7
Akeye erman at ncꞌuꞌje cyiꞌje,
atzunju yol lu tzaj ttziyan Dios ke.
Cyjaꞌtzun ktxꞌjoꞌmel tcyakilju in tzꞌilsante kchibjal ex in tzꞌilsante kanmi;
ex atwit tchi Dios tuj kwitz ex tuꞌn t-xi kkꞌon kib te Dios tuꞌn kajben oꞌcx te te jumajx.
Ajtz tiꞌj cyanmi aj Corint
2 Cybinchame xtalbil,
cykꞌontze ambil keye tuꞌn kyoline cyucꞌile.
Mi jun xjal ma kbinchaye mya baꞌn tiꞌj,
mi jun xjal ma tzꞌel txalpuj kuꞌne,
mi jun xjal ma cub ksbuꞌne.
3 Mintiꞌ ma txi nmaꞌne jlu cyeye tuꞌn woc tene ilil cyiꞌje;
porque ojtxi txi nmaꞌne cyeye,
nim ncꞌujlalile cyiꞌje,
ka tuꞌn kcyim,
junx tuꞌn kcyim,
ex ka tuꞌn kankꞌin,
junx tuꞌn kankꞌin.
4 Nimxix in keꞌ ncꞌuꞌje cyiꞌje,
ex nim in chin tzalaje cyiꞌje;
ma kꞌukbanjtzxix ncꞌuꞌje;
ex mas nim in chin tzalaje tuj tcyakil yajbil keye.
5 Porque tej ktene tuj Macedonia mintiꞌ o ko ojlan chꞌine,
nok oꞌcx tichak yajbil keye tzaj;
jun,
in che kꞌojin xjal kiꞌje,
ex juntl,
tzaj kxobile tuj kanmiye.
6 Pero ate Dios in kꞌukbante cycꞌuꞌj keju in che bisun,
ex o kꞌukbanjtz kcꞌuꞌje tuꞌn,
tuꞌnju ul Tito.
7 Mya nok oꞌcx kꞌukbanjtz kcꞌuꞌje tuꞌnju ul Tito,
ax icx tuꞌnju otok kꞌukbanjtz tcꞌuꞌj Tito cyuꞌne.
Tzaj tmaꞌn Tito keye nim cyganiye kiꞌje ex tzaꞌn tten tzaj cybise tuꞌn tlaj ju mya baꞌn tzaj cyxole,
ex at cycꞌuꞌje wiꞌje;
cyjaꞌtzun mas in chin tzalaje.
8 Porque masque tzaj cybise wuꞌne tuꞌnju uꞌj xi nsamaꞌne cyeye,
pero mintiꞌ in chin bisune jaꞌlo tuꞌn jlu;
balo tzaj chꞌin nbise tiꞌj nej,
porque ma wile tzaj cybise tuꞌnju uꞌj xi nsamaꞌne cyeye,
masque nok te cab kꞌij e bisune.
9 Pero jaꞌlo in chin tzalaje;
myatzun tiꞌj ju cybise tzaj in chin tzalaje,
nok oꞌcx in chin tzalaje tuꞌnju tzaj cybise tuꞌn tajtz tiꞌj cyanmiye;
porque tzaj cybise ic tzaꞌnx tajbil Dios,
cyjaꞌtzun mintiꞌ jun mya baꞌn ma kbinchaye cyeye.
10 Porque aju kbis in tzaj ic tzaꞌnx tajbil Dios in ajtz tiꞌj kanmi tuꞌn tuꞌn kclet,
ex mlay tzajtl kbis tiꞌj;
atzun cye xjal cybis,
in tzaj camic tuꞌn.
11 Che ximane tiꞌj,
aju cybise tzaj ic tzaꞌnx tajbil Dios nim ma tzꞌajben;
porque tuꞌn jlu ma tzꞌoc tilil cyuꞌne tuꞌn tbant tiꞌj ju mya baꞌn tzaj cyxole,
ex cyjaꞌtzun ma che cyaj tene mintiꞌ cyile,
tzaj cykꞌoje tiꞌj ju o baj cyxole,
tzaj cyxobile,
tzaj nim cyganiye tuꞌn cylonteye nwitze,
at cycꞌuꞌje kiꞌje,
ex cub cykꞌoꞌne tcastiw ju xjal o binchan il.
Tcyakil jlu bant tiꞌj cyuꞌne mintiꞌtl cyile tiꞌj.
12 Cyjaꞌtzun,
aju uꞌj xi ntzꞌibane,
mya tuꞌn tlaj ju xjal binchante ju mya baꞌn,
ex mya tuꞌn tlaj ju xjal o binchanjtz mya baꞌn tiꞌj,
nok oꞌcx xi ntzꞌibane tuꞌn tel cynicꞌe tiꞌj ka nim cyganiye kiꞌje twitz Dios.
13 Cyjaꞌtzun ma keꞌ kcꞌuꞌje tuꞌnju ma kꞌukbanjtz cycꞌuꞌje.
Pero mas nimxix in ko tzalaje tuꞌnju in tzalaj Tito;
porque ma kꞌukbanjtz tcꞌuꞌj Tito cyuꞌne cycyakile.
14 Aju o txi nmaꞌne te Tito ka mejor ocslal keye,
ax toc,
mintiꞌ ma tzaj nchꞌixwiye tuꞌn,
tcyakilju ma txi kmaꞌne cyeye ax toc;
ax icx ju yol xi kmaꞌne te Tito ka mejor ocslal keye,
ma tzꞌel ax toc.
15 Ex mas in tenxix tcꞌujlalil Tito cyiꞌje oc in tzaj tnaꞌn tzaꞌn tten xi cynimane tyol cycyakile,
ex oc in tzaj tnaꞌn tzaꞌn tten cꞌmet cyuꞌne at tchiylal tuj cywitze.
16 In chin tzalaje,
porque tuj tcyakil ma keꞌ ncꞌuꞌje cyiꞌje.