Aju oclenj in tzaj tkꞌoꞌn Xewbaj Xjan te teyle junjun
12
Erman,
waje tuꞌn cybinteye tiꞌj ju koclen in tzaj tkꞌoꞌn Xewbaj Xjan te teyle junjun ke.
2 Biꞌn cyuꞌne,
naꞌnxtok t-xi cyocslaꞌne,
xi cykꞌon cyibe tuꞌn cyoc lpeꞌye cyiꞌj ke tilbilal men ke.
3 Cyjaꞌtzun cxel nmaꞌne cyeye tuꞌn cybinteye,
ka at jun xjal at T-xew Dios tucꞌil,
mlayx tma tuꞌn t-xiꞌ Jesús tuj najen;
ex mlayx tma jun xjal:
Ate Jesús Wajawe,
ka mintiꞌ Xewbaj Xjan tucꞌil.
4 Jaꞌlotzun,
teyle junjun ke at junxilchak koclen pero axte Xewbaj Xjan in tzaj kꞌonte.
5 Ex at junxilchak tumel tuꞌn kajben,
pero oꞌcx jun Kajaw tuꞌn kajben te.
6 Ex at junxilchak tumel tuꞌn kakꞌnan,
pero axte Dios in akꞌnan kucꞌil kcyakil tuꞌn tbant tcyakil.
7 Pero teyle junjun in tzaj kꞌoꞌn toclen tuꞌn Xewbaj Xjan tuꞌn tajben cye cycyakil.
8 Porque at junjun in tzaj tkꞌoꞌn Xewbaj Xjan cyoclen tuꞌn cyyolin tucꞌil nabl;
atzun cye junjuntl in tzaj kꞌoꞌn nim cyojtzkibl tuꞌn cyyolin,
axju Xewbaj Xjan in tzaj kꞌonte.
9 Ex te junjuntl in tzaj kꞌoꞌn toclen tuꞌn tkeꞌxix tcꞌuꞌj tiꞌj Dios,
tuꞌnx ju Xewbaj Xjan;
ex cye junjuntl in tzaj kꞌoꞌn cyoclen tuꞌnx ju Xewbaj Xjan tuꞌn cybanix ke yab cyuꞌn.
10 Ex cye junjuntl in tzaj kꞌoꞌn cyoclen tuꞌn cybinchanjtz ke binchben nim tipumal;
ex cye junjuntl in tzaj kꞌoꞌn cyoclen tuꞌn t-xi cychicꞌbaꞌn aju in tmaꞌn Dios cye;
ex cye junjuntl in tzaj kꞌoꞌn cyoclen tuꞌn tel cynicꞌ tiꞌj cyyol ke xjal pacbal ka ax toc ex ka miꞌn;
ex cye junjuntl in tzaj kꞌoꞌn cyoclen tuꞌn cyyolin tiꞌj junxilchak yol;
atzun cye junjuntl in tzaj kꞌoꞌn cyoclen tuꞌn tel pjet junxilchak yol.
11 Pero tcyakil jlu axte Xewbaj Xjan in binchante junx te,
in xi t-sipan toclen teyle junjun ic tzaꞌnx tajbil.
Kcyakil kocsaꞌn tiꞌj junx kximlal
12 Porque ic tzaꞌn tten kximlal nok junx ex nimcu toc tiꞌj,
pero cycyakil keju ateꞌc tiꞌj kximlal masque nimcu cybet pero nok junx kximlal,
icxtzun tten Cristju.
13 Porque nok tuꞌn jun Xewbaj Xjan ma ko byan kcyakil tuꞌn koc te junx kximlal,
masque judiy xjal koꞌ ex ka grieg xjal,
masque tzyuꞌn koꞌ te majen ex ka tzokpiꞌn koꞌ,
ex junx Xewbaj Xjan ma kcꞌam kcyakil.
14 Aju kximlal mya junx tten,
nimcu toc tiꞌj.
15 Ka ma tma kkan:
Mya kꞌabaj kine cyjaꞌtzun mya tiꞌj t-ximlal xjal atine,
chiwt,
¿tuꞌnpetzun jlu mintiꞌ toclen tiꞌj kximlal?
16 Ex ka ma tma kẍcyin:
Mya tbakꞌ witzbaj kine cyjaꞌtzun mya tiꞌj t-ximlal xjal atine,
chiwt,
¿tuꞌnpetzun jlu mintiꞌ toclen tiꞌj kximlal?
17 Nokwit oꞌcx tbakꞌ kwitz toc tiꞌj tcyakil kximlal,
¿tzaꞌntzun tten tuꞌn kbin?
Nokwit oꞌcx kẍcyin toc tiꞌj tcyakil kximlal,
¿tzaꞌntzun tten tuꞌn tbant kskonte?
18 Atzun jaꞌlo tcyakilju toc tiꞌj kximlal,
ate Dios oc kꞌonte teyle junjun ic tzaꞌnx tajbil.
19 Akeju ateꞌc tiꞌj kximlal nokwit junx cyten,
¿tzaꞌnwtlo tten kximlal?
20 Atzun jaꞌlo nimcu toc kiꞌj,
pero junx kximlal.
21 Mlay bant tmante tbakꞌ kwitz te kkꞌab:
Mintiꞌ tajbena weye,
chiwt.
Ex mlay bant tmante kwiꞌ te kkan:
Mintiꞌ cyajbene weye,
chiwt.
22 Akeju ateꞌc tiꞌj kximlal chꞌin cyipun,
alpe keju at-xix cyajben.
23 Akeju nok chꞌin cyoclen tuj knabl toc tiꞌj kximlal,
mas xbalumiꞌnxix kuꞌn;
ex akeju mya baꞌnxix che queꞌyin,
mas cwentinxix ke kuꞌn.
24 Porque akeju baꞌnxix che queꞌyin toc kiꞌj,
mintiꞌ mastl at tajben cye.
Biꞌx cyaj bant tten tuꞌn Dios tcyakilju toc tiꞌj kximlal,
ex aju chꞌin toclen toc tiꞌj kximlal xi tkꞌoꞌn Dios mas toclen,
25 tuꞌntzun miꞌn tel cyicꞌun cyib keju ateꞌc tiꞌj kximlal,
oꞌcx tuꞌn toc cycwentin cyib cyxolx.
26 Ka at jun toc tiꞌj kximlal ma cꞌixbi,
cycyakil keju ateꞌc tiꞌj kximlal nnicꞌx cyuꞌn junx tucꞌil;
ex ka at jun toc tiꞌj kximlal in tcꞌmoꞌn jun nimbil,
cycyakil keju ateꞌc tiꞌj kximlal in che tzalaj junx tucꞌil.
27 Cyjaꞌtzun cytene,
t-ximlal Crist keye,
ex teyle junjun cyeye toc tiꞌj t-ximlal Crist.
28 Ex oc tkꞌoꞌn Dios cyoclen junjun cyxol cycyakil ocslal:
Tnejelxix ke apostl,
tcabin ke t-sanjel Dios,
toxin ke xnakꞌtzal,
ax icx keju in bant binchben nim tipumal cyuꞌn,
ex keju in che banix ke yab cyuꞌn,
ex keju in che onin,
ex keju in che cawin,
ex keju in che yolin tiꞌj junxilchak yol.
29 ¿Cycyakilpe apostl ke?
¿Cycyakilpe t-sanjel Dios ke?
¿Cycyakilpe xnakꞌtzal ke?
¿Cycyakilpe in che binchan binchben nim cyipumal?
30 ¿Cycyakilpe at cyoclen tuꞌn cybanix ke yab cyuꞌn?
¿Cycyakilpe in che yolin tiꞌj junxilchak yol?
¿Cycyakilpe in pjet yol cyuꞌn?
31 Cyjaꞌtzun cykꞌoꞌnque tilil tuꞌn tten cyoclene mas baꞌnxix.
Pero cxel nyecꞌune cyeye jun tumel mas baꞌnxix.