In che jyon xjal tumel tzaꞌn tten tuꞌn ttzyet Jesús
14
Atxtok cab kꞌij tuꞌn ticꞌset Xjan Kꞌij ex tuꞌn t-xi cywaꞌn xjal pan mintiꞌ t-samel tuꞌn tjaw mal tcꞌuꞌj;
atzun ke nejenel cye pal cyucꞌix ke xnakꞌtzal tiꞌj ley in che jyon tumel tzaꞌn tten tuꞌn ttzyet Jesús cyuꞌn tuj ewaj ex tuꞌn tcub cybyoꞌn.
2 —Mya tuj ninkꞌij tuꞌn ttzyet kuꞌn,
tuꞌntzun miꞌn cyjaw tilj xjal,
che chi.
Jax koꞌn perjum tibaj twi Jesús tuꞌn jun xuꞌj
3 Attok Jesús tuj Betania tuj tja Simón aju at txꞌaꞌc tiꞌj nej,
aju txꞌaꞌc mintiꞌ kꞌanbil tiꞌj;
ex kꞌukltok Jesús tiꞌj mes,
ultzun jun xuꞌj kꞌiꞌn jun tal botey tuꞌn,
alabastro ttxꞌotxꞌil,
nojni tuꞌn perjum nardo tbi,
junxte,
mya smoꞌn,
ex puro wiꞌyilxix:
cubtzun tpaꞌn xuꞌj ju tal botey,
jax tkoꞌn perjum tibaj twiꞌ Jesús.
4 Pero at junjun tzaj tloꞌch cycꞌuꞌj ex cyma cyxolx:
—¿Tikuꞌn nokx gan ma naj perjum lu?
5 Porque mawtlo txi cꞌayit tuꞌn ox syent denari pwak ex ka mastl,
tuꞌn t-xi kꞌot cye meba,
che chi.
Ex oc ilin xuꞌj cyuꞌn.
6 Atzunte Jesús xi tmaꞌn cye:
—E tten xuꞌj,
¿tikuꞌn in che labte tiꞌj?
Baꞌn ma tbincha weye.
7 Ke xjal meba cucx che tel cyucꞌile,
ex alcye kꞌij cyajbile tuꞌn cyonine cyiꞌj,
baꞌn tuꞌn cybinchanteye baꞌn cye;
atzun weye,
mya cucx chin tele cyucꞌile.
8 Aju baꞌn tbant tuꞌn xuꞌj lu ma tbincha;
porque ma tzꞌoc tkꞌoꞌn naj perjum tiꞌj nximlale naꞌnxtok ncuꞌx makuꞌne.
9 Ax toc cxel nmaꞌne cyeye,
tuj tcyakil lugar jatum cxel pacbet tkanil colbil tuj tcyakil twitz txꞌotxꞌ,
ax icx cxel kꞌmet aju ma tbincha xuꞌj lu,
te nabl te.
Xi cꞌayin Jesús tuꞌn Judas
10 Atzunte Judas Iscariote,
jun cye cablaj xnakꞌtzben,
xiꞌ cyucꞌil nejenel cye pal,
kꞌmalte cye tuꞌn t-xi kꞌoꞌn Jesús tuj cykꞌab tuꞌn.
11 Tejtzun cybinte jlu e jaw tzalajxix,
ex o bant tiꞌj cyuꞌn tuꞌn t-xi cykꞌoꞌn chꞌin pwak te Judas.
Atzunte Judas oc ten jyol jun tumel tzaꞌn tten tuꞌn t-xi kꞌoꞌn Jesús tuj cykꞌab.
Waꞌn Jesús cyucꞌil t-xnakꞌtzben tuj Xjan Kꞌij
12 Canuntzun tnejel kꞌij tuꞌn cywaꞌn xjal pan mintiꞌ t-samel tuꞌn tjaw mal tcꞌuꞌj,
atzun kꞌij tuꞌn tcub byet ju tal ẍneꞌl te icꞌsbil Xjan Kꞌij.
Xitzun cymaꞌn ke t-xnakꞌtzben Jesús te:
—¿Jatum tajbila tuꞌn kxiꞌye binchal wabj tuꞌn twaꞌna tuj Xjan Kꞌij?
La última cena (Marcos 14.12-26)
13 Xitzun t-samaꞌn Jesús cabe t-xnakꞌtzben,
ex xi tmaꞌn cye:
—Cyxiꞌye tuj tnam ex cꞌoquel cycꞌulbaꞌne jun xinak kꞌiꞌn jun ẍokꞌ aꞌ tuꞌn;
che lpeꞌxtzune tiꞌj.
14 Octzun tocx tuj jun ja,
cxel cymaꞌne te tajaw ja:
¿Alcye jun col ja jatum tuꞌn nwaꞌne cyucꞌil nxnakꞌtzbene tuꞌn ticꞌset Xjan Kꞌij?
Chi Xnakꞌtzal,
che chicuye.
15 Ctzajeltzun tyecꞌun jun tcab colin ja maꞌxix,
banimaj tten;
atzun cybinchame kwa,
chi Jesús cye.
16 E jeꞌxtzun ke t-xnakꞌtzben,
ex e ocx tuj tnam,
cnettzun ju ja cyuꞌn ic tzaꞌn otok txi tmaꞌn Jesús cye;
bajtzun cybinchaꞌn wabj tuꞌn ticꞌset Xjan Kꞌij.
17 Tejtzun toc kax,
pontzun Jesús cyucꞌix keju cablaj t-xnakꞌtzben.
18 Tejtzun cycub keꞌ tiꞌj mes,
matok in che waꞌn,
xi tmaꞌn Jesús cye:
—Ax toc cxel nmaꞌne cyeye,
ax jun cyeye aju in waꞌn wucꞌile cxel kꞌonte weye tuj cykꞌab xjal,
chi cye.
19 Atzun cye t-xnakꞌtzben tzaj cybis,
ex teyle junjun xi tmaꞌn te:
—¿Apelo kine?
Chi jun.
Ax icx tma juntl,
ax icx tma juntl.
20 Xitzun ttzakꞌweꞌn Jesús:
—Cablaj cybete nxnakꞌtzben keye,
pero ax jun cyxole cxel kꞌonte weye tuj cykꞌab xjal.
Aju in cuꞌx tmuꞌn twa tuj lak junx wucꞌile,
atzunju.
21 Ax toc chin xel kꞌoꞌne tuj cykꞌab xjal ic tzaꞌn ju yol tzꞌiban wiꞌje tuj Tuꞌjil,
pero becꞌbil twitz ju xjal aju cxel kꞌonte weye tuj cykꞌab xjal,
akine scꞌoꞌmaj kine tuꞌn Dios tuꞌn ntene cyucꞌil xjal.
Mas baꞌnwtlo miwt o itzꞌj ju xjal lu,
chi Jesús cye.
22 Cucxtok cywaꞌn,
jaw ttzyuꞌn Jesús ju pan,
xi tkꞌoꞌn chjonte te Dios,
cub tpiẍcꞌuꞌn,
xi tkꞌoꞌn cye ex xi tmaꞌn:
—Cywaꞌnxe jlu,
atzun nximlale jlu.
23 Ax icx jaw ttzyuꞌn ju vas,
xi tkꞌoꞌn chjonte te Dios ex xi tkꞌoꞌn cye;
cycyakiltzun e cꞌan tiꞌj.
24 Ex xi tmaꞌn cye:
—Atzun nchcꞌele jlu te cyuwsabl teju acꞌaj yol aju ma cyaj bant tiꞌj tuꞌn Dios cyucꞌile;
atzun nchcꞌele cꞌelel chitj tuꞌn cyclet nimcu xjal.
25 Ax toc cxel nmaꞌne cyeye,
mlay txi ncꞌaꞌntle juntl maj taꞌl twitz uva jaꞌlo,
maxitzun cxel ncꞌaꞌntle tuj tkꞌijlalil oc tul tcawbil Dios.
Chin bel tewana ox maj, chi Jesús te Pedro
—Cycyakile che cyjel colinte weye tuj konicꞌan jaꞌlo;
porque in tmaꞌn tuj Tuꞌjil:
Cbel nbyoꞌne ju pastor,
ex che elel sputj ke ẍneꞌl.
28 Pero njatzlenxi ankꞌine,
nej chin pole cywitze tuj Galiley.
29 Xitzun tmaꞌn Pedro te Jesús:
—Masque cyjel colina cyuꞌn cycyakil,
atzun weye mlayx cyaj ncoline,
chi Pedro.
30 Xi tmaꞌn Jesús te:
—Ax toc cxel nmaꞌne teya,
teju konicꞌan jaꞌlo,
naꞌnxtok ttzaj okꞌ tcabmajiꞌn tzecꞌ,
ox maj cbel tewana cywitz xjal ka mintiꞌ ojtzkiꞌn kine tuꞌna.
31 Atzunte Pedro xi tcyuwsaꞌnxix:
—Masque chin cyime tucꞌila ma bant-x pero mlay cub wewane,
chi Pedro.
Ax icx o cyma cycyakil.
In naꞌn Jesús Dios tuj Getsemaní
32 E ultzun tuj jun lugar Getsemaní tbi;
ex xi tmaꞌn Jesús cye t-xnakꞌtzben:
—Che kecuye tzalu,
atzun weye chin naꞌle Dios.
Jesús es arrestado e interrogado (Marcos 14.32-72)
33 Ex xi ucꞌin Pedro tuꞌn Jesús,
tucꞌix Jacobo ex Juan;
tzajtzun nim tbis ex tzaj taꞌw tuj tanmi,
34 ex xi tmaꞌn cye:
—Ma tzajxix bis tuj wanmiye,
chin cymele tuꞌn bis;
che tencje tzalu ex che xkꞌukine,
chi Jesús.
35 Ex xi lakꞌeꞌ chꞌintl Jesús,
cub mutzeꞌ twitz txꞌotxꞌ,
o cubsan twitz Dios ex tma:
—Ka at tumel,
cuchiwt tuꞌn miꞌn ticꞌx wuꞌne aju cꞌixcꞌoj tzul tuj or lu.
36 Tat,
aya Nman,
tcyakil jacu bant tuꞌna;
kꞌiꞌmela cꞌixcꞌoj lu wiꞌje tuꞌn miꞌn ticꞌx wuꞌne;
pero mya tuꞌn tbant aju wajbile,
nok oꞌcx tuꞌn tbant aju tajbila,
chi Jesús.
37 Ultzun meltzꞌaj Jesús cyucꞌil t-xnakꞌtzben,
in che tan tej tul;
xi tmaꞌn te Pedro:
—Simón,
¿maj in tana?
¿Maj mintiꞌ ma tipaya tuꞌn t-xkꞌukina jun or?
38 Che xkꞌukine ex che naꞌne Dios tuꞌntzun miꞌn cyoque tuj joybil cyiꞌje.
Ax toc tajbil cyanmiye,
atzunju cychibjale mintiꞌ tipun.
39 Xiꞌ Jesús juntl maj ex oc ten naꞌl Dios,
ax yol xi tmaꞌn ic tzaꞌn xi tmaꞌn nej.
40 Tej tul meltzꞌaj juntl maj cyucꞌil t-xnakꞌtzben,
lu ke in che tantl,
porque attok nim watl tuj cywitz,
ex mintiꞌ baꞌn cyuꞌn alcye tuꞌn t-xi cymaꞌn.
41 Tejtzun tul meltzꞌaj toxmajiꞌn,
xi tmaꞌn cye:
—Che tanxtzune jaꞌlo ex che ojlane.
Oꞌcxtzunju,
ya ma pon or;
lu kine chin xel kꞌoꞌne tuj cykꞌab aj il,
akine scꞌoꞌmaj kine tuꞌn Dios tuꞌn ntene cyucꞌil xjal.
42 Che weꞌctze,
koꞌke;
lu ma tzul lakꞌeꞌ aju cxel kꞌonte weye tuj cykꞌab xjal,
chi Jesús cye.
Tej t-xi kꞌiꞌn Jesús pres
43 Cucxtok tyolin Jesús pon naj Judas,
jun cyxol keju cablaj xnakꞌtzben,
cyucꞌix nim xjal tucꞌil,
kꞌiꞌn spad cyuꞌn tucꞌix tzeꞌ,
otok che tzaj samaꞌn cyuꞌn nejenel cye pal ex cyuꞌn xnakꞌtzal tiꞌj ley ex cyuꞌn cytijil xjal.
44 Otok txi tmaꞌn Judas cye tzaꞌn tten tuꞌn t-xi tkꞌoꞌn tuj cykꞌab:
—Aju cꞌelel ntzꞌubane twitz,
atzunju;
cytzyuntztzune ex cyiꞌnxe,
miꞌn txi cytzokpiꞌne,
chi Judas.
45 Tejtzun tpon Judas tucꞌil Jesús,
jurat naj pon lakꞌeꞌ ttxlaj,
ex tma:
—Xnakꞌtzal,
Xnakꞌtzal.
47 Pero at jun cyxol keju ax waꞌl keꞌtok,
jatz tiꞌn t-spad ex oc ttxꞌemin tmajen nejenel cye pal,
biꞌx el t-ẍcyin tuꞌn.
48 Xitzun tmaꞌn Jesús cye xjal:
—¿Elekꞌpe kine tuj cywitze ma che ule tzyul weye,
kꞌiꞌn spad cyuꞌne tucꞌix tzeꞌ?
49 Tcyakil kꞌij in tene cyxole tuj tja Dios,
xi nkꞌoꞌne xnakꞌtzbil cyeye,
ex mintiꞌ in tzaj cytzyuꞌne;
pero ma cybinchaye jlu tuꞌntzun tjapun aju yol tzꞌiban tuj Tuꞌjil,
chi Jesús cye.
50 Cyajtzun colin Jesús cyuꞌn cycyakil xnakꞌtzben,
e jeꞌl ok.
Aju cuꞌxun el ok
51 Pero at jun cuꞌxun lepchix t-xiꞌ tiꞌj Jesús,
mintiꞌ t-xbalun toc,
nok oꞌcx jun sábana baltzꞌiꞌn tiꞌj,
tzyettzun cyuꞌn xjal.
52 Atzunte cuꞌxun cyaj cotpaj aju sábana toc tiꞌj,
ex el ok skiꞌt tiꞌj.
Pon kꞌiꞌn Jesús cywitz aj sanjelal
53 Xitzun kꞌiꞌn Jesús cyuꞌn twitz nejenel cye pal;
ex oc cychmon cyib cycyakil nejenel cye pal cyucꞌix ke cytijil xjal ex ke xnakꞌtzal tiꞌj ley.
54 Atzunte Pedro lepchix t-xi najchak,
ocx max ttxaꞌn tpeꞌn nejenel cye pal;
ex ax cub keꞌ cyxol ke polisiy in kꞌaxnen kꞌakꞌ.
55 Atzun ke nejenel cye pal cyucꞌix cycyakil aj sanjelal cye xjal judiy in che jyon cyiꞌj xjal tuꞌn cyoc te testiw tiꞌj Jesús tuꞌn tcub t-sentens Jesús tuꞌn tcyim;
pero mintiꞌ o cnet cyuꞌn jun testiw axix toc tyol.
56 Porque nimcu xjal e nicꞌan yol tiꞌj,
pero mintiꞌ mojeꞌ cyyol.
57 E jawtzun weꞌ junjun xjal,
e oc ten siꞌmil yol tiꞌj,
in cymaꞌn:
58 —O kbiye in tmaꞌn xjal lu:
Cbel nxitune tja Dios lu,
aju cyuꞌn xjal o bant,
ex tuj ox kꞌij cjawil nbinchaꞌne juntl tja Dios mya cyuꞌn xjal cbantel,
chi xjal lu,
che chi.
59 Pero icx ke xjal lu mintiꞌ mojeꞌ cyyol.
60 Jawtzun weꞌ ju nejenel cye pal ex xi tkanin te Jesús:
—¿Maj mintiꞌ in tzaj ttzakꞌweꞌna?
¿Chi toc tuꞌna tiꞌj ju in cymaꞌn ke xjal lu tiꞌja?
61 Atzunte Jesús mintiꞌ o kꞌajt,
ex mintiꞌ jun yol xi tmaꞌn.
Atzunte nejenel cye pal xi tkanin juntl maj te Jesús:
—¿Apeya ju Crist Tcꞌwaꞌl Dios,
aju Dios nimanxix tbi kuꞌn?
Chi xjal.
62 Xi tmaꞌn Jesús te:
—Akine,
ex oc cyilaꞌye kꞌukl kine tuj bankꞌabaj ttxlaj Dios at nim tipumal,
akine scꞌoꞌmaj kine tuꞌn Dios tuꞌn ntene cyucꞌil xjal,
ex oc cyilaꞌye oc ntzaje tuj muj twitz cyaꞌj,
chi Jesús.
63 Atzunte nejenel cye pal el t-sbitꞌun t-xbalun ex tma:
—¿Ti til mastl testiw ke?
64 Ma cybiye ma yolin mya baꞌn tiꞌj Dios.
¿Chi toc cyuꞌne?
Chi nejenel cye pal.
Cycyakiltzun o cyma:
At til,
baꞌn tuꞌn tcub t-sentens tuꞌn tcyim,
che chi.
65 E octzun ten junjun tzubal tuj twitz,
oc cymaksiꞌn twitz,
ex oc cybjuꞌn,
ex xi cymaꞌn te:
—Kꞌmantza alcye ma tzꞌoc bjun teya,
che chi.
Icx ke polisiy oc cytzꞌajan twitz.
Cub tewan Pedro ka mintiꞌ ojtzkiꞌntok Jesús tuꞌn
66 Atzunte Pedro tcuꞌtztok ttxaꞌn peꞌn;
ultzun jun tcriad nejenel cye pal;
67 tejtzun tlonte criad lu Pedro in kꞌaxnen kꞌakꞌ,
xi tqueꞌyin criad twitz Pedro ex tma:
—Icx teya o tena tucꞌil Jesús aj Nazaret.
68 Atzunte Pedro cub tewan ex tma:
—Mintiꞌ ojtzkiꞌn xjal lu wuꞌne,
ex mintiꞌ nneꞌl nnicꞌe tiꞌj ju in tmaꞌna,
chi Pedro.
Etztzun lakꞌeꞌ Pedro ttzi sawan ex tzajtzun okꞌ tzecꞌ.
69 Oc tqueꞌyin criad juntl maj tiꞌj Pedro,
octzun ten criad kꞌmalte cye xjal ax ateꞌtok:
—Ajun te xjal lu cyucꞌil.
70 Atzunte Pedro cub tewan juntl maj.
Te yajxi chꞌintl tzaj cymaꞌn ke xjal te Pedro,
akeju ax ateꞌtok:
—Ax toc ajuna cyucꞌil porque aj Galileya,
[ex icx yolina ic tzaꞌn cye],
che chi.
71 Xi tmaꞌn Pedro:
—Tzkan Dios ax toc nyole.
Baꞌn tuꞌn ttzaj jun ncastiwoye tuꞌn Dios ka mya ax toc nyole;
mintiꞌ ojtzkiꞌn wuꞌne aju xjal in cymaꞌne,
chi Pedro.
72 Ex tzajtzun okꞌ tcabmajiꞌn tzecꞌ.
Ultzun tiꞌj tcꞌuꞌj Pedro aju yol otok tma Jesús te:
Naꞌnxtok ttzaj okꞌ tcabmajiꞌn tzecꞌ,
ox maj cbel tewana cywitz xjal ka mintiꞌ ojtzkiꞌn kine tuꞌna,
chi Jesús.
Tej tul jlu tuj tnabl Pedro,
biꞌx jaw okꞌ.