Tuꞌn tten kcꞌujlalil
13
Ka ma ko yolin tuj junxilchak cyyol xjal ex ka tuj cyyol anjel,
pero ka mintiꞌ kcꞌujlalil,
ko oquel ic tzaꞌn cꞌuxbil in tzinun ex ka ic tzaꞌn jun cꞌuxbil tmoj chnab nim in kꞌajt.
2 Ex ka at koclen tuꞌn t-xi kchicꞌbaꞌn aju in tzaj tmaꞌn Dios,
ex ka ma tzꞌel knicꞌ tiꞌj tcyakilju yol at tuj ewaj,
ex ka ojtzkiꞌn tcyakil kuꞌn,
ex ka at nim kocslabl tuꞌn ticꞌ jun witz kuꞌn tuꞌn tpon tuj juntl lugar,
pero ka mintiꞌ kcꞌujlalil,
mintiꞌ kajben.
3 Ex ka ma txi ksipan tcyakilju at ke tuꞌn cywaꞌn ke meba,
ex ka ma txi kkꞌon kib tuꞌn tcub patun kximlal,
pero ka mintiꞌ kcꞌujlalil,
mintiꞌlo tajben jlu ke.
4 Aju xjal at tcꞌujlalil at tpasens ex in tzꞌeꞌy tcꞌuꞌj tiꞌj tucꞌil;
aju xjal at tcꞌujlalil mintiꞌ in tzaj tloꞌch tcꞌuꞌj tiꞌj juntl,
ex mintiꞌ in jaw tniman tib,
mintiꞌ in baj tyolin tib.
5 At tchi tuj twitz,
mya nok oꞌcx tiꞌjx toc tcꞌuꞌj;
mya txꞌuꞌj twiꞌ,
ex mintiꞌ in xi tcꞌuꞌn kꞌoj.
6 Mintiꞌ in tzalaj tiꞌj ju mya baꞌn in cybinchaꞌn xjal,
oꞌcx in tzalaj tiꞌj ju yol ax toc.
7 Tcyakil nnicꞌx tuꞌn,
tcyakil niman tuꞌn,
ex tuj tcyakil ayoꞌn tuꞌn,
ex at tpasens tuj tcyakil.
8 Aju cꞌujlalil mlay baj;
pero tzul tkꞌijlalil tuꞌn miꞌn t-xi kchicꞌbaꞌntl aju in tzaj tmaꞌn Dios ke,
ex cwebel tuꞌn kyolin tuj junxilchak yol,
ex cbajel ojtzkibl.
9 Porque aju ojtzkiꞌn kuꞌn nok chꞌin,
ex aju tyol Dios in xi kchicꞌbaꞌn nok chꞌin.
10 Octzun tul aju tzꞌaklxix,
aju mya tzꞌaklxix cbajel.
11 Tej cꞌwaꞌlxtok koꞌ,
in ko yolin ic tzaꞌn ke cꞌwaꞌl,
ic tten knabl ic tzaꞌn cynabl cꞌwaꞌl,
ex in ko ximan ic tzaꞌn ke cꞌwaꞌl;
pero tejtzun xko oc tij xjal,
cyaj kkꞌoꞌn aju in cybinchaꞌn cꞌwaꞌl.
12 Jaꞌlo in xi kqueꞌyin ic tzaꞌn tuj jun espej myaxix kꞌanchaꞌl;
pero tzul tkꞌijlalil cꞌoquel kqueꞌyin kwitz.
Jaꞌlo nok chꞌin ma tzꞌel knicꞌ tiꞌj,
pero tuj tkꞌijlalil tzul cꞌelel baj knicꞌ tiꞌj tcyakil,
ic tzaꞌn ke ma ko ojtzkinjtz tuꞌn Dios.
13 Jaꞌlo cucx tten kocslabl,
ex cucx tkeꞌ kcꞌuꞌj tiꞌj Dios,
ex cucx tten kcꞌujlalil;
mlay che baj ox lu;
pero aju mas maꞌ t-xilen cyxol jlu,
aju kcꞌujlalil.