3 Porque tnejelxix xi nkꞌoꞌne xnakꞌtzbil cyeye,

axju o ncꞌame.

Xi nmaꞌne:

Ate Crist o cyim tuꞌn tchjet kil,

ic tzaꞌn in tmaꞌn tuj Tuꞌjil;

4 ex cuꞌx makuꞌn,

ex jatz ankꞌin tuj toxin kꞌij,

ic tzaꞌn in tmaꞌn tuj Tuꞌjil;

5 ex cub tyecꞌun tib twitz Pedro,

ex te tibajxi cub tyecꞌun tib cywitz keju cablaj apostl.

6 Ex te tibajxi cub tyecꞌun tib cywitz mas te jweꞌ syent erman ateꞌ junx;

cyxol ke jlu nimcu itzꞌx ke,

ex junjuntl o che cyim.

7 Ex te tibajxi cub tyecꞌun tib twitz Jacobo;

ex te tibajxi jlu cub tyecꞌun tib cywitz cycyakil apostl.

8 Te mancbilxitzun cub tyecꞌun tib nwitze,

ic ntene ic tzaꞌn jun cꞌwaꞌl in itzꞌj naꞌnxtok tpon tkꞌijlalil.

9 Porque akine tal chꞌin kine cywitz ke mastl apostl,

mya baꞌn kine tuꞌn toc kꞌoꞌn nbiye apostl,

porque e baj nyajlaꞌne ke ocslal etzan ke tuꞌn Dios.

10 Pero nok tuꞌn t-xtalbil Dios ma chin oque apostl;

ex mya nokx gan ju t-xtalbil Dios tzaj tkꞌoꞌn weye,

porque mas ma chin akꞌnane cywitz cycyakil;

pero mya wuꞌnxe ma bant,

nok oꞌcx tuꞌn t-xtalbil Dios at wucꞌile.

11 Cyjaꞌtzun,

ka akine ma chin akꞌnane ex ka ake mastl apostl,

pero atzun jlu in xi kpacbaꞌne,

ex atzun jlu ma txi cyocslaꞌne.

12 Katzun in xi kpacbaꞌne ka o jaw ankꞌin Crist cyxol cyimni,

¿tzaꞌntzun tten in cymaꞌn junjun cyxole ka mlayx jatz ankꞌin jun xjal cyxol cyimni?

13 Porque ka mlayx jatz ankꞌin jun xjal cyxol cyimni,

entons mintiꞌ o jatz ankꞌin Crist.

14 Ex ka mintiꞌ o jatz ankꞌin Crist,

entons nokxlo gan aju in xi kpacbaꞌne,

ax icx nokxlo gan aju cyocslable.

15 Entons ma ko oque nicꞌal yol tiꞌj Dios;

porque ma txi kmaꞌne ka o jatz ankꞌin Crist tuꞌn Dios,

pero ka ax toc mlayx jaw ankꞌin jun xjal cyxol cyimni,

entons mintiꞌlo o jatz ankꞌin Crist tuꞌn Dios.

16 Porque ka mlayx che jatz ankꞌin ke cyimni,

entons icx te Crist mintiꞌlo o jatz ankꞌin;

17 ex ka mintiꞌ o jatz ankꞌin Crist,

nokxlo gan aju cyocslable;

ex axlo ateꞌye tuj cyile.

18 Ax icx keju o che cyim ocslal ke tiꞌj Crist,

biꞌxlo ma che naj.

19 Ka oꞌcx at tajben kocslabl tiꞌj Crist acux itzꞌx koꞌ tzalu twitz txꞌotxꞌ,

becꞌbilxix kwitz cywitz cycyakil xjal.

20 Pero jaꞌlo ax toc o jatz ankꞌin Crist cyxol cyimni;

ate Crist o jatz ankꞌin nej,

tuꞌntzun cyjaw ankꞌin keju o che cyim ic tzaꞌnx te,

ic tten jlu ic tzaꞌn tnejel twitz awal in tyecꞌun ka tzul mastl twitz.

21 Porque nok tuꞌn jun xjal tzaj camic,

ax icxtzun nok tuꞌn jun xjal oc che jawil ankꞌin xjal cyxol cyimni.

22 Porque ic tzaꞌn in che cyim cycyakil xjal nok tuꞌnju tiyjil Adán ke,

icxtzun oc che jawil ankꞌin cycyakil keju o che ocslan tiꞌj Crist.

23 Pero teyle junjun tuꞌn tjaw ankꞌin tuj tkꞌijlalil;

ate Crist o jatz ankꞌin nej;

ex te yajxi,

akeju otok che ocslan tiꞌj Crist che jawitz ankꞌin oc tul juntl maj.

24 Tzultzun tkꞌijlalil tuꞌn tjapun baj tcyakil,

oc t-xi tkꞌoꞌn Crist ju cawbil te Dios aju Mambaj,

tcublenxi cyiꞌj cycyakil keju in che cawin,

keju at cyoclen ex keju at cyipumal.

25 Porque il tiꞌj cucx tuꞌn tcawin Crist ocxi cycub baj cycyakil ke aj kꞌoj tiꞌj tjakꞌ tcawbil.

26 Aju mancbil aj kꞌoj tuꞌn tcub xitj,

ate camic.

27 Porque tcyakil ma cub tkꞌoꞌn Dios tjakꞌ tcawbil Crist ic tzaꞌn in tmaꞌn tuj Tuꞌjil.

Ex tej tmante ka tcyakil ma cub kꞌoꞌn tjakꞌ tcawbil Crist,

clarxix taꞌ mya ajunte Dios tcub tjakꞌ tcawbil Crist,

nok oꞌcx ate Dios cub kꞌonte tcyakil tjakꞌ tcawbil Crist.

28 Ocxitzun cycub kꞌoꞌn tcyakil tjakꞌ tcawbil Crist,

ax icxtzunte Crist aju Tcꞌwaꞌl Dios cbel tkꞌon tib tjakꞌ tcawbil Dios,

como ate Dios cub kꞌonte tcyakil tjakꞌ tcawbil Crist.

Cyjaꞌtzun tuꞌn tten toclen Dios tibaj tcyakil.

29 Nokwit mya ic tten,

¿tikuꞌntzun in che byan junjun cyxole te cyxel keju o che cyim?

Ka mintiꞌ tumel tuꞌn cyjaw ankꞌin ke cyimni,

¿tikuꞌntzun in che byan junjun te cyxel?

30 ¿Ex tikuꞌn nneꞌljeꞌ kiꞌje tcyakil kꞌij?

31 Ax toc erman,

nneꞌljeꞌ wiꞌje tcyakil kꞌij tuꞌn ncyime;

cxel nmaꞌne jlu cyeye tuꞌnju in chin tzalaje cyiꞌje nok tuꞌnju ocslal keye tiꞌj Kajaw Jesucrist.

32 Ka o chin kꞌojine cyucꞌil nmak txcup tuj tnam Efeso ic tzaꞌn in cybinchaꞌn xjal,

¿ti tajben jlu weye?

Ka mlayx che jatz ankꞌin cyimni,

mas baꞌn ko waꞌn ex ko cꞌan,

porque nchiꞌj ko cyim.

33 Miꞌn che el tzpete tiꞌj:

Ka ma txi cyucꞌin cyibe cyucꞌil xjal mya baꞌn,

oc tzacjel cynable.

34 Tzulx cynable tuj tumelxix,

ex miꞌn cybinchaye il;

porque at junjun cyxole mintiꞌ ojtzkiꞌn Dios cyuꞌn.

In xi nmaꞌne jlu tuꞌn ttzaj cychꞌixwiye.

35 Pero atlo junjun ctzajel tmaꞌn:

¿Tzaꞌnlo tten tuꞌn cyjaw ankꞌin ke cyimni?

¿Alcye cyximlal oc cyul?

36 Mintiꞌ tnabla,

baka mintiꞌ baꞌn tuꞌna,

aju iyaj in cuꞌx tawaꞌna,

mlay tzꞌitzꞌj ka mi xcyim nej.

37 Aju iyaj cbelex tawaꞌna,

oc tjaꞌwil itzꞌj mya icx tten ic tzaꞌn oc tcuꞌx tawaꞌna,

nok oꞌcx ju twitz iyaj cbelex tawaꞌna,

ka twitz triw ex ka twitz junxitl iyaj;

38 ex teyle junjun at tkan tuꞌn Dios ic tzaꞌnx tajbil,

ex teyle junjun iyaj junxitl tkan.

39 Mya junx taꞌ cychibjal cycyakil;

part cychibjal xjal,

part cychibjal jil,

part cychibjal cyiẍ,

ex part cychibjal chyuꞌj.

40 Part che queꞌyin keju ateꞌ tuj cyaꞌj,

ex part che queꞌyin keju ateꞌ twitz txꞌotxꞌ;

part cyspicꞌumal keju ateꞌ tuj cyaꞌj,

ex part cyspicꞌumal keju ateꞌ twitz txꞌotxꞌ.

41 Part t-spicꞌumal kꞌij,

ex part t-spicꞌumal xjaw,

ex part cyspicꞌumal ke cheꞌw,

porque at junjun cheꞌw mas in che koptzꞌaj,

ex at junjuntl mintiꞌxix in che koptzꞌaj.

42 Icxtzun ttenju oc cyjatz ankꞌin ke cyimni.

Oc tcuꞌx maket kximlal at ttzuwal,

octzun tjatz ankꞌin mintiꞌ ttzuwal.

43 Octzun tcuꞌx maket biꞌx in tzacj tilbilal,

octzun tjatz ankꞌin puro tbanil;

cbelex maket mintiꞌ tipun,

octzun tjatz ankꞌin at tipun.

44 Aju kximlal cbelex maket te twitz txꞌotxꞌ;

octzun kjatz ankꞌin,

aju kximlal te tuj cyaꞌj.

Ic tzaꞌn at kximlal te twitz txꞌotxꞌ,

ax icx at kximlal te tuj cyaꞌj.

45 Porque ictzun in tmaꞌn tuj Tuꞌjil:

Aju tnejel xjal Adán oc te xjal itzꞌ,

chi ju tzꞌiban,

pero aju mancbil Adán itzꞌ ex kꞌol chwinklal.

46 Aju kximlal bant nej te twitz txꞌotxꞌ,

mya te tuj cyaꞌj;

te tibajxi in tzaj kꞌoꞌn aju kximlal te tuj cyaꞌj.

47 Aju tnejel xjal te twitz txꞌotxꞌ,

ax txꞌotxꞌ te;

aju tcabin xjal te tuj cyaꞌj,

[atzun Kajawju.]

48 Akeju txꞌotxꞌ cyximlal ic cyten ic tzaꞌn Adán txꞌotxꞌ t-ximlal;

ex akeju che tel tuj cyaꞌj ic che oquel ic tzaꞌn Kajaw aju at tuj cyaꞌj.

49 Ex ic tzaꞌn ax tilbilal Adán kꞌiꞌn kuꞌn aju at twitz txꞌotxꞌ,

ax icxtzun cꞌelel kiꞌn tilbilal Crist aju at tuj cyaꞌj.

50 Pero cxel nmaꞌne jlu cyeye erman,

aju kximlal at jaꞌlo mlay bant tuꞌn tocx tuj cyaꞌj tuj tcawbil Dios,

ex aju kximlal cyjaꞌ tbaj mintiꞌ toclen tiꞌj ju kximlal mlay baj.

51 Lu cxel nmaꞌne cyeye jun yol mintiꞌtok biꞌn cyuꞌn xjal:

Mya kcyakil ko cymel,

pero kcyakil cchꞌexpetel kximlal.

52 Te jurat tuꞌn kchꞌexpet ic tzaꞌn in mutzꞌun tbakꞌ kwitz;

atzun ko chꞌexpetel oc tkꞌajt mancbil chun.

Porque cꞌoquel kꞌajtzaꞌn chun,

ex che jawil ankꞌin ke cyimni,

mlay che cyimtl,

atzun ke cchꞌexpetel kximlal.

53 Aju kximlal at jaꞌlo cnajel,

pero ilxix tiꞌj tuꞌn toc te acꞌaj tuꞌntzun miꞌn tnaj;

ex aju kximlal at jaꞌlo cymel,

pero ilxix tiꞌj tuꞌn toc te acꞌaj tuꞌntzun miꞌn tcyim.

54 Aju kximlal at jaꞌlo cyjaꞌ tnaj ex cyjaꞌ tcyim;

pero oc toc te acꞌaj tuꞌn miꞌn tnaj ex tuꞌn miꞌn tcyim,

maxitzun cjapunel aju yol in tmaꞌn tuj Tuꞌjil:

Biꞌx cnajel camic te jumajx porque ma cub tiꞌj.

55 Aya camic,

¿jatumtzun ma pon tipumala tuꞌn kcꞌixbisanjtze tuꞌna?

Aya camic,

¿jatum taꞌ tipumala tuꞌn tcub kiꞌje tuꞌna?

Mintiꞌtl tipumala jaꞌlo,

chi tuj Tuꞌjil.

56 Porque ate il,

atzun in kꞌonte tipumal camic tuꞌn kcꞌixbisanjtz tuꞌn,

ex aju ojtxi ley,

atzun in kꞌonte tipumal il.

57 Pero kkꞌonx chjonte te Dios tuꞌnju ma tzaj tkꞌoꞌn kipumal tuꞌn tcub tiꞌj kuꞌn nok tuꞌn Kajaw Jesucrist.

58 Cyjaꞌtzun erman akeye at ncꞌuꞌje cyiꞌje,

che weꞌxixe,

miꞌn che yucche,

cucx che akꞌnane tuj takꞌun Kajaw;

porque baꞌn cyuꞌne,

aju akꞌuntl in cybinchaꞌne te Kajaw mya nokx gan.