Aju acꞌaj yol cyaj bant tiꞌj tuꞌn Dios kucꞌil
3
¿Ocpetzun ko oquel tene juntl maj yolil kiꞌje tuꞌn kcꞌmete cyuꞌne?
¿Maj il tiꞌj tuꞌn t-xi kiꞌne jun uꞌj tuꞌn kcꞌmete cyuꞌne ex ka tuꞌn ttzaj cykꞌoꞌne jun uꞌj te okxenbil keye,
ic tzaꞌn in cybinchaꞌn junjuntl xjal?
2 Miꞌn,
porque ax keye jun kuꞌje tzꞌiban tuj kanmiye,
in jaw cyschꞌiꞌn cycyakil xjal ex ojtzkiꞌn cyuꞌn;
mya il tiꞌj juntl uꞌj te okxenbil keye.
3 Kꞌanchaꞌlxix taꞌ jlu,
tuꞌj Crist keye,
ate Crist o tzꞌibante nok tuꞌn kakꞌunbene.
Ate uꞌj lu mya tuꞌn tint tzꞌiban,
nok oꞌcx tuꞌn T-xew Dios,
aju Dios itzꞌ;
ex mya twitz tzꞌlom abj tzꞌiban,
atzun tzꞌiban tuj kanmiye.
4 Cyjaꞌtzun,
tuꞌn jlu in keꞌ kcꞌuꞌje tiꞌj Dios nok tuꞌn Crist.
5 Mintiꞌ chꞌin koclene kuꞌnx kibxe,
ex mlay ko ximane tiꞌj ka at chꞌin jacu bant kuꞌne kuꞌnx kibe;
oꞌcx ate Dios in tzaj kꞌonte koclene ex knable.
6 Ex axte Dios oc kꞌonte koclene tuꞌn koque ajbel tiꞌj ju acꞌaj yol cyaj bant tiꞌj tuꞌn Dios kucꞌil.
Aju yol lu mya jun ley tzꞌiban,
nok oꞌcx tuꞌn tipumal T-xew Dios;
porque aju ley tzꞌiban,
in cub cysentens xjal tuꞌn tuꞌn cycyim,
atzunju Xewbaj Xjan in tkꞌoꞌn chwinklal.
7 Aju ley tzaj tkꞌoꞌn Dios te Moisés tzꞌiban twitz abj,
ex tzaj tyecꞌun Dios t-spicꞌumal tej ttzaj kꞌoꞌn.
Ke aj Israel mintiꞌ o cyipa tuꞌn toc cyqueꞌyin twitz Moisés tuꞌn tlaj in koptzꞌaj twitz wen,
masque nok te cab kꞌij tuꞌn tkoptzꞌaj twitz.
Aju ojtxi ley,
masque in tmaꞌn tuꞌn cycyim xjal,
pero tzaj tyecꞌun Dios t-spicꞌumal tiꞌj.
8 Ka ic tten jlu,
yajtzun ju yol in tzaj tkꞌoꞌn Xewbaj Xjan ¿myapetzun mas tbanilxix?
9 Porque ka in koptzꞌaj twitz Moisés tej ttzaj kꞌoꞌn ju ley,
aju in cub cysentens xjal tuꞌn tuꞌn tlaj cyil,
yajtzun ju yol aju in tmaꞌn tuꞌn koc tzꞌaklxix tuꞌn Dios,
¿myapetzun mas tbanilxix?
10 Porque aju ojtxi ley,
masque tbanilxix nej,
pero ya jaꞌlo mya tbanilxix,
porque at juntl yol ma tzaj kꞌoꞌn mas tbanilxix.
11 Masque cyjaꞌtok tnaj aju ojtxi ley,
pero tzaj tyecꞌun Dios t-spicꞌumal tiꞌj,
yajtzun ju acꞌaj yol,
¿myapelo mas tbanilxix?
Porque cyjel ten te jumajx.
12 Kꞌukl kcꞌuꞌje tiꞌj jlu,
cyjaꞌtzun in ko yoline clarxix.
13 Mya ic ktene ic tzaꞌn Moisés,
xi tewan twitz tuꞌn jun xbalun tuꞌn miꞌn toc cyqueꞌyin aj Israel oc tcub yupj ju spicꞌun in koptzꞌaj twitz,
aju spicꞌun lu cyjaꞌtok tnaj.
14 Pero ke aj Israel jpet tuj cynabl ex cucx cyten jaꞌlo,
porque oc in jaw cyschꞌiꞌn ju yol cyaj bant tiꞌj tuꞌn Dios cyucꞌil ojtxi,
mintiꞌ nneꞌl cynicꞌ tiꞌj,
porque ax toc ju xbalun makolte cywitz;
aju xbalun lu oꞌcx tuꞌn Crist nneꞌl tiꞌn.
15 Ex cucx cyten jaꞌlo oc in jaw cyschꞌiꞌn tuj tley Moisés,
ax toc ju xbalun makolte twitz cyanmi tuꞌn miꞌn tel cynicꞌ tiꞌj.
16 Pero oc cyajtz meltzꞌaj xjal tucꞌil Kajaw cꞌelel kꞌiꞌn ju xbalun.
17 Aju Kajaw axte Xewbaj;
ex jatum taꞌ T-xew Kajaw atzun at tzokpibl ke.
18 Cyjaꞌtzun,
kcyakil in kkoptzꞌaꞌn t-spicꞌumal Kajaw ic tzaꞌn tuj jun espej,
porque mya maksiꞌn kwitz tuꞌn xbalun;
cyjaꞌtzun in ko chꞌexpet tuꞌn koc ic tzaꞌn tilbilal Crist,
ex mas in koptzꞌaj t-spicꞌumal Crist kiꞌj junjun kꞌij;
atzun in tbinchaꞌn Kajaw,
axju Xewbaj.