Aju oyaj xi kꞌoꞌn cye ocslal tuj Jerusalén
9
Mya il tiꞌj tuꞌn t-xi ntzꞌibane jun uꞌj cyeye tiꞌj ju onbil tuꞌn t-xi kꞌot cye ocslal.
2 Porque ojtzkiꞌn wuꞌne at cyganiye tuꞌn cykꞌonteye,
ex o chin tzalaje cyiꞌje cyxol keju ateꞌ tuj txꞌotxꞌ Macedonia,
xi nmaꞌne cye ka ma bant-xi jun abkꞌi banin cytene tuꞌn cykꞌonteye oyaj,
akeye ateꞌye tuj txꞌotxꞌ Acaya;
ex tuꞌnju at-xix cyganiye tiꞌj jlu,
ma tzꞌel cycanoꞌn mas nim ocslal cyxol keju ateꞌ tuj txꞌotxꞌ Macedonia.
3 Pero ma cheꞌx nsamaꞌne ke erman lu tuꞌntzun miꞌn tel kyole nokx gan,
aju xi kmaꞌne cyiꞌje.
Wajbile tuꞌn tbant naj cytene tuꞌn ttzaj cykꞌoꞌne cyoyaje ic tzaꞌn ma txi nmaꞌne cye,
4 mya yajcu cheꞌx wucꞌine junjun aj Macedonia,
ex mya banin cytene oc kpone.
Entons ctzajel kchꞌixwiye tuꞌnju otok keꞌ kcꞌuꞌje cyiꞌje,
icx cyeye mas jacu tzaj cychꞌixwiye.
5 Cyjaꞌtzun cub nximane ka il tiꞌj tuꞌn t-xi nmaꞌne cye erman tuꞌn cyxiꞌ nej nwitze tuꞌn cypon cyucꞌile,
ex tuꞌn tbaj chmet naj cyoyaje tzaj cytziyane ojtxi,
tuꞌntzun ttzaj cykꞌoꞌne ic tzaꞌn jun oyaj,
mya tuꞌn tel kẍcatune cyiꞌje.
6 Lu jun tumel cxel nmaꞌne cyeye:
Aju xjal nok chꞌin in cuꞌx tawaꞌn,
ax nok chꞌin cjawil tchmoꞌn;
atzunju xjal nim in cuꞌx tawaꞌn,
ax nim cjawil tchmoꞌn.
7 Teyle junjun kꞌonx jun oyaj ic tzaꞌn ma cub t-ximan tuj tanmi;
mya tucꞌil bis tuꞌn t-xi tkꞌoꞌn ex mya lajwers,
porque aju xjal in xi tkꞌoꞌn oyaj tucꞌil tzalajbil,
in tzalaj Dios tiꞌj.
8 Ate Dios at tipumal tuꞌn tkꞌonte nimcu t-xtalbil cyeye,
tuꞌntzun cucx tuꞌn tcanun cyeye tuj tcyakil ex tuꞌn t-sobryin cyeye,
tuꞌntzun cyonine tiꞌj tcyakil akꞌuntl baꞌn.
9 Ic tzaꞌn in tmaꞌn tuj Tuꞌjil:
Xi t-sipan cycotz ke meba.
Aju tten tzꞌaklxix,
cucx ctel te jumajx,
chi tuj Tuꞌjil.
10 Ate Dios in tzaj kꞌonte iyaj teju xjal in awan ex in tzaj tkꞌoꞌn wabj te twa,
ctzajel tkꞌoꞌn aju in ajben cyeye,
tuꞌn tchmet twitz cyawale tuꞌn,
ex ctzajel tkꞌoꞌn mas cyipumale tuꞌn cybinchanteye xtalbil cye nimcu xjal.
11 Cyjaꞌtzun tzul tkꞌoꞌn Dios nimcu cyeye,
tuꞌntzun tbant cykꞌonteye oyaj.
Ex aju oyaj cjawil kchmone cyxole,
cxel cykꞌoꞌn erman chjonte te Dios tiꞌj.
12 Porque tuꞌnju in xi cykꞌoꞌne ju oyaj lu cye erman,
mya nok oꞌcx in che onine tiꞌj ju atx taj cye,
ax icx nimcu erman in xi cykꞌoꞌn chjonte te Dios tiꞌj jlu.
13 Ex tuꞌnju cyajbeble lu cꞌelel cynicꞌ ocslal cyiꞌje,
ex cxel cykꞌoꞌn chjonte te Dios tuꞌnju ma txi cynimane tkanil baꞌn in yolin tiꞌj Crist.
Ex cxel cykꞌoꞌn chjonte te Dios cyiꞌje tuꞌnju oyaj cxel cykꞌoꞌne cye ex cye cycyakil.
14 Ax icx che naꞌl Dios cyiꞌje,
porque at cycꞌujlalil cyiꞌje,
tuꞌnju nimxix t-xtalbil Dios ma tzaj tkꞌoꞌn cyibaje.
15 Chjonte Dios tuꞌnju toyaj maꞌxix ma tzaj tkꞌoꞌn ke,
mintiꞌ in cnet yol kuꞌn tuꞌn t-xi kchicꞌbaꞌn,
tuꞌnju tbanilxix.