Aju toclen Pablo te apostl
10
Akine Pablo,
ax kine chin cubsale cywitze tuꞌnju mans te Crist ex tbanilxix.
Ic tzaꞌn atine cyucꞌile mans kine,
pero ic tzaꞌn mi aꞌl kine cyucꞌile cyuw in chin yoline cyeye,
che chiye.
2 Cyjaꞌtzun chin cubsale cywitze,
oc npone cyxole cuchiwt mya il tiꞌj tuꞌn nyoline cyuw,
porque banin ntene tuꞌn cyoc wicꞌleꞌne keju in che yolin kiꞌje,
in cymaꞌn ka in kbinchaꞌne kexe kajbile,
ic tzaꞌn in cybinchaꞌn mastl xjal.
3 Masque xjal koꞌye ic tzaꞌn ke mastl xjal,
pero aju kꞌoj nnoꞌc kuꞌne mya ic tten ic tzaꞌn cye xjal.
4 Porque aju kmacbile in ajben tuj kꞌoj mya ic tzaꞌn cye xjal,
aju kmacbile at tipumal tuꞌn Dios tuꞌn tcub cyiꞌj keju at cyipumal ex aj kꞌoj ke tiꞌj Dios.
5 Cyjaꞌtzun,
ke xjal in che kꞌojl tiꞌj tyol Dios in che cub numeꞌ kuꞌne,
ex in cub xitj kuꞌne tcyakilju makbil in cub cykꞌoꞌn xjal tuꞌn miꞌn tel cynicꞌ mastl xjal tiꞌj Dios,
ex in cub tiꞌj cynabl xjal kuꞌne tuꞌn t-xi cyniman Crist,
6 ex banin ktene tuꞌn tcub kkꞌoꞌne cycastiw keju miban che niman,
ka cuyin cyuꞌne cycyakile tuꞌn t-xi cynimane kyole.
7 Cyeye oꞌcx toc cywitze tiꞌj tzaꞌn queꞌyin xjal.
Ka at jun kꞌukl tcꞌuꞌj tiꞌj ka te Crist,
ximanx tiꞌj jlu,
ic tzaꞌn te ma txi tkꞌon tib te Crist,
icx keye te Crist koꞌye.
8 Porque masque nim in chin yoline tiꞌj koclene tzaj tkꞌoꞌn Kajaw,
pero mlay chin chꞌixwiye,
porque aju koclene tzaj tkꞌoꞌn Kajaw tuꞌn toc mastl cynable,
mya tuꞌn tcub xitj cynable.
9 Miꞌn waje tuꞌn cyximane wiꞌje ka in che oc nsecꞌpuꞌne cyuꞌn ke uꞌj ma cheꞌx nsamaꞌne.
10 Porque at junjun in kꞌmante:
Aju uꞌj tuꞌn Pablo puro cyuw tyolbil,
atzun oc in ten kucꞌil mintiꞌxix tipun ex ju tyol mintiꞌ tajben,
che chi.
11 Aju xjal in kꞌmante jlu,
ximanx tiꞌj jlu,
aju ma txi nmaꞌne tuj uꞌj mi aꞌl kine cyucꞌile,
axju oc nbinchaꞌye oc npone cyucꞌile.
12 At tchi kiꞌje tuꞌn toc kkꞌon kibe junx cyucꞌil keju in baj cyyolin cyib,
ex mlay txi kmaꞌne ka junx koclene cyucꞌil.
Atzun ke jlu cyuꞌnx nnoꞌc cykꞌoꞌn cyoclen,
ex tuj cynabl ka oꞌcx ake baꞌn ke,
pero mintiꞌ cynabl.
13 Atzun keye mintiꞌ in ko icꞌe tibaj tuꞌn tbaj kyolin kibe,
oꞌcx tuꞌn kcanune jatum ma tzaj techan Dios keye,
tuꞌn kpon canune max cyucꞌile.
14 Mintiꞌ in ko exe tiꞌjxi aju ma tzaj techan Dios keye;
nokwit mya nej o pone cyxole,
entons jaculo cymaye ka nok kuꞌnxe ma ko exe tiꞌjxi,
pero akoꞌye o pon neje cyxole xi kpacbane tkanil baꞌn cyeye,
aju in yolin tiꞌj Crist.
15 Mintiꞌ ma ko ocxe tuj takꞌunben juntl tuꞌn t-xi kmaꞌne ka keye kakꞌunbene.
Atzun kajbile,
tuꞌn tchꞌiy kakꞌunbene cyxole ex tuꞌn tex lakꞌeꞌ tuꞌnju cyocslable in chꞌiy.
Oꞌcx kaje tuꞌn kakꞌnane jatum ma tzaj techan Dios keye.
16 Atzun kajbile,
tuꞌn t-xi kpacbaꞌne tkanil colbil cyuj mastl tnam tiꞌjxi jatum ateꞌye,
pero mya tuꞌn kocxe tuj takꞌunben juntl,
ex mya tuꞌn t-xi kmaꞌne ka keye kakꞌunben.