Pon kꞌiꞌn Jesús twitz Pilat
15
Tejtzun kskix,
e yolin ke nejenel cye pal tiꞌj alcye tuꞌn tbant cyuꞌn,
cyucꞌix ke cytijil xjal ex ke xnakꞌtzal tiꞌj ley ex cycyakil Aj Sanjelal cye xjal judiy.
Bajtzun cꞌaloꞌn Jesús cyuꞌn,
xi cyiꞌn ex xi cykꞌoꞌn tuj tkꞌab Pilat.
2 Xitzun tkanin Pilat te Jesús:
—¿Apeya ju Rey cye xjal judiy?
Xi ttzakꞌweꞌn Jesús:
—Akine ic tzaꞌn ma tmaya.
Crucifixión y resurrección de Jesús (Marcos 15.1–16.7)
3 Atzun cye nejenel cye pal nimcu til Jesús xi cymaꞌn te Pilat.
4 Xitzun tkanin Pilat juntl maj te Jesús:
—¿Maj mintiꞌ jun tyola?
Binxa nimcu tila in cymaꞌn xjal.
5 Pero te Jesús mi jun yol xi tmaꞌn;
cyjaꞌtzun nim o labin Pilat tiꞌj.
Cub t-sentens Jesús tuꞌn tcyim
6 Tcyakil abkꞌi nneꞌtz ttzokpiꞌn Pilat jun pres tuj ninkꞌij,
nok alcye cyajbil tnam xjal tuꞌn tetz tzokpiꞌn.
7 Ex attok jun xjal Barrabás tbi,
presintok cyucꞌix ke tucꞌil tuꞌn tlaj at xjal otok cub cyuꞌn tej cykꞌojin tiꞌj gobierni.
8 E ultzun nim xjal tucꞌil Pilat kanil te tuꞌn tetz ttzokpiꞌn jun pres ic tzaꞌn in tbinchaꞌn junjun maj.
9 Xitzun tmaꞌn Pilat cye:
—¿Cyajpeye tuꞌn tex ntzokpiꞌne aju Cyreye,
akeye xjal judiy?
Chi Pilat.
10 Porque el tnicꞌ Pilat tiꞌj,
xi kꞌoꞌn Jesús tuj tkꞌab Pilat cyuꞌn ke nejenel cye pal tuꞌnju at tloꞌch cycꞌuꞌj tiꞌj.
11 Atzun cye nejenel cye pal e oc ten ocsal cycꞌuꞌj xjal tuꞌn t-xi cykanin xjal tuꞌn tetz tzokpiꞌn Barrabás,
ex mya ate Jesús tuꞌn tetz tzokpiꞌn.
12 Xi tkanin Pilat juntl maj cye:
—¿Alcyetzun cyajbile tuꞌn nbinchanteye tiꞌj ju xjal lu,
aju in cymaꞌne tiꞌj ka atzun Cyreye?
Chi Pilat.
13 Atzun cye xjal e jaw schꞌin juntl maj:
—E tjaw twitz crus,
che chi.
14 Atzunte Pilat xi tmaꞌntl cye:
—¿Alcyetzun mya baꞌn ma tbincha?
Atzun cye xjal mas e jaw schꞌin:
—E tjaw twitz crus,
che chi.
15 Etztzun tzokpiꞌn Barrabás tuꞌn Pilat tuꞌntzun tkeꞌ cycꞌuꞌj xjal,
atzunte Jesús baj asyalin,
ex xi tkꞌoꞌn tuj cykꞌab soldad tuꞌn tjaw cykꞌoꞌn twitz crus.
16 Atzun cye soldad xi kꞌiꞌn Jesús cyuꞌn tuja,
ocx cyiꞌn tuj cwartel,
ex tzaj cytxcoꞌn mastl soldad.
17 Ex oc cykꞌoꞌn jun t-xbalun Jesús ẍjulin queꞌyin,
ex baj cybinchaꞌn jun coron chꞌiꞌx,
ex jax cykꞌoꞌn tuj twiꞌ.
18 E octzun ten kꞌolbelte:
—Cuchiwt cucx tel tkꞌija,
aya Rey cye xjal judiy,
che chi.
19 Ex oc cybjuꞌn tiꞌj twiꞌ tuꞌn ajlaj,
ex xi cytzuban tiꞌj,
ex e cub ẍmejeꞌ cꞌulul twitz.
20 Cybajlenxitzun tzeꞌn tiꞌj,
el cyiꞌn ju xbalun ẍjulin queꞌyin toc tiꞌj,
ex oc cykꞌoꞌn aju tex t-xbalun,
etztzun cyiꞌn tuꞌn tjaw cykꞌoꞌn twitz crus.
Jaw kꞌoꞌn Jesús twitz crus
21 Ex nnicꞌcu jun xjal tzajni tuj cojbil,
Simón tbi xjal ex aj Sirene,
atzun tman Alejandro tucꞌix Rufo,
tzyettzun Simón cyuꞌn ex oc cykꞌoꞌn jwers tiꞌj tuꞌn t-xi tiꞌn tcrus Jesús.
22 Xitzun kꞌiꞌn Jesús cyuꞌn tuj jun lugar Gólgota tbi,
atzun in tmaꞌn ju yol lu:
Jun lugar Tbakil wibaj.
23 Ex xi cykꞌoꞌn tcꞌa vin t-sem tib tucꞌil taꞌl tzeꞌ mirra tbi;
atzunte Jesús mintiꞌ xi tcꞌaꞌn.
24 Jawtzun kꞌoꞌn Jesús twitz crus cyuꞌn soldad,
baj cysipan t-xbalun cyxolx ex e oc ten kꞌil swert tiꞌj tuꞌn tel cynicꞌ tiꞌj alcye te junjun tuꞌn t-xi tiꞌn.
25 Las nueve te prim tej tjaw kꞌoꞌn Jesús twitz crus.
26 Aju tbi tcaws tzꞌibantok jax cykꞌoꞌn twitz crus in tmaꞌn:
Aju Rey cye xjal judiy.
27 Ax icx e jaw kꞌoꞌn cabe elekꞌ twitz crus tucꞌil Jesús,
jun tuj tbankꞌab ex jun tuj tnayaj.
28 [Ex japun aju tzꞌiban tuj Tuꞌjil in tmaꞌn:
Oc te tajlal cyxol ke mya baꞌn.]
29 Ex keju in che icꞌ twitz crus,
in che xmayin tiꞌj Jesús,
in xi cyyucun cywiꞌ ex in cymaꞌn:
—Bay atzun taja,
aya o tmaya tuꞌn tcub t-xituna tja Dios ex tuj ox kꞌij tuꞌn tjaw tbinchaꞌna juntl maj.
30 Clom tiba,
ex tcuꞌtza twitz crus,
che chi.
31 Ax icx ke nejenel cye pal e xmayin tiꞌj cyucꞌix ke xnakꞌtzal tiꞌj ley,
in cymaꞌn cyxolx:
—Ke mastl xjal e clet tuꞌn,
atzunte mintiꞌ in bant tuꞌn tclonte tib.
32 Ka a Crist jlu,
aju Rey cye aj Israel,
e tcuꞌtz twitz crus jaꞌlo tuꞌntzun klonte ex tuꞌn kocslan tiꞌj,
che chi.
Ax icx keju otok che jaw kꞌoꞌn twitz crus ttxlaj Jesús e ilin tiꞌj.
Tej tcyim Jesús
33 Tejtzun tpon chilcukꞌij,
oc kloljxix tcyakil twitz txꞌotxꞌ,
texi las tres te kale el spicꞌeꞌ.
34 Tejtzun tpon las tres te kale,
jaw tkꞌajkꞌajel twiꞌ Jesús cyuwxix:
—Eloi,
Eloi,
¿lama sabactani?
chi Jesús;
atzun in tmaꞌn ju yol lu:
Nman Dios,
Nman Dios,
¿tikuꞌn ma chin cyaj tcolina?
35 Ex at junjun xjal ax waꞌl keꞌtok,
tej cybinte tyol Jesús,
cyma:
—Cybinxe in txocon tiꞌj Elías aju t-sanjel Dios.
36 Entons xi kelan jun,
cuꞌx tmuꞌn jun esponja tuj vinagre ex oc tkꞌoꞌn twiꞌ jun ajlaj,
ex jax tkꞌoꞌn tuꞌn tel ttzꞌuban Jesús.
—E tten nej,
chi xjal,
jacu kil ka ma tzul Elías tuꞌn tcuꞌtz kꞌiꞌn tuꞌn.
37 Atzunte Jesús jaw tkꞌajkꞌajel twiꞌ cyuwxix,
ex cyimtzun.
38 Atzunju xbalun tcub te makbil tuj tmij tja Dios cub sbitꞌj tuj tmijil,
tzajx twiꞌ,
cubil t-xeꞌ.
39 Atzunte capitán aju waꞌltok twitz Jesús,
tej tlonte tzaꞌn tten jaw schꞌin Jesús ex tzaꞌn tten cyim,
tma capitán:
—Axix toc ate xjal lu Tcꞌwaꞌl Dios.
40 Ax icx at junjun xuꞌj in che queꞌyin najchak,
tucꞌix Mariy aj Magdala at cyxol,
tucꞌix Mariy ttxuꞌ Jacobo chꞌin ex ttxuꞌ José,
ex tucꞌix Salomé at cyxol.
41 Tej tten Jesús tuj Galiley e ten ke xuꞌj lu tucꞌil ex in che ajben te;
ex nimcu txkantl xuꞌj in che queꞌyin,
otok che jaꞌwil junx tucꞌil Jesús tuj Jerusalén.
Tej tcuꞌx makuꞌn Jesús
42 Chꞌixtok toc kax,
atzun kꞌij tuꞌn tbant cyten xjal,
porque chꞌixtok t-xeꞌt kꞌij te ojlabl,
43 ultzun José aj Arimatey,
ajun cyxol Aj Sanjelal cye xjal judiy ex nim toclen.
In ayontok José tiꞌj tkꞌijlalil tuꞌn tcawin Dios;
ocx tucꞌil Pilat mintiꞌ o xob,
xi tkanin t-ximlal Jesús.
44 Ex jaw labin Pilat tiꞌj ka otok cyim Jesús;
tzajtzun ttxcoꞌn Pilat aju capitán,
xi tkanin te ka otok cyim Jesús.
45 Tejtzun tbinte tuꞌn capitán ka otok cyim,
xi tmaꞌn tuꞌn t-xi tiꞌn José t-ximlal Jesús.
46 Lakꞌettzun jun sak xbalun tbanilxix tuꞌn José,
cuꞌtz tiꞌn t-ximlal Jesús,
ocx tbalkꞌiꞌn tuj sak xbalun,
ex ocx tkꞌoꞌn tuj jun pantyón lacumaj tuj pic,
ex tzaj ttolin jun abj,
oc tkꞌoꞌn ttzi pantyón.
47 In che queꞌyin Mariy aj Magdala tucꞌix Mariy ttxuꞌ José,
ex o cyil jatum ocx kꞌoꞌn t-ximlal Jesús.