In tmaꞌn Pablo cyiꞌj xjal mya ax toc apostl ke
11
Cuchiwt tuꞌn ticꞌx nyole cyuꞌne masque mya tuj tumel tuj cywitze.
Cybinchame xtalbil,
chin cybintze.
2 Porque at ncꞌuꞌje cyiꞌje ic tzaꞌn te Dios at tcꞌuꞌj cyiꞌje;
porque ma txi ntziyane tuꞌn cymojeꞌye tucꞌil junx cychmile aju Crist,
tuꞌntzun cypon wiꞌne tucꞌil ic tzaꞌn jun kꞌapoj mintiꞌ tpaltil.
3 Porque in chin bisune cyiꞌje,
mya yajcu ma tzꞌel txalpuj cynable ex mya toc cycꞌuꞌje tiꞌj Crist,
ic tzaꞌn te Eva cub sbuꞌn tuꞌn lobaj tuj xmoxbil.
4 Porque ka ma tzul jun xjal cyucꞌile in pacban tiꞌj junxitl Jesús,
mya aju ma txi kpacbaꞌne cyeye,
in xi cybiꞌne,
ex ka ma tzaj kꞌmaꞌn tuꞌn cycꞌmonteye junxitl xewbaj,
mya aju ma cycꞌame,
ex ka tuꞌn cycꞌmonteye junxitl tkanil,
mya aju tkanil colbil ma txi cyocslaꞌne,
jurat in xi cybiꞌne tyol xjal lu.
5 Tuj nnable mya mas chꞌin woclene cywitz ke apostl ateꞌ cyxole,
akeju maꞌxix cyoclen tuj cywitze.
6 Masque mya mejor chin yoline,
pero nneꞌl nnicꞌe tiꞌj tcyakil;
tcyakil maj in xi kyecꞌune jlu cyeye tiꞌj tcyakilju in kbinchaꞌne.
7 ¿Apetzun jun il jlu ma nbinchaye,
tuꞌnju cub nmansin wibe cyxole tuꞌn cyjaw nimsaꞌne,
ex tuꞌnju nok cucx xi npacbaꞌne cyeye aju tkanil colbil aju in tzaj tkꞌoꞌn Dios?
8 Ma ncꞌame twi ncꞌuꞌje tzaj cykꞌoꞌn ocslal cyuj mastl tnam,
mer ic tzaꞌn ma tzꞌel wiꞌne cypwak tuꞌn wajbene cyxole.
9 Tej ntene cyxole ex tej tcub baj aju at weye,
mintiꞌ xi nkꞌoꞌne akꞌuntl tibaj jun cyeye tuꞌn woc cꞌaꞌchane tuꞌn;
porque aju atx taj weye,
tzaj cykꞌoꞌn ke erman e tzaj tuj Macedonia.
Tuj tcyakil cub ncwentin wibe,
ex cucx cbel ncwentin wibe tuꞌn miꞌn tcub nkꞌoꞌne jun akꞌuntl cyibaje.
10 Tuꞌnju tyol Crist ax toc at wucꞌile,
mi jun xjal cmayolte weye tuꞌn ntzalaje tiꞌj jlu tuj txꞌotxꞌ Acaya.
11 ¿Tikuꞌn in chin yoline icju?
¿Tuꞌnpeloju mintiꞌ ncꞌujlalile cyiꞌje?
Ojtzkiꞌn tuꞌn Dios at ncꞌujlalile cyiꞌje.
12 Aju in nbinchaꞌne,
cucx oc nbinchaꞌye,
mlay txi nkꞌoꞌne ambil cye keju cyajbil tuꞌn cyyolin wiꞌje,
in jaw cyniman cyib,
in cymaꞌn ka ax cyoclen ic tzaꞌn weye.
13 Akeju xjal lu in cymaꞌn ka apostl ke,
pero nok tten cyuꞌn,
in cymaꞌn ka akꞌnal ke,
pero in che sbun,
nnoꞌc cykꞌon cyib te apostl te Crist.
14 Mlay ko labin tiꞌj jlu,
porque axte Satanás in baj tchꞌexpun tib,
nnoꞌc tkꞌon tib ic tzaꞌn jun anjel in koptzꞌaj.
15 Cyjaꞌtzun ax icx ke tmajen Satanás,
mlay ko labin cyiꞌj tuꞌnju in baj cychꞌexpun cyib nnoꞌc cykꞌon cyib tzꞌaklxix.
Pero aju bajsbil cye icx tten ic tzaꞌnxju cybinchben.
Nim icꞌx tuꞌn Pablo tuꞌnju apostl
16 Cxel nmaꞌne juntl maj cyeye:
Miꞌn chin oc cykꞌoꞌne mintiꞌ nnable;
pero ka mintiꞌ nnable tuj cywitze,
chin cycꞌmome ic tzaꞌn mintiꞌ nnable,
tuꞌntzun tbaj nyolin chꞌin wibe.
17 Aju cxel nmaꞌne mya tuꞌn tyol Kajaw cxel nmaꞌne.
Cxel nmaꞌne ic tzaꞌn mintiꞌ nnable,
tuꞌntzun tbaj nyolin wibe.
18 Nimcu xjal in baj cyyolin cyib tuꞌnju at cyoclen cyxol xjal,
ax icx weye cbajel nyolin wibe.
19 Porque in cymaꞌne ka at cynable,
ex in cub cybiꞌnxixe cyyol keju mintiꞌ cynabl.
20 Ka at jun xjal taj biꞌx tuꞌn cyoque te tmajen,
ex ka in baj tnajsaꞌn aju at cyeye,
ex ka nneꞌl tiꞌn aju at cyeye,
ex ka in jaw tniman tib,
ex ka nnoꞌc tzꞌajan cywitze tuꞌn,
atzunju baꞌn tuj cywitze.
21 In chin chꞌixwiye tuꞌn t-xi nmaꞌne jlu,
ic tzaꞌn keye mintiꞌ knimari kibe tuꞌn kbinchanteye tcyakil jlu.
Pero ka at jun mintiꞌ t-xobil tuꞌn tbaj tyolin tib,
icx weye mintiꞌ nxobile tuꞌn tbaj nyolin wibe,
masque mintiꞌ tnabl nyole.
22 ¿Maj ebrey xjal ke xjal lu?
Icx weye ebrey xjal kine.
¿Maj aj Israel ke?
Icx weye aj Israel kine.
¿Maj tiyjil Abraham ke?
Icx weye tiyjil Abraham kine.
23 ¿Maj ajbel ke te Crist?
Masque in chin yoline ic tzaꞌn jun xjal mintiꞌ tnabl,
pero cxel nmaꞌne,
weye mas in chin ajbene te Crist ic tzaꞌn cye.
Porque mas nim ma chin akꞌnane;
mas nim ma chin baj asyaline cywitz;
nimcu maj ma chin ocx kꞌoꞌne tuj pres;
nimcu maj ma tzꞌeljeꞌ wiꞌje tuꞌn ncyime.
24 Jweꞌ maj ma chin baj asyaline cyuꞌn xjal judiy,
nok jun asyal mintiꞌ o japun 40 asyal junjun maj.
25 Ox maj ma chin baj bjuꞌne tuꞌn tzeꞌ;
jun maj in oc xoꞌne tuꞌn abj;
ox maj chꞌixmi ẍin naje tuj tmij mar tej tnaj barc;
ex at jun maj enter jun konicꞌan ex jun kꞌij in tene tuj tmij mar.
26 Nimcu maj in chin bete;
nimcu maj eljeꞌ wiꞌje tuj nima;
nimcu maj eljeꞌ wiꞌje cyuꞌn elekꞌ;
nimcu maj eljeꞌ wiꞌje cyuꞌn nxjalile;
nimcu maj eljeꞌ wiꞌje cyuꞌn txkantl xjal cyuj mastl nasyon;
nimcu maj eljeꞌ wiꞌje cyuj tnam,
ax icx tuj lugar mintiꞌ cynajbil xjal tuj,
ax icx tuj mar,
ex nimcu maj eljeꞌ wiꞌje cyxol ke erman xmletzꞌ ke.
27 Nim ma chin akꞌnane ex nim ma chin sicte;
nimcu maj mintiꞌ in chin tane;
icꞌx weꞌyaj wuꞌne tucꞌix txketleꞌn;
nimcu maj cub nyoꞌne weꞌyaj;
icꞌx taꞌw cheꞌw wuꞌne,
ex at maj mintiꞌ nxbalune.
28 Ex at mastl icꞌx wuꞌne,
aju in tzaj wiꞌje junjun kꞌij,
in chin ximane cyiꞌj cycyakil ocslal tuj junjun tnam tzaꞌn ateꞌ,
mer ic tzaꞌn jun iktz jlu tcub wibaje.
29 Alcye jun in cub numj,
icx weye mer ic tzaꞌn in chin cub numje.
Alcye jun in cub tzꞌak jun erman tuꞌn,
in tzaj tloꞌch ncꞌuꞌje tiꞌj,
ex in chin bisune.
30 Ka il tiꞌj tuꞌn tbaj nyolin wibe,
cbajel nyolin wibe tuꞌnju mintiꞌ wipune.
31 Ojtzkiꞌn tuꞌn Dios mintiꞌ in chin nicꞌane yol.
Ate Dios Tman Kajaw Jesucrist baꞌn tuꞌn tnimanjtz tbi te jumajx.
32 Tej ntene tuj tnam Damasco at jun gobernador otok tzꞌoc kꞌoꞌn tuꞌn rey Aretas,
ate gobernador lu cub tkꞌoꞌn ke xkꞌukil tuj tnam Damasco tuꞌn ntzyete cyuꞌn;
33 pero in etze ttzi jun ventan twiꞌ ma tij muro,
in cuꞌtze tuj jun chiꞌl,
cyjaꞌtzun mintiꞌ in tzyete cyuꞌn.