11
Cycanoꞌmele wiꞌje,
ic tzaꞌn weye ma tzꞌel ncanoꞌne tiꞌj Crist.
Tzaꞌn tten tuꞌn cyten xuꞌj tuj cꞌulbil
2 Cxel nkꞌoꞌne chjonte cyeye erman porque tuj tcyakil in chin tzaj cynaꞌne,
ex tzyuꞌnx ju xnakꞌtzbil cyuꞌne ic tzaꞌn xi nkꞌoꞌne cyeye.
3 Porque waje tuꞌn cybinteye,
ate Crist nejenel te tcyakil xinak,
atzunte xinak nejenel te xuꞌj,
ex ate Dios nejenel te Crist.
4 Ka at jun xinak in naꞌn Dios ex ka in xi tchicꞌbaꞌn aju in tmaꞌn Dios te ex tjax tpasbil tuj twiꞌ,
jun chꞌixbajil jlu tiꞌj twiꞌ.
5 Pero ka at jun xuꞌj in naꞌn Dios ex in xi tchicꞌbaꞌn aju in tmaꞌn Dios te ex mintiꞌ jun xbalun tjax tuj twiꞌ,
jun chꞌixbajil jlu tiꞌj twiꞌ;
porque junx taꞌ mer ic tzaꞌn otok tzꞌel tcꞌoẍin tiꞌj twiꞌ.
6 Porque ka mintiꞌ in jax tkꞌoꞌn xuꞌj jun xbalun tuj twiꞌ,
matzoꞌmil ttzmal twiꞌ;
katzun at tchꞌixwi xuꞌj tiꞌj tuꞌn tel tmatzoꞌn ttzmal twiꞌ ex ka tuꞌn tel tcꞌoẍin tiꞌj twiꞌ,
entons baꞌn tuꞌn tjax tkꞌoꞌn jun xbalun tuj twiꞌ.
7 Ate xinak miꞌn jax tkꞌoꞌn tpasbil tuj twiꞌ,
porque tilbilal Dioste ex in tyecꞌun tajwalil Dios tiꞌj,
atzunte xuꞌj in yecꞌunjtz tajwalil xinak tiꞌj.
8 Porque ate xinak mya tiꞌj xuꞌj ela,
ate xuꞌj el tiꞌj xinak.
9 Ex mya tuꞌn tlaj xuꞌj o binchanjtz te xinak,
ate xuꞌj o binchanjtz tuꞌn tlaj xinak.
10 Cyjaꞌtzun il tiꞌj tuꞌn tjax tkꞌoꞌn xuꞌj jun xbalun tuj twiꞌ,
tuꞌn toc te jun techal ka at toclen tchmil tiꞌj,
tuꞌn cylaj ke anjel.
11 Pero ic tzaꞌn cyaj bant tiꞌj tuꞌn Kajaw,
ate xinak at tajben xuꞌj te,
ex ate xuꞌj at tajben xinak te.
12 Porque ic tzaꞌn te xuꞌj tiꞌj xinak ela,
ax icxtzun cye xinak tiꞌj xuꞌj in che el itzꞌj;
ex tcyakil tucꞌil Dios in tzaj.
13 Ax keye che ximane tiꞌj jlu:
¿Baꞌnpe tuꞌn tnaꞌn xuꞌj Dios mya tjax xbalun tuj twiꞌ?
14 ¿Myapetzun kuꞌnx nneꞌl knicꞌ tiꞌj,
ka ma chꞌiy ttzmal twiꞌ xinak in tzaj tchꞌixwi?
15 Atzunte xuꞌj at tzalajbil te ka ma chꞌiy ttzmal twiꞌ;
porque ma tzaj kꞌoꞌn ttzmal twiꞌ xuꞌj tuꞌn tajben te txaybil tiꞌj twiꞌ.
16 Ka at jun taj tuꞌn tkꞌojl tuꞌn tlaj jlu,
baꞌn tuꞌn tel tnicꞌ tiꞌj,
keye mintiꞌ in kbinchaꞌne juntl costumr,
icx ke mastl ocslal tuj junjun iglesi etzan ke tuꞌn Dios.
Mya tuj tumel in che waꞌn tiꞌj Santa Sena
17 Cxel nmaꞌne juntl yol cyeye,
pero mlay txi nmaꞌne ka baꞌn in cybinchaꞌne;
porque oc nnoꞌc cychmon cyibe tuj cꞌulbil,
mintiꞌ jun baꞌn in cycꞌmoꞌne tiꞌj,
nok mas mya baꞌn nneꞌla te cyeye.
18 Tnejelxix,
oc nnoꞌc cychmon cyibe cycyakile ocslal keye,
in nbiꞌne ka at pabl tib cyxole,
ex tuj nnable ax toc junjun yol.
19 Porque il tiꞌj tuꞌn tten pabl tib cyxole,
tuꞌntzun tel cynicꞌe cyiꞌj keju axix toc ocslal ke cyxole.
20 Porque oc toc cychmon cyibe mintiꞌ tumel tuꞌn cywaꞌne tiꞌj ju wabj cyaj tmaꞌn Kajaw.
21 Porque oc in che waꞌne,
teyle junjun nej in waꞌn tiꞌj ju tex twa;
cyjaꞌtzun at junjun mintiꞌ in waꞌn tuꞌnju mintiꞌ twa,
atzun junjuntl biꞌx in chyoꞌn cywiꞌ tuꞌnju nim in xiꞌ cyuꞌn.
22 ¿Titzun tten icju?
¿Mintiꞌpe cyjaye jatum tuꞌn cywaꞌne ex tuꞌn cycꞌane?
¿Myapetzun tuꞌn jlu nneꞌl cyicꞌune ke ocslal etzan ke tuꞌn Dios,
ex in tzaj cychꞌixwi keju mintiꞌ cye?
¿Titzun cxel nmaꞌne?
¿Ocpelo cxel nmaꞌne ka baꞌn in cybinchaꞌne?
Tiꞌj jlu mlay txi nmaꞌne ka baꞌn in cybinchaꞌne.
Aju xnakꞌtzbil tiꞌj Santa Sena
23 Porque aju xnakꞌtzbil tzaj tkꞌoꞌn Kajaw weye,
axju xi nkꞌoꞌne cyeye:
Tzaj ttzyuꞌn Kajaw Jesús pan ax konicꞌan tej t-xi kꞌoꞌn tuj cykꞌab xjal;
24 ex tbajlenxi tkꞌoꞌn chjonte,
cub t-sipan ju pan cyxol ex tma:
Cytzyunxe ex cywaꞌnxe;
atzun nximlale jlu cjawil kꞌoꞌn twitz crus tuꞌn cyclete,
cybinchame jlu te nabl weye.
25 Ax icx tzaj ttzyuꞌn ju vas tbajlenxi waꞌn ex tma:
Aju tcuꞌx tuj vas lu,
atzun acꞌaj yolju tziyiꞌmaj wuꞌne tuꞌn nchcꞌele;
tcyakil maj oc t-xi cycꞌane jlu,
cybinchame te nabl weye,
chi Jesús cye.
26 Cyjaꞌtzun,
tcyakil maj oc t-xi cywaꞌne ju pan lu ex oc t-xi cycꞌaꞌne aju tcuꞌx tuj vas lu,
in cyyecꞌune tiꞌj tcyimlen Kajaw;
maxi cxel cycoline ocxi tul.
Tzaꞌn tten tuꞌn kwaꞌn tiꞌj ju Santa Sena
27 Cyjaꞌtzun,
alcye jun ma waꞌnte ju pan lu ex ma cꞌante ju cꞌabj lu aju cyaj tmaꞌn Kajaw,
ka mya xoꞌn tuꞌn,
at til tuꞌnju mya xoꞌn t-ximlal ex tchcꞌel Kajaw tuꞌn.
28 Cyjaꞌtzun,
teyle junjun tuꞌn t-ximan tiꞌjx ka baꞌn tten,
tuꞌntzun twaꞌn tiꞌj ju pan ex tuꞌn tcꞌan tiꞌj ju cꞌabj.
29 Porque alcye jun in xi twaꞌn ex in xi tcꞌaꞌn,
ka mya xoꞌn tuꞌn ex mintiꞌ nneꞌl tnicꞌ tiꞌj ka atzun t-ximlal Kajaw jlu,
tuꞌnx in tzaj tiꞌn jun castiw tibaj,
tuꞌnju in xi twaꞌn ex in xi tcꞌaꞌn.
30 Tuꞌntzun tlaj jlu at nimcu yab cyxole ex nimcu mintiꞌ cyipun,
ex at junjun o che cyim.
31 Nokwit in ko ximan kiꞌjx tzaꞌn kten,
mintiꞌwtlo in cub kcastiw tuꞌn Kajaw.
32 Katzun ma ko oc tuj xjel tuꞌn Kajaw,
in tzaj tkꞌoꞌn Kajaw chꞌin kcastiw,
tuꞌntzun miꞌn tcub ksentens tuꞌn knaj junx cyucꞌil cycyakil xjal.