2
Cyjaꞌtzun cub nximane tuꞌn miꞌn ttzaj cybise oc npone juntl maj cyucꞌile.
2 Porque ka ma tzaj cybise wuꞌne,
¿tzaꞌntzun tten tuꞌn ntzalaje?
Nok oꞌcx cyuꞌne tuꞌn ntzalaje,
akeye otok tzaj cybise wuꞌne.
3 Axtzun jlu xi ntzꞌibane cyeye tuꞌntzun miꞌn ttzaj nbise tuꞌn cylaje oc npone cyucꞌile,
oꞌcxwitlo tuꞌn ntzalaje cyiꞌje;
porque kꞌukl ncꞌuꞌje cyiꞌje cycyakile,
aju in chin tzalaje tiꞌj icx cyeye cycyakile in che tzalaje tiꞌj.
4 Xi ntzꞌibane jlu cyeye tuꞌnju at nim nbise cyiꞌje ex at taꞌw tuj wanmiye ex nimcu in chin okꞌe;
xi ntzꞌibane,
pero mya tuꞌn ttzaj cybise,
nok oꞌcx tuꞌn cybinteye nimxix ncꞌujlalile at cyiꞌje.
Cynajsancuye til ju ocslal tbincha mya baꞌn
5 Aju erman tzaj nbise tiꞌj,
mya oꞌcx akine tzaj nbise,
ax icx cyeye cycyakile tzaj chꞌin cybise.
Ma txi nmaꞌne jlu tuꞌntzun miꞌn tel cyuw te cyeye.
6 Acux tcastiw xjal tuꞌnju ma baj cycawine,
tuꞌn nimcu cybaje ẍe cawin te.
7 Jaꞌlotzun,
nok oꞌcx tuꞌn tcub cynajsaꞌne til ex tuꞌn t-xi cykꞌukbaꞌne tcꞌuꞌj tuꞌntzun miꞌn tcyaj ten tuj nim bis.
8 Cyjaꞌtzun chin cubsale cywitze,
cycꞌujlame juntl maj.
9 Cyjaꞌtzun xi ntzꞌibane cyeye nej,
tuꞌntzun tel nnicꞌe cyiꞌje ka baꞌn che nimane tuj tcyakil.
10 Ka ma cub cynajsaꞌne til jun erman,
icx weye cbel nnajsaꞌne;
porque aju til ma cub nnajsaꞌne,
twitz Crist ma cub nnajsaꞌne tuꞌn cylaje,
11 tuꞌntzun miꞌn tcub kiꞌj tuꞌn Satanás;
porque baꞌn kuꞌn tzaꞌn tten tmod,
nim mañ baꞌn tuꞌn.
Mya tuj tzalajbil ten Pablo tuj tnam Troas
12 Tej npone tuj tnam Troas pacbalte tkanil baꞌn in yolin tiꞌj Crist,
tzaj kꞌoꞌn ambil weye tuꞌn wajbene tuj takꞌun Kajaw.
13 Pero mintiꞌ in tzalaje tuꞌnju mintiꞌ cnet Tito wuꞌne,
aju wermaniye;
cyjaꞌtzun e cyaj nkꞌolbeꞌne ke ocslal ex inxe tuj txꞌotxꞌ Macedonia.
In cub tiꞌj mya baꞌn kuꞌn nok tuꞌn Crist
14 Pero chjonte Dios ma cub tiꞌj tcyakil tuꞌn Jesucrist,
ex lepchkoꞌc tiꞌj;
tuꞌn kakꞌunbene in tyecꞌun Dios tyol cye xjal tuj tcyakil lugar,
tuꞌn cyojtzkinte xjal Jesucrist.
Ic tten jlu ic tzaꞌn jun tcꞌocꞌjal in xi t-sipan tib.
15 Porque ic ktene ic tzaꞌn tcꞌocꞌjal in xi tkꞌoꞌn Crist te Dios,
ex in xi t-sipan tib tcꞌocꞌjal cyxol ke xjal in che clet ex cyxol keju in che naj.
16 Aju tyol Dios in xi kmaꞌne cye xjal in che naj,
ma tzꞌoc mer ic tzaꞌn t-xew camic tuꞌn cynaj;
atzun cye keju in che clet,
ma tzꞌoc ic tzaꞌn tcꞌocꞌjal chwinklal tuꞌn tten cychwinklal.
¿Ex alcye jacu tzicꞌx tuꞌn tiꞌj akꞌuntl lu?
17 Pero mya ic ktene ic tzaꞌn nimcu xjal in baj cysmoꞌn tyol Dios cyucꞌil cyex cyyol tuꞌn cycambante chꞌin pwak tiꞌj;
atzun keye junx tiꞌj kyole,
samaꞌn koꞌye tuꞌn Dios,
in ko yoline twitz Dios ex ajbel koꞌye te Crist.