Tuꞌn t-xi kkꞌoꞌn jun oyaj tuꞌn tcyakil kcꞌuꞌj
8
Ax icx at juntl nyole erman,
wajbile tuꞌn cybinteye tiꞌj ju t-xtalbil Dios ma tzaj kꞌoꞌn cye ocslal tuj junjun tnam tuj txꞌotxꞌ Macedonia.
2 Masque ma tzaj jun joybil cyiꞌj tuꞌn cyyajlanjtz,
pero nimxix in che tzalaj;
cyjaꞌtzun,
masque meba xjal ke,
pero baꞌn che oyin,
mer ic tzaꞌn kꞌinun ke.
3 Akine testiw cyiꞌj,
xi cykꞌoꞌn jun oyaj tucꞌil tzalajbil,
xi cykꞌoꞌn nicꞌpun in cnet cyuꞌn,
ex xi cykꞌoꞌn chꞌintl tibaj.
4 Nimxix e cubsan kwitze tuꞌn t-xi kkꞌoꞌne ambil cye tuꞌn cyonin tiꞌj ju onbil cye ocslal.
5 O cybincha jlu mya ic tzaꞌn ximan kuꞌne,
nej xi cykꞌon cyib te Kajaw,
ax icx ma tzaj cykꞌon cyib tuꞌn cyakꞌnan junx kucꞌile nok tuꞌn tajbil Dios.
6 Cyjaꞌtzun xi kkꞌoꞌne tnabl Tito tuꞌn tjapun baj akꞌuntl tuꞌn cyxole,
aju o xeꞌt tuꞌn,
tuꞌn tbaj chmet cyoyaje.
7 Nimcu at cyucꞌile:
at cyocslable,
baꞌn che yoline,
at cynable,
toc cycꞌuꞌje tiꞌj tcyakil,
ex at cycꞌujlalile kiꞌje;
tuꞌnju at tcyakil jlu cyucꞌile,
ax icx tzꞌoc tililx cyuꞌne tuꞌn cykꞌonteye cyoyaje.
8 In xi nmaꞌne jlu cyeye,
pero mya mandaril kine cyiꞌje;
nok oꞌcx waje tuꞌn tel nnicꞌe tiꞌj ka ax toc cycꞌujlalile,
cyjaꞌtzun in tzaj nnaꞌne cyiꞌj txkantl ocslal tocxix cycꞌuꞌj tiꞌj tuꞌn cykꞌonte cyoyaj.
9 Porque ma tzꞌel cynicꞌe tiꞌj t-xtalbil Kajaw Jesucrist;
masque kꞌinuntok nej,
pero oc te meba xjal nok tuꞌnju at tcꞌujlalil cyiꞌje,
oc te meba xjal tuꞌntzun cyoque te kꞌinun tuꞌn.
10 Cxel nkꞌoꞌne jun cynable tiꞌj jlu,
porque baꞌn jlu te cyeye.
Ma bant jun abkꞌi t-xeꞌtlen cyuꞌne tuꞌn cykꞌonteye oyaj,
ax icx nim cyganiye tuꞌn cykꞌonteye.
11 Jaꞌlotzun japunx cyuꞌne;
ic tzaꞌn nej nim cyganiye tuꞌn cykꞌonteye oyaj,
ax icxtzun jaꞌlo tuꞌn tten cyganiye tuꞌn tjapun cyuꞌne tuꞌn t-xi cykꞌoꞌne nok nicꞌpun at cyucꞌile.
12 Porque ka tajbil jun xjal tuꞌn t-xi tkꞌoꞌn toyaj,
ccꞌmetel toyaj tuꞌn Dios nok nicꞌpun at tucꞌil,
mlay tzaj tkanin Dios tuꞌn t-xi tkꞌoꞌn aju mintiꞌ at tucꞌil.
13 Mintiꞌ ma txi nmaꞌne jlu tuꞌn cyten txkantl tuj txubtxaj,
atzun cyeye tuꞌn cytene tjakꞌ iktz.
14 Nok oꞌcx waje tuꞌn tel junx,
tuꞌn tcanun aju at tajben cyeye ax icx cye;
porque jaꞌlo nim at cyeye,
baꞌn tuꞌn t-xi cykꞌoꞌne chꞌin onbil cye,
tuꞌn tcanun aju in ajben cye;
te yajxi balo oc chmetel cye,
ctzajeltzun cykꞌoꞌn chꞌin onbil cyeye,
tuꞌn tcanun aju in ajben cyeye,
tuꞌntzun tel junx,
15 ic tzaꞌn in tmaꞌn tuj Tuꞌjil:
Akeju jaw cychmoꞌn nim,
mintiꞌ sobryin cye;
ex akeju jaw cychmoꞌn nok chꞌin,
acux o canun cye,
chi tuj Tuꞌjil.
Xi samaꞌn Tito cyucꞌix ke tucꞌil tuꞌn cyxiꞌ tuj Corint
16 Chjonte te Dios o yolin tuj tanmi Tito tuꞌn tten tcꞌujlalil cyiꞌje,
ic tzaꞌn keye.
17 Ax toc cub tuj twitz Tito aju yol xi nmaꞌne te,
tuꞌn t-xiꞌ visitarilte cyeye,
pero ax icx te tuꞌn tex tajbil nim tgan tuꞌn t-xiꞌ cyucꞌile.
18 Ex at juntl erman cxel ksamaꞌne tucꞌil Tito;
cycyakil ocslal tuj junjun lugar in che yolin baꞌn tiꞌj erman lu tuꞌnju nim in akꞌnan tuꞌn tpacbet tkanil colbil.
19 Ax icx ma jaw scꞌet erman lu cyuꞌn ocslal tuj junjun lugar tuꞌn t-xiꞌ kucꞌile tuj kbeye onil kucꞌile,
tuꞌn t-xi kꞌit aju oyaj lu;
nnoꞌc tilil kuꞌne tiꞌj jlu tuꞌn tjaw nimsaꞌn tbi Kajaw ex tuꞌn tel nicꞌbaj kiꞌje,
ka at kganiye tuꞌn kajbene.
20 Atzun kajbile,
tuꞌn miꞌn tyolin jun erman kiꞌje,
ka at chꞌin ma cub knajsaꞌne tiꞌj ju oyaj lu nimxix ma tzaj kꞌoꞌn tuj kcwente.
21 Nnoꞌc tilil kuꞌne tuꞌn kbinchanteye tcyakil tuj tumelxix,
mya nok oꞌcx twitz Kajaw,
ax icx cywitz xjal.
22 Ax icx cxel ksamaꞌne juntl erman cyucꞌil Tito;
aju erman lu ma kile nimcu maj,
at t-secꞌal tuꞌn tajben tuj tcyakil,
ax icx jaꞌlo mas at t-secꞌal porque kꞌuklxix tcꞌuꞌj cyiꞌje.
23 Ka at jun taj tuꞌn tbinte tiꞌj Tito,
ate Tito wucꞌile ex in akꞌnan junx wucꞌile tuꞌn kajbene cyeye.
Ex ka at jun taj tuꞌn tbinte cyiꞌj cabtl kerman,
ake erman lu sanjel ke,
ma che tzaj samaꞌn cyuꞌn ocslal tuj junjun lugar,
ex in jaw nimsaꞌn tbi Crist cyuꞌn.
24 Cycꞌujlamtzune ke erman lu tuꞌntzun toc cyqueꞌyin cycyakil ocslal tuj junjun lugar,
tuꞌntzun tel cynicꞌ tiꞌj ka at cycꞌujlalile cyiꞌj erman lu,
ex tuꞌn tel cynicꞌ erman lu tiꞌj ka ax toc ju yol xi kmaꞌne cyiꞌje,
ka mejor ocslal keye.