3 Ate Judas xi kꞌonte Jesús tuj cykꞌab xjal,

tejtzun tlonte otok cub t-sentens Jesús tuꞌn tcyim,

tzaj taꞌw tuj tanmi,

aj tkꞌoꞌn aju 30 sak pwak cye nejenel cye pal ex cye cytijil xjal ex tma:

4 —Ma chin binchane il,

ma txi nkꞌoꞌne tuj cykꞌabe jun xjal mintiꞌ til,

chi Judas.

Atzun cye cyma:

—Mintiꞌ ke kaj tiꞌj,

malomte tib.

5 Cyajtzun t-xoꞌn Judas aju sak pwak tuj tja Dios,

etztzun,

xiꞌtzun,

jaw tyobin tib ex oc tcꞌaloꞌn tkul tuꞌn tcyim.

6 Atzun cye nejenel cye pal jaw cyiꞌn aju sak pwak ex cyma:

—Mya kꞌoꞌn tuꞌn ley tuꞌn tcuꞌx kkꞌoꞌn tuj cꞌubl te oyaj,

porque aju pwak lu chojbil twiꞌ jun xjal tuꞌn tcyim,

che chi.

7 Tejtzun cybaj yolin tiꞌj,

ajbentzun pwak cyuꞌn tuꞌn tlakꞌet jun piẍ txꞌotxꞌ toc tbi txꞌotxꞌ te binchbil ẍokꞌ,

atzun tuꞌn cycuꞌx makut ke betin xjal tuj txꞌotxꞌ lu.

8 Cyjaꞌtzun oc kꞌoꞌn tbi txꞌotxꞌ:

Txꞌotxꞌ twiꞌ tchcꞌel jun xjal,

ex ax tbi toc jaꞌlo.

9 Cyjaꞌtzun japun aju kꞌmaꞌmaj tuꞌn Jeremías aju t-sanjel Dios.

Chi Jeremías:

Xitzun cyiꞌn aju 30 sak pwak,

atzun twiꞌ jun xjalju cyaj bant tiꞌj cyuꞌn aj Israel.

10 Xi cykꞌoꞌn pwak lu twi txꞌotxꞌ te binchal ẍokꞌ,

ic tzaꞌnx tzaj tmaꞌn Kman weye.

11 Atzunte Jesús waꞌltok twitz gobernador;

xitzun tkanin gobernador te:

—¿Apeya ju Rey cye xjal judiy?

Chi gobernador.

—Akine ic tzaꞌn ma tmaya,

chi Jesús xi tmaꞌn te.

12 Tejtzun cyoc ten ke nejenel cye pal cyucꞌix ke cytijil xjal txꞌolbalte til,

mintiꞌ jun yol tma Jesús.

13 Xitzun tmaꞌn Pilat te:

—¿Mintiꞌpe in tbiꞌna nimcu in kꞌmanjtz tiꞌja cyuꞌn?

14 Pero te Jesús mi jun yol xi ttzakꞌweꞌn;

tuꞌntzunju nim o labin gobernador tiꞌj.

15 Cycyakil abkꞌi in bant tuꞌn gobernador tuꞌn tetz ttzokpiꞌn jun pres tuj ninkꞌij,

nok alcye cyajbil tnam xjal tuꞌn tetz tzokpiꞌn.

16 Attok jun xinak tocx tuj pres,

Barrabás tbi,

biꞌmaj cyuꞌn cycyakil xjal.

17 Tej tbaj cychmon cyib ke xjal,

xi tmaꞌn Pilat cye:

—¿Alcye cyajbile tuꞌn tex ntzokpiꞌne?

¿Cyajpeye tuꞌn tex ntzokpiꞌne Barrabás ex ka a Jesús aju Crist tbi?

Chi Pilat.

18 Porque biꞌntok tuꞌn Pilat,

pon kꞌiꞌn Jesús cyuꞌn nok tuꞌnju at tloꞌch cycꞌuꞌj tiꞌj.

19 Cubtzun keꞌ Pilat tuj kꞌukbil tuꞌn tcawin,

tzaj samaꞌn jun xjal tuꞌn t-xuꞌjil kꞌmalte te cyjaꞌ:

Miꞌn tzꞌoc tkꞌon tiba tiꞌj ju xjal tzꞌaklxix lu,

porque tuj nwitzicꞌe konicꞌan mayꞌ nim ma tzicꞌx wuꞌne tuꞌn tlaj,

chi t-xuꞌjila,

chi xjal.

20 Atzun ke nejenel cye pal cyucꞌix ke cytijil xjal cub tiꞌj cynabl xjal cyuꞌn tuꞌn t-xi cykanin tuꞌn tetz tzokpiꞌn Barrabás,

atzunte Jesús tuꞌn tcyim.

21 Xitzun tkanin juntl maj gobernador:

—¿Alcye jun cyajbile tuꞌn tex ntzokpiꞌne?

Atzun cye xjal cyma:

—Ate Barrabás tuꞌn tetz ttzokpiꞌna.

22 Xitzun tmaꞌn Pilat cye:

—¿Titzun oc nbinchaꞌye tiꞌj Jesús aju Crist tbi?

Cymatzun cycyakil xjal:

—E tjaw twitz crus.

23 Atzunte Pilat xi tmaꞌn cye:

—¿Alcyetzun jun mya baꞌn ma tbincha?

Pero cye xjal mas e jaw schꞌin:

—E tjaw twitz crus,

che chi.

24 Tejtzun tlonte Pilat mintiꞌ tuꞌn tbant tiꞌj,

nok mas in che jaw tilj xjal,

tzaj tiꞌn Pilat chꞌin aꞌ,

el ttxꞌjoꞌn tkꞌab cywitz cycyakil xjal ex tma:

—Mintiꞌ wile tiꞌj ju xjal tzꞌaklxix lu ka ma cyim.

Cyqueꞌyinxe ti cꞌoquel,

chi Pilat.

25 Xi cytzakꞌweꞌn cycyakil xjal:

—Akekoꞌ at kile cyucꞌix kcꞌwaꞌle ka ma cyim xjal lu.

26 Etztzun tzokpiꞌn Barrabás tuꞌn Pilat;

atzunte Jesús baj asyalin ex xi kꞌoꞌn tuꞌn Pilat tuj cykꞌab soldad tuꞌn tjaw cykꞌoꞌn twitz crus.

27 Xitzun kꞌiꞌn Jesús cyuꞌn t-soldad gobernador,

ocx cyiꞌn tuj cwartel,

baj cytxolban cyib cycyakil soldad tiꞌj.

28 El cyiꞌn t-xbalun Jesús,

oc cykꞌoꞌn jun cyak xbalun tiꞌj,

29 ex baj cybinchaꞌn jun coron chꞌiꞌx,

jax cykꞌoꞌn tuj twiꞌ,

ex xi cykꞌoꞌn jun ajlaj tuj tbankꞌab.

E cubtzun ẍmejeꞌ twitz ex e xmayin tiꞌj:

—In xi kkꞌolbene aya Rey cye xjal judiy,

cucxwit tel tkꞌija,

che chi.

30 Oc cytzuban tuj twitz,

el cyiꞌn ju ajlaj te ex oc cybjuꞌn tiꞌj twiꞌ.

31 Tejtzun cybaj xmayin tiꞌj,

el cyiꞌn ju cyak xbalun tiꞌj,

oc cykꞌoꞌn axju t-xbalun,

ex xi cyiꞌn tuꞌn tjaw cykꞌoꞌn twitz crus.

32 Tejtzun cyetz,

oc noj jun xjal cywitz,

Simón tbi ex aj Sirene,

oc cyjwersin tuꞌn t-xi tikan tcrus Jesús.

33 E pontzun tuj jun lugar Gólgota tbi;

aju yol Gólgota atzun in tmaꞌn:

Jun lugar Tbakil Wibaj.

34 Tej cypon tuj lugar lu,

xi cykꞌoꞌn tcꞌa vinagre smoꞌn tucꞌil taꞌl cꞌul puro cꞌa;

pero tej t-xi tnicꞌbeꞌn Jesús,

mintiꞌ xi tcꞌan.

35 Tej tjaw kꞌoꞌn Jesús twitz crus,

baj cysipan soldad ke t-xbalun cyxolx,

ex e oc ten kꞌil swert cyiꞌj,

alcye tuꞌn t-xi tiꞌn junjun.

[Bant jlu cyuꞌn,

tuꞌntzun tjapun aju kꞌmaꞌmaj tuꞌn t-sanjel Dios chi cyjaꞌ:

Jaw cyiꞌn swert tiꞌj nxbalune ex baj cysipan cyxolx,

chi t-sanjel Dios.]

36 E cubtzun keꞌ in che xkꞌukin tiꞌj Jesús.

37 Cub cytzꞌiban alcye til,

jax cykꞌoꞌn twitz crus tibaj twiꞌ,

in tmaꞌn cyjaꞌ:

Atzun Jesús jlu,

aju Rey cye xjal judiy.

38 Ax icx jaw cykꞌoꞌn cabe elekꞌ twitz crus junx tucꞌil Jesús,

jun tuj tbankꞌab ex jun tuj tnayaj.

39 Atzun cye xjal in che icꞌ twitz crus in che xmayin tiꞌj Jesús,

in xi cyyucun cywiꞌ,

40 ex in cymaꞌn:

—Aya in tmaꞌna tuꞌn tcub t-xituna tja Dios ex tuj ox kꞌij tuꞌn tjaw tbinchaꞌna juntl maj,

clom tiba tuꞌnx tiba.

Ka Tcꞌwaꞌl Diosa,

tcuꞌtza twitz crus,

che chi xjal.

41 Ax icx ke nejenel cye pal,

cyucꞌix ke xnakꞌtzal tiꞌj ley,

cyucꞌix ke parisey ex cyucꞌix ke cytijil xjal,

in che xmayin tiꞌj ex in cymaꞌn:

42 —Ke mastl xjal e clet tuꞌn,

atzun te mintiꞌ in bant tclonte tib;

ka rey jlu cye aj Israel,

baꞌn tuꞌn tcuꞌtz twitz crus jaꞌlo tuꞌntzun kocslan tiꞌj.

43 O keꞌ tcꞌuꞌj tiꞌj Dios;

e tclet tuꞌn Dios jaꞌlo ka axix toc taj Dios tiꞌj;

porque o tma ka Tcꞌwaꞌl Dioste,

che chi xjal.

44 Ax icx ke elekꞌ e oc ten ilil tiꞌj,

akeju e jaw kꞌoꞌn twitz crus junx tucꞌil.

45 Cub kloljxix tcyakil twitz txꞌotxꞌ,

xeꞌt-x te chilcukꞌij,

maxitzun el spicꞌeꞌ te las tres te kale.

46 Chꞌixtok tpon las tres te kale,

jaw tkꞌajkꞌajel twi Jesús cyuwxix ex tma:

—Elí,

Elí,

¿lama sabactani?

Atzun in tmaꞌn ju yol lu:

Nman Dios,

Nman Dios,

¿tikuꞌn ma chin cyaj tcolina?

Chi Jesús.

47 Tej cybinte junjun xjal ax ateꞌtok,

cyma cyxolx:

—Ate jlu in txocon tiꞌj Elías,

che chi.

48 Jurat naj xi kelan jun cye,

tzaj tiꞌn jun esponja ex cuꞌx tmuꞌn tuj vinagre,

ex oc tkꞌoꞌn twiꞌ jun ajlaj,

jax tkꞌoꞌn tuꞌn tel ttzꞌuban Jesús.

49 Atzun cye txkantl cyma:

—E tten nej;

ko queꞌyin tiꞌj ka tzul Elías clol te.

50 Atzunte Jesús jaw tkꞌajkꞌajel twiꞌ juntl maj cyuwxix,

jawtzun baj t-xew.

51 Atzunju xbalun te makbil tcub tuj tmij tja Dios cub sbitꞌj,

cabe piẍ ela,

tzaj sbitꞌj twiꞌ,

cubil t-xeꞌ.

Tzaj luꞌlun txꞌotxꞌ ex ke nmak abj e jeꞌx pax;

52 ex ke pantyón e jaket;

ex nimcu cyximlal ocslal otok che cyim e jaw ankꞌin,

53 e jeꞌtz tuj pantyón,

e ul tuj Jerusalén aju tnam xjan,

ex cub cyyecꞌun cyib cywitz nimcu xjal tjatzlenxi ankꞌin Jesús.

54 Aju capitán cyucꞌix keju ateꞌ tucꞌil in che xkꞌukin tiꞌj Jesús,

tej cylonte cyaknajnab ex tcyakilju o baj,

tzaj nim cyxobil,

ex cyma:

—Axix toc Tcꞌwaꞌl Dios te jlu,

che chi.

55 Nimcu xuꞌj axtok ateꞌ in che queꞌyin najchak,

otok che tzaj lpeꞌ ke xuꞌj lu tiꞌj Jesús tej ttzaj tuj Galiley,

ex otok che ajben te.

56 Cyxol keju xuꞌj lu attok Mariy aj Magdala,

tucꞌix Mariy cytxuꞌ Jacobo ex José,

ex tucꞌix cytxuꞌ tcyꞌajal Zebedey.

57 Tejtzun tkokax,

ul jun xinak kꞌinun,

José tbi ex aj Arimatey,

otok tzꞌoc te t-xnakꞌtzben Jesús.

58 Xiꞌ José tucꞌil Pilat,

xi tkanin t-ximlal Jesús.

Xi tkꞌoꞌn Pilat orden tuꞌn t-xi kꞌoꞌn t-ximlal Jesús te.

59 Xitzun tiꞌn José t-ximlal Jesús,

ocx tbalkꞌiꞌn tuj jun sak xbalun,

60 ocx tkꞌoꞌn tuj jun pantyón acꞌaj,

texte José tpantyón,

otok tzꞌocx tlacuꞌn tuj pic;

tzaj ttolin jun abj ma tij,

oc tkꞌoꞌn ttzi pantyón ex ajtzun.

61 Axtoktzun ateꞌ Mariy aj Magdala,

tucꞌix juntl Mariy,

kꞌukl ke twitz pantyón.

62 Tuj juntl kꞌij baj cychmon cyib ke nejenel cye pal twitz Pilat cyucꞌix ke parisey,

ewtok tbantlen cyten xjal tuꞌn ticꞌset ju kꞌij te ojlabl.

63 Xi cymaꞌn te Pilat:

—Tat,

ma tzul tiꞌj kcꞌuꞌje at jun yol o tma aju sbul lu tej itzꞌxtok:

Oc tel ox kꞌij chin jawil ankꞌine,

chi xjal lu.

64 Cyjaꞌtzun kꞌonxa orden tuꞌn tcyuwset ju pantyón tuj ox kꞌij,

mya yajcu che ul ke t-xnakꞌtzben te konicꞌan,

ex cꞌeletz cyelkꞌaꞌn t-ximlal,

ex cxel cymaꞌn cye xjal:

Ma jaw ankꞌin cyxol cyimni,

che chilo.

Entons mas che bajel sbuꞌn xjal jaꞌlo twitzju nej,

che chi.

65 Xitzun tmaꞌn Pilat cye:

—Lu jun cꞌloj soldad lu tuꞌn cyxiꞌ cyucꞌile;

cyxiꞌye,

ex cycyuwsan oque ttzi pantyón ic tzaꞌnx baꞌn cyuꞌne.

66 E jeꞌxtzun,

baj cycyuwsaꞌn ttzi pantyón,

oc cykꞌoꞌn jun sey tiꞌj abj,

ex e cyaj cykꞌoꞌn ke soldad te xkꞌukil.