5
Porque baꞌn kuꞌn,
aju kximlal ic tten ic tzaꞌn jun tal ja,
ka ma cub xitj aju kximlal at tzalu twitz txꞌotxꞌ jatum tocx kanmi,
at juntl kximlal tuj cyaꞌj,
mlayx cub xitj,
binchaꞌn tuꞌn Dios,
mya tuꞌn xjal in bant.
2 Tuj ju kximlal tzalu twitz txꞌotxꞌ in ko ayin,
kajbil tuꞌn knajan tuj jun kximlal acꞌaj tuj cyaꞌj;
ic tten jlu ic tzaꞌn nneꞌl kchꞌexpuꞌn kxbalun tuꞌn toc juntl acꞌaj.
3 Atzun kajbil,
tuꞌn tten juntl kximlal acꞌaj tuꞌn tten kanmi tuj,
tuꞌntzun tten kanmi toc t-xbalun ex mya skiꞌt tiꞌj.
4 Porque atoꞌxcu tuj kximlal lu in ko ayin tucꞌil bis,
ex octzun kcyim,
myatzun kajbil tuꞌn tcyaj ten kanmi skiꞌt tiꞌj;
atzun kajbil tuꞌn ttzaj kꞌoꞌn juntl kximlal acꞌaj,
tuꞌntzun tcyaj kkꞌoꞌn aju kximlal lu cnajel,
tuꞌntzun kcꞌmonte jun kximlal mlay naj.
5 Ax Dios binchante tuꞌn tjapun jlu kiꞌj,
tuꞌn tchꞌexpet kximlal,
ex ma tzaj tkꞌoꞌn Dios ju Xewbaj Xjan te jun señ te tzuybil ke tiꞌj tcyakilju ctzajel tkꞌoꞌn ke te tibajxi.
6 Cyjaꞌtzun cucx kꞌukl kcꞌuꞌj tiꞌj Dios,
biꞌn kuꞌn atoꞌxcu tuj kximlal,
mi aꞌl koꞌ tucꞌil Kajaw;
7 porque tuꞌn kocslabl in ko bet,
mya tuꞌnju nnoꞌc kqueꞌyin.
8 Pero kꞌukl kcꞌuꞌj tiꞌj Dios,
ex mas kajbil tuꞌn tel kpaꞌn kib tiꞌj kximlal,
tuꞌntzun kten tucꞌil Kajaw.
9 Cyjaꞌtzun nnoꞌc tilil kuꞌn tuꞌn kbinchante aju baꞌn tuj twitz Kajaw,
ka naꞌnxtok kpon tucꞌil ex ka otok ko pon.
10 Porque il tiꞌj tuꞌn kten kcyakil twitz Crist tuꞌn koc tuj xjel,
tuꞌn tcꞌmonte teyle junjun t-xel takꞌunben alcye o tbincha tzalu twitz txꞌotxꞌ,
ka baꞌn ex ka mya baꞌn.
Ma bant kten tucꞌil Dios
11 Cyjaꞌtzun nnoꞌc tilil kuꞌne tuꞌn tcub tiꞌj cynabl xjal,
porque ma tzꞌel knicꞌe tiꞌj,
aju tuꞌn koc tuj xjel twitz Kajaw xobajilxixte;
pero ate Dios ojtzkilte tzaꞌn ktene,
ex cuchiwt icx cyeye tuꞌn tel cynicꞌe kiꞌje.
12 Mintiꞌ in ko yoline juntl maj kiꞌjxe tuꞌn kcꞌmete cyuꞌne,
nok oꞌcx in xi kkꞌoꞌne ambil cyeye tuꞌn cytzalaje kiꞌje,
tuꞌntzun tbant t-xi cytzakꞌweꞌne jun yol cye keju oꞌcx in che tzalaj tiꞌj tzaꞌn queꞌyin jun xjal ex mintiꞌ in che ximan tiꞌj tzaꞌn tten tanmi xjal.
13 Ka ma ko oque loc tuj cywitze,
pero in ko ajbene te Dios;
ex ka baꞌn knable,
tuꞌn jlu in ko ajbene cyeye.
14 Porque tuꞌnju ma knaꞌye tcꞌujlalil Crist,
cyjaꞌtzun mas nnoꞌc tilil kuꞌne,
atzun kximbetze jlu:
O cyim jun xjal te cyxel cycyakil xjal,
cyjaꞌtzun mer ic tzaꞌn cycyakil xjal o che cyim.
15 Te cyxel cycyakil xjal o cyim Crist tuꞌntzun cyajben te Crist keju itzꞌx ke,
mya cyexcye tuꞌn cyajben,
nok oꞌcx tuꞌn cyajben te Crist aju o cyim te cyxel ex jatz ankꞌin.
16 Cyjaꞌtzun,
jaꞌlo mintiꞌ in ko ximane cyiꞌj xjal tzaꞌn che queꞌyin ex alcye cyxilen,
ic tzaꞌn in cybinchaꞌn mastl xjal;
nej atzun kximbetze tiꞌj Crist ic tzaꞌn cye xjal cyximbetz,
atzun jaꞌlo mya icx tten kximbetze tiꞌj.
17 Cyjaꞌtzun,
ka at jun xjal ma tmojba tib tucꞌil Crist,
ma tzꞌoc te acꞌaj;
tcyakilju te ojtxi ma baj;
tcyakil ma tzꞌoc te acꞌaj.
18 Tcyakil jlu tuꞌn Dios in tzaj tkꞌoꞌn,
ex tuꞌnx Dios ma bant kten tucꞌil nok tuꞌn Crist,
ex ma tzaj tkꞌoꞌn koclen tuꞌn t-xi kmaꞌn cye xjal tuꞌn tbant cyten tucꞌil Dios.
19 Ate Dios oc tilil tuꞌn tuꞌn tbant cyten xjal tucꞌil nok tuꞌn Crist,
mintiꞌ oc tkꞌoꞌn Dios tcwent tiꞌj cyil xjal;
ex tzaj tmaꞌn keye tuꞌn t-xi kmaꞌne cye xjal tzaꞌn tten tuꞌn tbant cyten tucꞌil.
20 Cyjaꞌtzun,
akoꞌye ma ko tzaj samaꞌne te t-sanjel Crist,
mer ic tzaꞌn a Dios in cubsan cywitz xjal tuꞌn kyole;
tuj tbi Crist in ko cubsane cywitze tuꞌn tbant cytene tucꞌil Dios.
21 Ate Crist mintiꞌ il o tbincha,
pero oc tkꞌoꞌn Dios kil tiꞌj Crist,
tuꞌntzun koc kꞌoꞌn te tzꞌaklxix tuꞌn Dios nok tuꞌnju at kmojbabl kib tucꞌil Crist.