6
In ko akꞌnane junx tucꞌil Dios,
cyjaꞌtzun in ko cubsane cywitze tuꞌn miꞌn cycꞌmonteye t-xtalbil Dios nokx gan.
2 Porque in tmaꞌn Dios tuj Tuꞌjil:
Ma nbiye tyola ex ma tzul tkꞌijlalil tuꞌn t-xi nkꞌoꞌne nxtalbile teya,
ma tzul canun aju tkꞌijlalil colbil ex chin onile tiꞌja,
chi tuj Tuꞌjil.
Jaꞌlo tkꞌijlalil xtalbil;
jaꞌlo tkꞌijlalil colbil.
3 Mintiꞌ in cub kkꞌoꞌne tolsabl cywitz xjal tuꞌntzun miꞌn cyyolin xjal mya baꞌn tiꞌj kakꞌunbene.
4 Nnoꞌc tilil kuꞌne tuꞌn kele baꞌn tuj tcyakil,
porque ajbel koꞌye te Dios,
nim nnicꞌx kuꞌne,
pero tuj tcyakil at nim kpasense;
at maj in ko yajlanjtze,
at maj mintiꞌ in canun aju in ajben keye,
at maj in ko tzyete tuꞌn bis;
5 at maj in ko baj asyaline,
at maj in ko ocx kꞌoꞌne tuj pres,
at maj in che jaw tilj xjal kiꞌje,
nim in ko akꞌnane,
at maj mintiꞌ in ko tane ex at maj nnicꞌx weꞌyaj kuꞌne.
6 Tuj tcyakil nnoꞌc tilil kuꞌne tuꞌn kele baꞌn,
tuꞌnju kanmiye sak,
tuꞌnju at knable,
tuꞌnju at kpasense,
tuꞌnju at kbanile,
tuꞌnju at Xewbaj Xjan kucꞌile,
tuꞌnju at kcꞌujlalile axix toc,
7 tuꞌnju axix toc ju yol in xi kmaꞌne,
tuꞌnju at tipumal Dios kucꞌile,
ex tuꞌnju in ko bete tuj tumelxix;
ic tten jlu ic tzaꞌn jun kꞌojbil tuj kbankꞌabe ex tuj knayaje tuꞌn kclete.
8 At maj in ko nimanjtze cyuꞌn xjal ex at maj mintiꞌ in ko nimanjtze,
at maj in che yolin xjal baꞌn kiꞌje ex at maj in che yolin mya baꞌn kiꞌje;
in ko oc kꞌoꞌne nicꞌal yol,
pero ax toc kyole.
9 Mer ic tzaꞌn mintiꞌ ojtzkiꞌn kwitze cyuꞌn xjal,
pero ojtzkiꞌnxix kwitze cyuꞌn;
mer ic tzaꞌn chꞌix kcyime,
pero itzꞌx koꞌye;
in ko cꞌixbisanjtze,
pero mintiꞌ in ko cyime.
10 At nim kbise,
pero cucx in ko tzalaje;
meba xjal koꞌye,
pero nim xjal in che oc kꞌinun kuꞌne;
misicyer chꞌin at keye,
pero tcyakil at keye.
11 Clarxix in chin yoline cyucꞌile,
akeye aj Corint,
nimxix kcꞌujlalile cyiꞌje.
12 Keye at kcꞌujlalile cyiꞌje,
atzun cyeye mintiꞌ cycꞌujlalile kiꞌje.
13 In chin cubsane cywitze ic tzaꞌn jun mambaj in cubsan cywitz tcꞌwaꞌl,
ic tzaꞌn weye at ncꞌujlalile cyiꞌje,
ax icx cyeye atwit cycꞌujlalile wiꞌje.
Tja Dios koꞌ, aju Dios itzꞌ
14 Miꞌn tzꞌoc cymojban cyibe cyucꞌil ke mya ocslal,
porque mya ax cynable ic tzaꞌn cye.
Porque baka cyucꞌin cyib keju tzꞌaklxix cyucꞌil keju mya tzꞌaklxix.
Ex baka at tmojbabl tib spicꞌun tucꞌil klolj.
15 Ex baka mojl tyol Crist tucꞌil tyol tajaw il.
Ex baka at toclen ocslal tucꞌil ju mya ocslal.
16 Ex baka junx tten tja Dios cyucꞌil ke tilbilal.
Porque akeye tja Dios,
aju Dios itzꞌ,
ic tzaꞌn o tma Dios chi cyjaꞌ:
Ax chin najale cyxol ex chin betele cyxol;
ex chin oquele te Cydios,
atzun cye che oquel te jun tnam etzan wuꞌne,
chi tuj Tuꞌjil.
17 Cyjaꞌtzun ax icx in tmaꞌn;
Cyetze cyxol ex cypaꞌmil cyibe cyiꞌj,
chi Kman;
ex miꞌn tzꞌoc cymacoꞌne aju ttzꞌilil.
Octzun che cꞌmetele wuꞌne.
18 Chin oquele te Cymane,
atzun cyeye che oquele te ncyꞌajale ex te nmeꞌjele,
chi Kman aju at tipumal tuꞌn bant tcyakil tuꞌn,
chi tuj Tuꞌjil.