Aju oyaj jaw chmet tuꞌn t-xi kꞌoꞌn cye ocslal
16
Cxel nmaꞌne cyeye tiꞌj ju oyaj tuꞌn t-xi kꞌot cye ocslal.
Ic tzaꞌn xi nmaꞌne cye ocslal ateꞌ tuj junjun tnam tuj txꞌotxꞌ Galasia,
icxtzun cyeye cybinchame.
2 Tcyakil dominc,
teyle junjun cyeye baꞌn tuꞌn tel tpaꞌn chꞌin,
nicꞌpun oc tcambaꞌ tuj jun seman,
tuꞌn t-xi tcꞌuꞌn,
tuꞌntzun mya tzajx tuꞌn tjaw chmet oyaj oc npone cyucꞌile.
3 Octzun npone,
alcye keju baꞌn tuj cywitze,
aketzunju che xel nsamaꞌne,
tucꞌix uꞌj cxel cyiꞌn,
tuꞌntzun t-xi cyiꞌn aju oyaj cxel cykꞌoꞌne tuꞌn tpon cye ocslal tuj Jerusalén.
4 Ax icx weye ka baꞌn tuj cywitze tuꞌn nxiꞌye,
che xeltzun wucꞌine.
Cub t-ximan Pablo tuꞌn tpon cyucꞌil ocslal tuj Corint
5 Oc chin pole cyucꞌile wicꞌlenxiye tuj txꞌotxꞌ Macedonia,
porque il tiꞌj tuꞌn wicꞌe tuj Macedonia.
6 Ex mya yajcu chin cyaj tene cyucꞌile ex ka ax tuꞌn ntene cyucꞌile tuj jbalil,
tuꞌntzun ttzaj cykꞌoꞌne chꞌin onbil weye tuꞌn tajben tuj nbeye jatum chin xeꞌle.
7 Porque miꞌn waje tuꞌn wicꞌ aje cyucꞌile jaꞌlo nok te icꞌel be kine;
atzun waje tuꞌn ntene cyucꞌile nim kꞌij,
ka ic tajbil Kajaw.
8 Pero ax chin tele tzalu tuj tnam Efeso.
Ocxi tbaj ninkꞌij Pentecostés,
maxitzun chin xeꞌle.
9 Porque ma tzaj kꞌoꞌn ambil weye tuꞌn wakꞌnane nimxix tuj takꞌun Kajaw,
masque nimcu in che kꞌojin wiꞌje.
10 Ex ka ma pon Timotey,
cycwentime tuꞌn tten cyucꞌile tuj txubtxaj,
porque in tbinchaꞌn takꞌun Kajaw icx tzaꞌn weye.
11 Cyjaꞌtzun,
miꞌn tzꞌoc cykꞌoꞌne ka mintiꞌ toclen,
nok oꞌcx tuꞌn ttzaj cykꞌoꞌne chꞌin onbil te tuꞌntzun tbet tuj txubtxaj,
tuꞌntzun tul wucꞌile;
porque in chin ayone tiꞌj tzalu,
cyucꞌix erman.
12 Atzunju erman Apolos nimxix o chin cubsane twitz tuꞌn t-xi cyucꞌile cyucꞌix ke erman,
pero mintiꞌ in tajbeꞌn tuꞌn t-xiꞌ jaꞌlo;
maxitzun cxeꞌl oc tamet tiꞌj.
Mancbil kꞌolbebl tuꞌn Pablo cye ocslal
13 Che xkꞌukine ex che weꞌxixe tuj ocslabl;
che ocxe xinak ex cykꞌoꞌnc cyipune.
14 Tcyakilju oc cybinchaꞌye,
bant-xwit cyuꞌne tuꞌn cycꞌujlalile.
15 Erman biꞌn cyuꞌne,
cycyakil keju ateꞌ tuj tja Estéfanas,
tnejel ocslal ke tuj txꞌotxꞌ Acaya,
ex ma cyakꞌ cyib tuꞌn cyajben cye ocslal.
16 Chin cubsale cywitze tuꞌn tcub cybiꞌne cycawbil keju in che ajben ic tzaꞌn jlu,
ex tuꞌn tcub cybiꞌne cycyakil keju in che onin ex in che akꞌnan tuj takꞌun Kajaw.
17 In chin tzalaje tuꞌnju ma che ul Estéfanas tucꞌix Fortunato ex tucꞌix Acaico,
porque ma che ul wucꞌile te cyxele.
18 Porque ma keꞌ ncꞌuꞌje cyuꞌn,
ax icx cyeye ma keꞌ cycꞌuꞌje cyuꞌn;
tzꞌelxtzun cynicꞌe cyiꞌj ka at cyoclen jlu.
19 In cheꞌx kꞌolbeꞌne cyuꞌn ke ocslal ateꞌ tuj junjun tnam tuj txꞌotxꞌ Asia.
Ax icx Aquila tucꞌix Priscila,
cyucꞌix ke ocslal nnoꞌc cychmon cyib tuj cyja,
nimxix in cheꞌx kꞌolbeꞌne cyuꞌn tuj tbi Kajaw.
20 In cheꞌx kꞌolbeꞌne cyuꞌn cycyakil erman.
Cykꞌolbem cyibe cyxolxe,
ex cytzꞌuban el cywitze tucꞌil tcyakil cycꞌujlalile.
21 Akine Pablo in xi ntzꞌibane jun kꞌolbebl lu,
ma cub ntzꞌibane tuꞌnx nkꞌabe.
22 Ka at jun mintiꞌ tcꞌujlalil tiꞌj Kajaw Jesucrist,
baꞌn tuꞌn tcub t-sentens tuꞌn t-xiꞌ tuj najen.
Ate Kajaw tzul.