Aju tuꞌn kyolin tiꞌj junxilchak yol
14
Cykꞌoꞌnque tilil tuꞌn tten cycꞌujlalile,
ex cykꞌoꞌnque tilil tuꞌn tten cyoclene aju in tzaj tkꞌoꞌn Xewbaj Xjan,
pero aju mas il tiꞌj,
tuꞌn t-xi cychicꞌbaꞌne aju in tzaj tmaꞌn Dios cyeye.
2 Porque aju xjal in yolin tuj junxilchak yol,
mya cyucꞌil xjal in yolin,
nok oꞌcx in yolin tucꞌil Dios,
porque mi jun xjal nneꞌl tnicꞌ tiꞌj tyol.
Aju yol in tzaj kꞌmaꞌn te tuꞌn Xewbaj Xjan mlay tzꞌel cynicꞌ xjal tiꞌj alcye tnabl.
3 Pero aju in chicꞌbante tyol Dios,
in yolin cyucꞌil xjal tuꞌntzun cychꞌiy tuj cyocslabl,
ex tuꞌn t-xi kꞌot cynabl,
ex tuꞌn tkꞌukbanjtz cycꞌuꞌj.
4 Aju in yolin tuj junxitl yol,
oꞌcx te in chꞌiy tuj tocslabl;
atzunju in chicꞌbante tyol Dios,
in che chꞌiy cycyakil ocslal tuꞌn tuj cyocslabl.
5 Cyjaꞌtzun wajbile tuꞌn cyyoline cycyakile tuj junxilchak yol,
pero mas wajbile tuꞌn t-xi cychicꞌbaꞌne tyol Dios;
porque aju in chicꞌbante tyol Dios mas maꞌ toclen twitzju in yolin tuj junxilchak yol,
ax baꞌn tuꞌn tyolin tuj junxilchak yol,
pero ka ma tzꞌel pjet ju yol tuꞌn,
tuꞌntzun cychꞌiy cycyakil ocslal tuj cyocslabl.
6 Jaꞌlotzun erman,
ka ma chin pone cyucꞌile in chin yoline tuj junxilchak yol,
¿ti tajben cyeye ka mintiꞌ ma txi nmaꞌne aju yol tzaj tmaꞌn Dios weye,
ex ka jun yol te ojtzkibl,
ex ka jun yol te chicꞌbabl tiꞌj tyol Dios,
ex ka jun yol te xnakꞌtzbil?
7 Cycyakil ke tiꞌxti in che kꞌajt mya itzꞌ ke,
ic tzaꞌn xux ex ka jun quitar,
ka mintiꞌ in cykꞌoꞌn t-sonil cywiꞌ clarxix,
¿tzaꞌntzun tten tuꞌn tel knicꞌ tiꞌj alcye bitz in tkꞌajtzaꞌn xux ex ka alcye bitz in tkꞌajtzaꞌn quitar?
8 Ax icx oc toc kꞌajtzaꞌn chun,
ka junxitl tbinx twiꞌ,
¿alcye cbantel tten tuꞌn t-xiꞌ tuj kꞌoj?
9 Icxtzun cyeye,
ka mintiꞌ ma txi cymaꞌne jun yol chicꞌlxix,
¿tzaꞌntzun tten cꞌelel cynicꞌ xjal tiꞌj ju in cymaꞌne?
Mer ic tzaꞌn mintiꞌ jun xjal in bin tiꞌj cyyole.
10 Elaꞌ txcaj cyyol xjal at twitz txꞌotxꞌ,
ex mintiꞌ jun yol mintiꞌwt tnabl.
11 Pero ka mintiꞌ ma tzꞌel nnicꞌe tiꞌj ti t-xilen ju yol,
chin oquele ic tzaꞌn stranjer xjal tuj twitz ju in yolin,
ex aju in yolin cꞌoquel ic tzaꞌn stranjer xjal tuj nwitze.
12 Icxtzun cyeye,
tuꞌnju cyajbile tuꞌn tten elaꞌ cyoclene tuꞌn Xewbaj Xjan,
cykꞌoꞌnque tilil tuꞌn tten elaꞌ cyoclene tuꞌntzun cychꞌiy cycyakil ocslal tuj cyocslabl.
13 Cyjaꞌtzun,
aju in yolin tuj junxilchak yol,
kaninx tuj naꞌj Dios tuꞌn tel pjet ju yol tuꞌn.
14 Porque ka ma chin naꞌne Dios tuj junxitl yol mintiꞌ nneꞌl nicꞌbaj tiꞌj,
aju wanmiye in naꞌn Dios,
pero aju nnable mintiꞌ chꞌin in tcambaꞌn.
15 ¿Titzun oc nbinchaꞌye?
Chin naꞌle Dios tuj wanmiye,
pero icx chin naꞌle Dios tuj nnable;
chin bitzale tuj wanmiye,
pero icx chin bitzale tuj nnable.
16 Porque ka ma txi tkꞌoꞌna chjonte te Dios tuj tanmiya ex in yolina tuj jun yol mintiꞌ nneꞌl nicꞌbaj tiꞌj,
ex ka at jun xjal in bin mya xnakꞌtzamni,
¿tzaꞌn tten tuꞌn t-xi tkꞌoꞌn chjonte te Dios junx tucꞌila?
Porque mintiꞌ nneꞌl tnicꞌ tiꞌj ju in tmaꞌna.
17 Porque teya,
ax toc baꞌn in tbinchaꞌna in xi tkꞌoꞌna chjonte te Dios;
pero atzun juntl mlayx chꞌiy.
18 In xi nkꞌoꞌne chjonte te Dios tuꞌnju baꞌn chin yoline tuj junxilchak yol mas ic tzaꞌn cyeye.
19 Pero cyxol ocslal mas wajbile tuꞌn t-xi nmaꞌne jweꞌ yol aju nneꞌl nicꞌbaj tiꞌj tuꞌntzun t-xi nkꞌoꞌne xnakꞌtzbil cye mastl,
ex mya tuꞌn t-xi nmaꞌne laj mil yol tuj junxitl yol aju mintiꞌ nneꞌl nicꞌbaj tiꞌj.
20 Erman,
aju cynable miꞌn tzꞌoc ic tzaꞌn tnabl jun cꞌwaꞌl,
nok oꞌcx ic tzaꞌn tnabl jun tij xjal;
ex miꞌn che ximane tiꞌj ju mya baꞌn,
ic tzaꞌn ke tal cꞌwaꞌl mintiꞌ in che ximan tiꞌj ju mya baꞌn.
21 At jun yol tzꞌiban tuj Tuꞌjil in tmaꞌn:
Cxel kꞌmet nyole cye xjal lu tuj cyyol junxitl xjal ex tuj cyyol stranjer xjal;
masque icju,
pero mlay txi cybiꞌn nyole,
chi Kman,
chi tuj Tuꞌjil.
22 Cyjaꞌtzun,
aju oclenj tuꞌn kyolin tuj junxilchak yol in tzaj kꞌoꞌn te jun techal cye xjal mya ocslal,
ex mya te cye ocslal.
Atzunju koclen tuꞌn t-xi kchicꞌbaꞌn aju in tzaj tmaꞌn Dios ke in tzaj kꞌoꞌn te jun techal cye ocslal,
mya te cye keju mya ocslal ke.
23 Katzun ma tzꞌoc cychmon cyib ke ocslal tuj jun lugar,
ex ka ma che yolin cycyakil tuj junxilchak yol,
ex ka ma che ocx ke xjal mintiꞌ chꞌin nneꞌl cynicꞌ tiꞌj ex ka mya ocslal ke,
¿mlaypelo cyma ka tuj cywitze ma tzaj?
24 Pero ka cycyakile in xi cychicꞌbaꞌne aju in tzaj tmaꞌn Dios cyeye,
ex ka ma tzꞌocx jun xjal mya ocslal ex mintiꞌ chꞌin baꞌn tuꞌn,
cbeltzun tiꞌj tnabl cyuꞌne cycyakile,
ex cbel ten ximal tiꞌj ka aj il oc tbinte cyyole.
25 Aju ewan tuj tanmi cꞌelel tuj kꞌanchaꞌl;
cyjaꞌtzun cbel ẍmejeꞌ tuꞌn tcꞌulun twitz Dios,
oc tmaꞌ ka ax toc at Dios cyxole.
Cybinchame tcyakil tuj tumel ex tuj ttxolil
26 ¿Titzun cꞌoquel erman?
Oc toc cychmon cyibe,
teyle junjun ctzajel tmaꞌn jun salmo,
ex ka jun xnakꞌtzbil,
ex ka junxitl yol,
ex ka jun yol alcye ctzajel tyecꞌun Dios te,
ex ka tuꞌn tel pjet junxitl yol.
Cybinchame tcyakil tuꞌntzun cychꞌiy ke mastl ocslal.
27 Ka at ma yolin tuj junxitl yol,
baꞌn tuꞌn cyyolin cabe ex ka ox,
pero junjun tuꞌn tyolin,
ax icx il tiꞌj tuꞌn tten jun pjulte cyyol.
28 Pero ka mintiꞌ jun pjulte yol,
baꞌn tuꞌn miꞌn tyolin cyxol ocslal,
baꞌn tuꞌn tyolin texte ex te Dios.
29 Ax icx ke pacbal,
baꞌn tuꞌn cyyolin cabe ex ka ox,
atzun ke mastl tuꞌn cyximan tiꞌj.
30 Ex ka at juntl kꞌukl,
ka at jun yol ma tzaj tmaꞌn Dios te,
baꞌn tuꞌn tweꞌ tyolin aju in yolin,
tuꞌntzun tyolin juntl.
31 Porque baꞌn tuꞌn t-xi cychicꞌbaꞌne cycyakile aju in tzaj tmaꞌn Dios cyeye,
junjun tuꞌn tyolin,
tuꞌntzun tel cynicꞌ cycyakil tiꞌj ex tuꞌn t-xi kꞌot cynabl cycyakil.
32 Ex akeju in che pacban,
tuj cycwent-x taꞌ tuꞌn cyyolin ex ka tuꞌn tweꞌ cyyolin.
33 Porque ate Dios tcyakil in bant tuꞌn tuj ttxolil ex tuꞌn tten kmojbabl kib kxolx.
Ic tzaꞌn in bant cyxol ocslal cyuj cycyakil iglesi,
34 ax icx cyxole,
baꞌn tuꞌn miꞌn cykꞌajt ke xuꞌj oc toc cychmon cyibe tuj cꞌulbil,
porque mya kꞌoꞌn permis cye tuꞌn cyyolin,
oꞌcx tuꞌn cycub txuleꞌ ic tzaꞌn in tmaꞌn tuj tley Dios.
35 Ex ka cyaj tuꞌn tel cynicꞌ tiꞌj ti t-xilen jun yol,
cykaninx cye cychmil max cyja;
porque jun chꞌixbil tuꞌn tyolin jun xuꞌj cyxole oc toc cychmon cyibe.
36 ¿Baka cyxole ma tzꞌetz tyol Dios?
¿Ex baka oꞌcx cyucꞌile ma pon tyol Dios?
37 Ka at jun ocslal tuj tnabl ka pacbal ex ka at toclen tuꞌn Xewbaj Xjan,
tzꞌelx tnicꞌ tiꞌj aju ma txi ntzꞌibane cyeye,
te Kajaw tmandamyent.
38 Pero ka at jun mintiꞌ nneꞌl tnicꞌ tiꞌj jlu,
icxlo te mlay cꞌmet ju tyol.