4
Cyjaꞌtzun mintiꞌ in ko cub numje,
porque ma kcꞌame ju koclene lu tuꞌnju ma tzaj kꞌakꞌan tcꞌuꞌj Dios kiꞌje.
2 Ex ma tzꞌel kpaꞌn kibe tiꞌj ju in bant cyuꞌn xjal tuj ewaj chꞌixbajilxix;
mintiꞌ in ko sbune ex mintiꞌ in baj ksmoꞌne tyol Dios;
oꞌcx in ko ankꞌine twitz Dios ex nnoꞌc tilil kuꞌne tuꞌn kele baꞌn tuj cywitz cycyakil xjal,
tuꞌnju in xi kchicꞌbaꞌne ju yol axix toc.
3 Ka mintiꞌ nneꞌl cynicꞌ xjal tiꞌj tkanil colbil in xi kpacbaꞌne,
pero mya cycyakil,
oꞌcx keju in cheꞌx tuj najen mintiꞌ nneꞌl cynicꞌ tiꞌj.
4 Ke xjal lu mya ocslal ke,
cyjaꞌtzun ma moẍsanjtz cynabl tuꞌnju cydios xjal at tuj tkꞌijlalil jaꞌlo,
tuꞌntzun miꞌn tel cynicꞌ tiꞌj ju spicꞌun in koptzꞌaj cyibaj;
aju spicꞌun lu atzun tkanil baꞌn tiꞌj Crist,
ex ate Crist tbanilxix ex tilbilal Dios.
5 Aju yol in xi kpacbaꞌne mya kiꞌjxe,
nok oꞌcx tiꞌj Jesucrist;
atzun in xi kmaꞌne,
ate Jesucrist Kajaw;
atzun keye ma ko oque te cymajene nok tuꞌnju at kcꞌuꞌje tiꞌj Jesús.
6 Porque tuꞌn Dios tzaj tmaꞌn tuꞌn tcub koptzꞌaj ju spicꞌun tuj klolj,
ex tuꞌn Dios ma tzaj koptzꞌaj ju spicꞌun tuj kanmi,
tuꞌntzun tel knicꞌ tiꞌj tzaꞌn tten Dios tuꞌnju in koptzꞌaj t-spicꞌumal tiꞌj twitz Jesucrist.
Tuꞌn kankꞌin tuꞌn kocslabl
7 Aju kꞌinumabl lu atzun taꞌ kujxi,
akoꞌ ic kten ic tzaꞌn cꞌil,
txꞌotxꞌ ktxꞌotxꞌil,
tuꞌntzun tel knicꞌ tiꞌj,
ate Dios in tzaj kꞌonte nimxix kipumal,
mya kuꞌnxke.
8 In ko yajlanjtz tuj tcyakil,
pero at jatum tuꞌn kex tuꞌn ktzokpaj;
nim nnicꞌ kiꞌj,
pero at jatum tuꞌn toc keꞌ kcꞌuꞌj tiꞌj.
9 In ko jaw lajoꞌn,
pero mintiꞌ in ko cyaj colin tuꞌn Dios;
in ko cub xoꞌn twitz txꞌotxꞌ,
pero mintiꞌ in ko naj.
10 Nok jachak cucx nneꞌljeꞌ kiꞌj tuꞌn kcyim,
ic tzaꞌn baj tiꞌj Jesús,
tuꞌntzun tyecꞌunjtz tiꞌj kximlal ka ax tchwinklal Jesús in tzaj tkꞌoꞌn ke.
11 Porque itzꞌxcu koꞌye,
cucx nneꞌljeꞌ kiꞌje tuꞌn kcyime tuꞌn tlaj Jesús,
tuꞌntzun tyecꞌunjtz tiꞌj kximlale ka ax tchwinklal Jesús in tzaj tkꞌoꞌn keye,
masque cyjaꞌ tnaj kximlale.
12 Cyjaꞌtzun kkꞌon kibe tuꞌn kcyime,
ex tuꞌn jlu ma cycambaye cychwinklale.
13 At jun yol in tmaꞌn tuj Tuꞌjil:
Xi wocslaꞌne,
cyjaꞌtzun in chin yoline,
chi tuj Tuꞌjil.
Icx keye ax knable jlu,
ma txi kocslaꞌne,
cyjaꞌtzun in ko yoline.
14 Porque baꞌn kuꞌn,
jaw ankꞌin Kajaw Jesús tuꞌn Dios,
icx ke ko jawil ankꞌin tuꞌn junx tucꞌil Jesús,
ex ko xel kꞌiꞌne junx cyucꞌile tuꞌn kpon twitz.
15 Porque tcyakil jlu nnicꞌx kuꞌne tuꞌn cycꞌmonteye jun baꞌn;
ka ma cycꞌam nimcu xjal t-xtalbil Dios,
ax icx nimcu xjal tuꞌn t-xi cykꞌoꞌn chjonte te Dios,
tuꞌntzun tjaw nimsaꞌn tbi.
16 Cyjaꞌtzun,
mintiꞌ in ko cub numje masque cyjaꞌ tbaj tipun kximlale,
pero aju kanmiye in tcꞌmoꞌn acꞌaj tipumal junjun kꞌij.
17 Porque aju yajbil keye jaꞌlo mya nim ex nok te jurat,
pero tuꞌn jlu ctzajel kꞌoꞌn jun koclene maꞌxix ex te jumajx.
18 Porque myatzun toc kwitze tiꞌj ju kꞌanchaꞌl,
atzun toc kwitze tiꞌj ju mintiꞌ kꞌanchaꞌl;
porque aju kꞌanchaꞌl,
nok te cab kꞌij,
atzunju mintiꞌ kꞌanchaꞌl,
te jumajx.