3 Xitzun tucꞌin Judas jun cꞌloj soldad ex junjun polisiy e tzaj samaꞌn cyuꞌn ke nejenel cye pal ex cyuꞌn ke parisey.

E jeꞌxtzun jatum taꞌ Jesús,

kꞌiꞌn ttxan tzaj cyuꞌn tucꞌix candil ex cymacbil in che ajben tuj kꞌoj.

4 Atzunte Jesús baꞌntok tuꞌn tcyakilju attok ttzajel tiꞌj,

cyjaꞌtzun etz lakꞌeꞌ cywitz ex xi tkanin cye:

—¿Alcye in che jyoꞌne tiꞌj?

5 Xitzun cytzakꞌweꞌn:

—In ko jyone tiꞌj Jesús aj Nazaret.

Xitzun tmaꞌn Jesús cye:

—Akine.

Ex tucꞌix Judas at cyucꞌil,

aju cyjaꞌtok t-xi kꞌonte Jesús tuj cykꞌab xjal.

6 Tej t-xi tmaꞌn Jesús cye:

Akine,

e aj lakꞌeꞌ ex e aj pacꞌtxaj twitz txꞌotxꞌ.

7 Xitzun tkanin Jesús juntl maj cye:

—¿Alcye in che jyoꞌne tiꞌj?

Xitzun cymaꞌn te:

—In ko jyone tiꞌj Jesús aj Nazaret.

8 Xitzun tmaꞌn Jesús cye:

—Ma txi nmaꞌne cyeye akine.

Cyjaꞌtzun,

ka akine in chin cyjyoꞌne,

cytzokpinxe ke jlu,

chi Jesús cye.

9 O tma Jesús jlu tuꞌntzun tjapun aju yol o tma:

Akeju ma tzaj tkꞌoꞌn Nmane weye,

mi jun ma naj,

chitzun Jesús.

10 Atzunte Simón Pedro kꞌiꞌn jun spad tuꞌn,

jatz tiꞌn tuj tjayil,

ex oc ttxꞌemin tmajen nejenel cye pal,

biꞌx el t-ẍcyin tuꞌn tuj tbankꞌab.

Aju majen lu Malco tbi.

11 Pero xi tmaꞌn Jesús te Pedro:

—Kꞌoncuxa t-spadiye tuj tjayil.

Porque il tiꞌj tuꞌn ticꞌx cꞌixcꞌoj wuꞌne ic tzaꞌn tzaj tmaꞌn Nmane weye.

12 Tzyettzun Jesús cyuꞌn jun cꞌloj soldad ex tuꞌn capitán ex cyuꞌn ke polisiy e tzaj samaꞌn cyuꞌn xjal judiy,

ex baj cꞌaloꞌn Jesús cyuꞌn.

13 Tnejel xi cyiꞌn twitz Anás,

porque atzun tjiꞌ Caipás;

ate Caipás toctok te nejenel cye pal tuj abkꞌi tej tcub byoꞌn Jesús.

14 Ex ate Caipás xi kꞌonte cynabl xjal judiy;

mas baꞌn tuꞌn tcyim junx xjal te cyxel tnam xjal,

chi Caipás.

15 Ex lepchix t-xiꞌ Simón Pedro tiꞌj Jesús,

tucꞌix juntl xnakꞌtzben.

Aju xnakꞌtzben lu ojtzkiꞌn twitz tuꞌn nejenel cye pal,

ex tucꞌix ocx tucꞌil Jesús twitz tja nejenel cye pal.

16 Atzunte Pedro cyaj ten tiꞌjtze ttzi ja.

Cyjaꞌtzun etz aju xnakꞌtzben lu,

aju ojtzkiꞌn twitz tuꞌn nejenel cye pal,

ex o yolin tucꞌil ju txin xkꞌukil ttzi ja,

ocxtzun Pedro tuja tuꞌn ju txin.

17 Atzunte txin xkꞌukil ttzi ja xi tkanin te Pedro:

—¿Myapetzun ajuna cyxol t-xnakꞌtzben xjal lu?

Xitzun tmaꞌn Pedro te:

—Mya ajunwe kin.

18 Atzun cye majen cyucꞌix ke polisiy waꞌl keꞌtok,

otok cub jun kꞌakꞌ cyuꞌn porque nim cheꞌw in cub,

ex in che kꞌaxnen tiꞌj kꞌakꞌ.

Ax icx te Pedro waꞌltok cyucꞌil in kꞌaxnen tiꞌj kꞌakꞌ.

19 Xitzun tkanin nejenel cye pal te Jesús cyiꞌj ke t-xnakꞌtzben ex tiꞌj ju t-xnakꞌtzbil.

20 Xi ttzakꞌweꞌn Jesús.

—Cywitz cycyakil xjal ma chin yoline cye xjal;

cucx ma txi nkꞌoꞌne xnakꞌtzbil cyuj ja te cꞌulbil ex tuj tja Dios jatum nnoꞌc cychmon cyib cycyakil xjal judiy;

ex mintiꞌ ma chin yoline tuj ewaj.

21 ¿Tikuꞌn in tzaj tkanina weye?

Kaninxa cye keju ma che binte nyole alcye ma txi nmaꞌne cye;

baꞌn cyuꞌn alcye ma txi nmaꞌne cye.

22 Tej tmante Jesús jlu,

akꞌpon jun twitz tuꞌn jun polisiy waꞌltok ttxlaj.

Ex tma polisiy cyjaꞌ:

—¿Maj ictzun tten tyola in xi tmaꞌna te nejenel cye pal?

23 Xi ttzakꞌweꞌn Jesús:

—Ka mya baꞌn nyole ma txi nmaꞌne,

chicꞌbantza alcye tpaltil;

katzun baꞌn nyole,

¿tikuꞌntzun in chin oc tbjuꞌna?

Chi Jesús te.

24 Xitzun samaꞌn Jesús tuꞌn Anás,

pon tucꞌil Caipás aju nejenel cye pal.

Cꞌaloꞌntok Jesús cyuꞌn.

25 Atzunte Pedro waꞌltok in kꞌaxnen tiꞌj kꞌakꞌ.

Xitzun cymaꞌn xjal te:

—¿Myapetzun ajuna cyxol t-xnakꞌtzben xjal lu?

Cub tewan Pedro ex tma:

—Mya ajunwe kin.

26 Ex attok jun tmajen nejenel cye pal at t-xilen tucꞌil ju xjal el txꞌemin t-ẍcyin tuꞌn Pedro,

xitzun tmaꞌn xjal te Pedro:

—¿Myapetzun ma wile t-xol tkan awal tucꞌil Jesús?

27 Cub tewan Pedro juntl maj;

ex jurat naj tzak okꞌ tzecꞌ.

28 Etztzun kꞌiꞌn Jesús tuj tja Caipás,

xi kꞌiꞌn tuj tja gobernador.

Primxtok;

atzun cye xjal judiy mintiꞌ e ocx tuj tja gobernador tuꞌn miꞌn cyicꞌ tibaj cyley,

tuꞌntzun t-xi cywaꞌn ju wabj te kale tuj Xjan Kꞌij.

29 Cyjaꞌtzun etz Pilat yolil cyucꞌil ex xi tmaꞌn cye:

—¿Alcye til xjal lu tuj cywitze?

30 Xitzun cytzakꞌweꞌn xjal:

—Nokwit mya binchal mya baꞌn jlu,

miwtlo ma tzul kiꞌne tucꞌila.

31 Xitzun tmaꞌn Pilat cye:

—Cyiꞌnxe tuꞌn toc tuj xjel cyuꞌne ex tuꞌn tcub t-sentens ic tzaꞌn in tmaꞌn cyleye.

Xitzun cymaꞌn xjal judiy te:

—Mya kꞌoꞌn permis keye tuꞌn tcyim jun xjal kuꞌne.

32 Cyma jlu tuꞌntzun tjapun ju yol otok tma Jesús tej tmante tzaꞌn tten tuꞌn tcyim.

33 Ocx juntl maj Pilat tuja,

tzajtzun txcoꞌn Jesús tuꞌn ex xi tmaꞌn te:

—¿Apetzuna Rey cye xjal judiy?

34 Xi tmaꞌn Jesús te:

—¿Axpeya in kꞌmante jlu,

ex ka at juntl ma kꞌmante teya wiꞌje?

35 Xi tmaꞌn Pilat te:

—¿Baka judiy xjal kine?

Ax ke t-xjalila cyucꞌix ke nejenel cye pal ma che ul kꞌinte teya wucꞌile.

¿Ti ma tbinchaya?

36 Xitzun ttzakꞌweꞌn Jesús:

—Aju ncawbile mya te twitz txꞌotxꞌ;

nokwit te twitz txꞌotxꞌ ncawbile,

mawtlo che kꞌojin keju ateꞌ wucꞌile tuꞌn miꞌn nxi kꞌoꞌne tuj cykꞌab xjal judiy.

Pero aju ncawbile myatzun te tzalu.

37 Xitzun tmaꞌn Pilat te:

—¿Maj reytzuna?

Xi ttzakꞌweꞌn Jesús:

—Akine rey ic tzaꞌn ma tmaya.

Atzun wile ma chin ul itzꞌje tuꞌn woque te rey,

ex atzun wile ma chin ule twitz txꞌotxꞌ tuꞌn t-xi nchicꞌbaꞌne ju yol axix toc.

Cycyakil keju in xi cyniman ju yol axix toc,

in xi cybiꞌn nyole,

chi Jesús te.

38 Xitzun tmaꞌn Pilat te:

—¿Titzun t-xilen ju yol axix toc?

Tej tmante Pilat jlu,

etz juntl maj yolil cyucꞌil xjal judiy ex xi tmaꞌn cye:

—Mintiꞌ jun til xjal lu in cnet wuꞌne.

39 Pero nakꞌl keye tiꞌj tuꞌn t-xi ntzokpiꞌne jun pres tuj Xjan Kꞌij.

¿Cyajpeye tuꞌn tex ntzokpiꞌne aju Cyreye akeye xjal judiy?

40 Jawtzun tkꞌajkꞌajel cywiꞌ cycyakil juntl maj ex cyma:

—Mya ate jlu tuꞌn tetz ttzokpiꞌna,

ate Barrabás tzokpiꞌmetza,

che chi.

Ex ate Barrabás elekꞌtok.