Jatz ankꞌin Jesús cyxol cyimni
20
Tuj tnejel kꞌij te seman xiꞌ Mariy aj Magdala ttzi pantyón primxix wen atxtok kwitz;
ex o til otok tzꞌel kꞌiꞌn abj ttzi pantyón.
2 Ajtztzun kelan ex ul tucꞌil Simón Pedro ex tucꞌil juntl xnakꞌtzben aju cꞌujlaꞌnxix tuꞌn Jesús,
ex xi tmaꞌn cye:
—Ma tzꞌetz kꞌiꞌn t-ximlal Kajaw tuj pantyón,
ex mintiꞌ baꞌn kuꞌne jatum ma pon kꞌoꞌn,
chi Mariy.
3 Extzun Pedro tucꞌix juntl xnakꞌtzben,
e jeꞌx ttzi pantyón.
4 E jeꞌx kelan junx cycabil;
atzun juntl xnakꞌtzben mas cyuw ojkelan twitz Pedro,
ex nej o canun ttzi pantyón.
5 Cub mocꞌeꞌ tuꞌn tocx tqueꞌyin,
ex o til ke xbalun ax cycubsaꞌn,
pero mintiꞌ ocx tuj pantyón.
6 Ex lepchix t-xiꞌ Simón Pedro tiꞌj,
ex ocx tuj pantyón,
ex o til ke xbalun ax cycubsaꞌn,
7 tucꞌix ju cꞌalbil aju ajben cꞌalbil twiꞌ Jesús,
mya junx tcub cyucꞌil ke xbalun,
balkꞌiꞌntok tten ex part tcub.
8 Ax icx ocx juntl xnakꞌtzben aju pon nej ttzi pantyón;
o til ex xi tocslaꞌn.
9 Porque naꞌnxtok tel cynicꞌ tiꞌj ju tzꞌibamaj tuj Tuꞌjil ka ilxix tiꞌj tuꞌn tjatz ankꞌin Jesús cyxol cyimni.
10 E ajtztzun meltzꞌaj ke xnakꞌtzben ex e ul tuj cyja.
Cub tyecꞌun tib Jesús twitz Mariy aj Magdala
11 Atzunte Mariy waꞌltok twitz pantyón in okꞌ;
ex cucxtok tokꞌ cub mocꞌeꞌ tuꞌn tocx tqueꞌyin tuj pantyón.
12 Ex o til cab anjel toc cyxbalun sak,
kꞌukl ke jatum cub ten t-ximlal Jesús,
kꞌukltok jun jatum cub ten twiꞌ Jesús,
ex juntl jatum cub ten tkan.
13 Xitzun cymaꞌn anjel te Mariy:
—¿Tikuꞌn in okꞌa,
nan?
Xi tmaꞌn Mariy cye:
—In chin okꞌe porque ma tzicꞌ kꞌiꞌn t-ximlal Wajawe,
ex mintiꞌ baꞌn wuꞌne jatum ma pon kꞌoꞌn.
14 Tej t-xi tmaꞌn Mariy jlu,
ajtz meltzꞌaj twitz,
ex o til waꞌltok Jesús,
pero mintiꞌ el tnicꞌ tiꞌj ka ate Jesús.
15 Xitzun tmaꞌn Jesús te:
—¿Tikuꞌn in okꞌa,
nan?
¿Alcye in jyona tiꞌj?
Atzunte Mariy,
tuj tnabl ka ateju cwentil awal,
xitzun tmaꞌn te:
—Tat,
ka aya ma txi kꞌinte t-ximlal Jesús,
kꞌmantza jatum ma pon tkꞌoꞌna tuꞌntzun t-xi wiꞌne.
16 Xitzun tmaꞌn Jesús te:
—Mariy.
Ajtztzun meltzꞌaj twitz Mariy,
ex xi tmaꞌn te tuj yol ebrey:
Raboni.
(Atzun in tmaꞌn ju yol lu:
Xnakꞌtzal).
17 Xi tmaꞌn Jesús te:
—Miꞌn chin cub ttzyuꞌna porque naꞌnx njaxe tucꞌil Nmane;
txiꞌya cyucꞌil wermaniye,
ex kꞌmanxa cye,
chin jawixe tucꞌil Nmane ex Cymane,
tucꞌil Ndiose ex Cydiose,
chi Jesús te.
18 Xiꞌtzun Mariy aj Magdala kꞌmalte tkanil cye xnakꞌtzben,
ka otok ilwaj Kajaw tuꞌn ex ka ax Kajaw tzaj kꞌmante ju yol lu.
Cub tyecꞌun tib Jesús cywitz ke t-xnakꞌtzben
19 Ax kꞌij otok tzꞌoc kax,
aju tnejel kꞌij te seman,
oc cybuyin cyib ke xnakꞌtzben,
ex etz cylamoꞌn ke pwert jatum ateꞌtok tuꞌn tlaj in che xobtok cywitz xjal judiy;
ul Jesús cyucꞌil,
cub weꞌ cyxol,
ex xi tmaꞌn cye:
—Keꞌ cycꞌuꞌje.
Jesús se aparece a los discípulos (Juan 20.19-31)
20 Tejtzun t-xi tmaꞌn jlu cye,
xi tyecꞌun ke tkꞌab cye ex ju ttxlaj t-xuꞌc.
Atzun ke xnakꞌtzben e tzalaj tej cylonte Kajaw.
21 Xitzun tmaꞌn Jesús cye juntl maj:
—Keꞌ cycꞌuꞌje.
Ic tzaꞌn ma chin tzaj samaꞌne tuꞌn Nmane,
ax icxtzun cyeye che xeꞌl nsamaꞌne.
22 Tejtzun tbaj tmaꞌn jlu,
xi t-xupin cyiꞌj,
ex xi tmaꞌn cye:
—Cycꞌmonxe aju Xewbaj Xjan.
23 Alcye jun xjal ma cub cynajsaꞌne til,
cnajsetel til;
ex alcye jun xjal mintiꞌ ma cub cynajsaꞌne til,
atx til.
O til Tomás otok jatz ankꞌin Jesús
24 Atzunte Tomás,
aju yoꞌẍ tbi cyuꞌn xjal,
jun cyxol keju cablaj t-xnakꞌtzben Jesús,
mi aꞌltok cyucꞌil mastl xnakꞌtzben tej tul Jesús.
25 Xitzun cymaꞌn ke mastl xnakꞌtzben te Tomás:
—Ma kile Kajaw.
Xitzun tmaꞌn Tomás cye:
—Ka mintiꞌ ma wile tocxlen clav tuj tkꞌab,
ex ka mintiꞌ ma tzꞌocx nkꞌoꞌne tal nkꞌabe tuj tocxlen clav,
ex ka mintiꞌ ma tzꞌoc nmacoꞌne tocxlen lans ttxlaj t-xuꞌc,
mlay txi wocslaꞌne,
chi Tomás.
26 Tbajlenxitzun wajxak kꞌij,
ateꞌtok juntl maj ke t-xnakꞌtzben Jesús tuja,
ex tucꞌix Tomás attok cyucꞌil.
Masque lamoꞌn ke pwert,
pero pon Jesús cyucꞌil,
cub weꞌ cyxol,
ex xi tmaꞌn cye:
—Keꞌ cycꞌuꞌje.
27 Ex xi tmaꞌn Jesús te Tomás:
—Kꞌoꞌnctz tal tkꞌaba tzalu,
ex queꞌyin oca ke nkꞌabe;
ex kꞌontz tkꞌaba,
macoꞌnca jatum tocxlen lans ttxlaj nxuꞌque.
Miꞌn tzꞌoca mya ocslal,
nok oꞌcx tuꞌn toca ocslal,
chi Jesús.
28 Xitzun ttzakꞌweꞌn Tomás:
—Aya Wajawe ex aya Ndiose.
29 Xitzun tmaꞌn Jesús te:
—Nok tuꞌnju ma chin tila,
Tomás,
ma txi tocslaꞌna;
at tzalajbil cye keju ma cyocsla masque mintiꞌ ma cyil,
chi Jesús.
Tikuꞌn o tzꞌibanjtz ju uꞌj lu