiꞌ wipune,
ex ka ma chin oc yasoꞌne,
ex ka atx taj aju in ajben weye,
ex ka in chin yajlanjtze,
ex ka atine tuj bis;
porque ic tzaꞌn ka mintiꞌ wipune,
mas wipumale in tzaj tkꞌoꞌn Crist.
In bisun Pablo cyiꞌj ocslal tuj tnam Corint
11 Ma chin oque ic tzaꞌn mintiꞌ nnable tuꞌnju ma baj nyolin wibe;
pero akeye ma che oc jwersin weye tuꞌn tbaj nyolin wibe.
Porque akeye tuꞌn cyyolin baꞌn wiꞌje,
mya akine;
porque tuj tcyakil mya mas chꞌin woclene cywitz ke apostl ateꞌ cyxole maꞌ cyoclen tuj cywitz,
masque mintiꞌ woclene tuj cywitze.
12 Tuꞌnju wakꞌunbene cyxole jacu tzꞌel cynicꞌe wiꞌje ka ax toc apostl kine,
porque o ten nim npasense,
ex o che bant ke señ wuꞌne ex ke binchben nim cyipumal,
aju in che labin xjal tiꞌj.
13 ¿Tikuꞌn ma che oque mas chꞌin cyoclene cywitz ke mastl ocslal tuj junjun tnam?
¿Myape tuꞌnju mintiꞌ xi nkꞌoꞌne jun iktz cyibaje tuꞌn woc cycꞌaꞌchane?
Cynajsame wile tuꞌnju mintiꞌ xi nkanine onbil cyeye.
14 Lu ma bant ntene tuꞌn nxiꞌye toxinmajiꞌn cyucꞌile;
ex mlay cub nkꞌoꞌne jun iktz cyibaje.
Porque myatzun wajbile aju at cyeye,
oꞌcx akeye wajbile;
porque mya ake cye cꞌwaꞌlbaj che chmolte pwak tuꞌn t-xi cykꞌoꞌn te cyman,
nok oꞌcx ake mambaj che chmolte pwak tuꞌn t-xi cykꞌoꞌn cye cycꞌwaꞌl.
15 Tuꞌn tcyakil ncꞌuꞌje cbajel nnajsaꞌne aju at weye ex cbajel nsicsan wibe tuꞌntzun cychꞌiye tuj cyocslable,
masque nok chꞌin cycꞌujlalile wiꞌje,
atzun weye,
mas nim ncꞌujlalile cyiꞌje.
16 Ka ic ttenju mintiꞌ jun iktz cub nkꞌoꞌne cyibaje,
pero jawni chin xmoxine che chiye,
ex ma ko tzyete tuꞌn Pablo tuꞌn sbubl,
che chiye.
17 Baka ma che cub sbuꞌne cyuꞌn ke erman e jeꞌx nsamaꞌne cyucꞌile.
18 In cubsane twitz Tito tuꞌn t-xiꞌ cyucꞌile,
ex xi nsamaꞌne juntl erman tucꞌil.
¿Baka ma che cub sbuꞌne tuꞌn Tito?
¿Myapetzun junx kximbetze tucꞌil Tito?
¿Myapetzun junx in ko bete?
19 ¿Apetzun cyximbetze kiꞌje,
ka nok te kcolbil kibe in xi kmaꞌne jlu cyeye?
Miꞌn,
pero twitz Dios in ko yoline tuꞌnju ocslal koꞌye tiꞌj Crist.
Ex tcyakil jlu in kbinchaꞌne tuꞌn tchꞌiy cynable erman,
akeye at ncꞌuꞌje cyiꞌje.
20 Porque in chin bisune cyiꞌje;
oc npone cyucꞌile mya yajcu mya ic cytene ic tzaꞌn wajbile,
ax icx weye,
mya yajcu mya ic ntene ic tzaꞌn cyajbile.
In chin bisune cyiꞌje,
mya yajcu at kꞌoj cyxole,
ex ka at tloꞌch cycꞌuꞌje,
ex ka in che jaw cyakpaje,
ex ka at pabl tib cyxole,
ex ka in che siꞌmane yol tiꞌj juntl,
ex ka ẍtakꞌil yol keye,
ex ka jawni keye,
ex ka mya tuj ttxolil in che ajbene cyxolxe.
21 Ex in chin bisune tiꞌj,
oc npone juntl maj cyucꞌile mya yajcu tzaj nchꞌixwiye tuꞌn Dios tuꞌn cylaje,
ex mya yajcu chin jaw okꞌe cyiꞌj keju o che binchan il ex naꞌnx tajtz tiꞌj cyanmi tuꞌn tcyaj cykꞌoꞌn aju mya baꞌn in cybinchaꞌn,
in cybinchaꞌn aju ttzꞌilil,
in che yaẍin,
ex mintiꞌ in cyjacꞌun cyib.