Jatz ankꞌin Jesús cyxol cyimni
16
Tbajlenxitzun ju kꞌij te ojlabl,
xiꞌ Mariy aj Magdala,
tucꞌix Mariy ttxuꞌ Jacobo,
tucꞌix Salomé;
e jeꞌx lakꞌolte tcꞌocꞌjal t-sem tib tuꞌn cyxiꞌ kꞌolte tiꞌj t-ximlal Jesús.
2 Primxix cyxiꞌ tuj tnejel kꞌij te seman,
e pon ttzi pantyón otok jawil kꞌij.
3 Ex in cymaꞌn cyxolx:
—¿Alcye cꞌelel kꞌinte ju abj ttzi pantyón tuꞌn kocx?
Che chi.
4 Pero tej cylonte,
o cyil otok tzꞌel kꞌiꞌn ju abj ttzi pantyón,
ex aju abj lu maꞌxix.
5 Tejtzun cyocx tuj pantyón,
o cyil kꞌukl jun cuꞌxun tuj bankꞌabaj,
toc jun t-ẍjoꞌw sak;
ex biꞌx e jaw secꞌpaj xuꞌj.
6 Atzunte cuꞌxun xi tmaꞌn cye:
—Miꞌn che jaw secꞌpaje;
in che jyone tiꞌj Jesús aj Nazaret,
aju jaw kꞌoꞌn twitz crus.
Mi aꞌl tzalu,
ma jaw ankꞌin.
Cyqueꞌyintze jatum cub kꞌoꞌn.
7 Pero cyxiꞌye,
cymanxe cye t-xnakꞌtzben ex te Pedro,
cxel nej Jesús cywitze tuj Galiley;
atzun cꞌoquel cyqueꞌyine ic tzaꞌn xi tmaꞌn cyeye.
8 Atzun cye xuꞌj biꞌx e jeꞌtz ok tuj pantyón,
porque otok che tzaj luꞌlun tuꞌn tchi ex otok che secꞌpaj.
Mi jun yol xi cymaꞌn cye xjal,
porque in che xobtok.
Cub tyecꞌun tib Jesús twitz Mariy aj Magdala
[
9 Tejtzun tjaw ankꞌin Jesús primxix tuj tnejel kꞌij te seman,
tnejelxix cub tyecꞌun tib twitz Mariy aj Magdala,
aju otok che etz wuk juꞌẍ tuj tanmi tuꞌn Jesús.
10 Xiꞌtzun Mariy,
xi tmaꞌn cye keju otok che ten tucꞌil Jesús,
in che bisuntok ex in che okꞌ.
11 Tejtzun cybinte ke jlu ka otok jaw ankꞌin Jesús ex ka otok til Mariy,
mintiꞌ xi cyocslaꞌn tyol.
Cub tyecꞌun tib Jesús cywitz cabe t-xnakꞌtzben
12 Pero te yajxi chꞌintl cub tyecꞌun tib Jesús tuj juntl tumel cywitz cabe t-xnakꞌtzben in che bettok,
cyjaꞌ cyxiꞌ tuj cojbil.
13 E jeꞌxtzun ke jlu,
xi cymaꞌn cye txkantl;
icx mintiꞌ xi cybiꞌn cyyol.
Xi tmaꞌn Jesús cye apostl tuꞌn cyxiꞌ pacbal
14 Te mancbilxitzun,
cub tyecꞌun tib Jesús ax cywitz keju junlaj t-xnakꞌtzben in che waꞌntok tiꞌj mes;
e baj ilin tuꞌn Jesús tuꞌnju mintiꞌ xi cyocslaꞌn ex tuꞌnju cyuwix cyanmi,
ex tuꞌnju mintiꞌ xi cyocslaꞌn cyyol keju o queꞌyin te,
ka otok jatz ankꞌin Jesús.
15 Xi tmaꞌn Jesús cye:
—Cyxiꞌye tuj tcyakil twitz txꞌotxꞌ,
cypacbanxe tkanil colbil cye cycyakil xjal.
16 Alcye ma tzꞌocslan ex ma byan,
oc cletel;
atzun teju mintiꞌ ma tzꞌocslan,
cbel t-sentens.
17 Ex akeju che ocslal,
che bantel ke señ lu cyuꞌn:
Cꞌajbel nbiye cyuꞌn tuꞌn cyetz ke juꞌẍ tuj cyanmi xjal;
ex oc che yolil tuj junxitl yol;
18 ka ma jaw cytzyuꞌn ke lobaj,
ex ka ma txi cycꞌaꞌn jun venen,
mintiꞌ cbajel cyiꞌj;
cbel cykꞌoꞌn cykꞌab cyibaj yab,
ex che banixel ke yab cyuꞌn.
Xi kꞌiꞌn Jesús tuj cyaꞌj