Jatz ankꞌin Jesús cyxol cyimni
28
Tbajlenxitzun ju kꞌij te ojlabl,
chꞌixtok kskix tuj tnejel kꞌij te seman,
e ul Mariy aj Magdala tucꞌix juntl Mariy queꞌyilte pantyón.
2 Ex tzaj jun cyaknajnab nimxix;
porque cuꞌtz jun t-anjel Kman tuj cyaꞌj;
tej tcubil el tiꞌn ju abj ttzi pantyón ex cub keꞌ tibaj.
3 Ic queꞌyin twitz ic tzaꞌn tkan kꞌancyok,
atzunju t-xbalun sak queꞌyin ic tzaꞌn ttxa cheꞌw.
4 Atzun ke soldad in che xkꞌukin e jaw luꞌlun tuꞌn tchi anjel,
mer ic tzaꞌn cyimni e oc.
5 Atzunte anjel xi tmaꞌn cye xuꞌj:
—Miꞌn che xobe,
porque baꞌn wuꞌne in che jyone tiꞌj Jesús aju jaw kꞌoꞌn twitz crus.
6 Mi aꞌl tzalu,
ma jaw ankꞌin ic tzaꞌn o tma.
Cytzaje,
cyqueꞌyinxe jatum cub kꞌoꞌn t-ximlal.
7 Cyxiꞌ naje,
cymanxe cye t-xnakꞌtzben cyjaꞌ:
Ma jatz ankꞌin cyxol cyimni,
ex lu cxel nej cywitze tuꞌn cypone tuj Galiley;
atzun cꞌoquel cyqueꞌyine,
che chicuye cye t-xnakꞌtzben.
Lu ma txi nmaꞌne cyeye,
chi anjel cye xuꞌj.
8 Atzun cye xuꞌj e ajtz ttzi pantyón in che xob ex nim in che tzalaj;
e jeꞌx naj kꞌol tkanil cye t-xnakꞌtzben Jesús,
in che ojkelan wen.
9 Ex matok cyjaꞌ cyxiꞌ,
lu Jesús oc noj cywitz,
e jeꞌx tkꞌolbeꞌn.
Atzun cye xuꞌj e pon lakꞌeꞌ ttxlaj,
tzaj cychleꞌn tkan,
ex e cꞌulun twitz.
10 Xitzun tmaꞌn Jesús cye:
—Miꞌn che xobe;
cyxiꞌye,
cykꞌonxe tkanil cye wermaniye tuꞌn cyxiꞌ tuj Galiley,
ex atzun chin oquel queꞌyine cyuꞌn.
Aju xi cytxꞌolbaꞌn ke soldad
11 Matok cyjaꞌ cyxiꞌ ke xuꞌj,
at junjun cye xkꞌukil e jeꞌx tuj tnam ex xi cykꞌoꞌn tkanil cye nejenel cye pal tiꞌj tcyakilju otok baj.
12 Bajtzun cychmon cyib ke nejenel cye pal cyucꞌix ke cytijil xjal,
e yolin tiꞌj cyxolx,
xi cykꞌoꞌn nim pwak cye soldad,
13 ex xi cymaꞌn cye:
—Cymanxe cye xjal:
E ul ke t-xnakꞌtzben te konicꞌan ex etz cyelkꞌaꞌn t-ximlal matok in ko tane,
che chicuye.
14 Katzun ma tbi gobernador jlu,
cbantel tiꞌj kuꞌne tucꞌil tuꞌntzun cycolpaje,
che chi ke nejenel cye pal.
15 Xitzun cyiꞌn soldad pwak ex cybincha ic tzaꞌnx tzaj kꞌmaꞌn cye.
Aju yol lu ma tzꞌel tkanil cyxol xjal judiy,
ex ax yol in cymaꞌn jaꞌlo.
Aju cyakꞌun apostl cyaj tkꞌoꞌn Jesús
16 Atzun cye junlaj xnakꞌtzben e pon tuj Galiley twi witz jatum otok txi tmaꞌn Jesús cye.
17 Tejtzun tilwaj Jesús cyuꞌn,
e cꞌulun twitz;
pero at junjun jawjeꞌ cycꞌuꞌj.
18 Pontzun lakꞌeꞌ Jesús cytxlaj ex tma:
—Ma tzaj kꞌoꞌn woclene tiꞌj tcyakilju at tuj cyaꞌj ex twitz txꞌotxꞌ.
19 Cyjaꞌtzun cyxiꞌye,
cymanxe cye xjal tuꞌn cyoc te nxnakꞌtzbene cyuj cycyakil nasyon,
ex tuꞌn cybyan cyuꞌne tuj tbi Dios Mambaj,
ex tuj nbiye akine Cꞌwaꞌlbaj,
ex tuj tbi Xewbaj Xjan;
20 cykꞌonxe xnakꞌtzbil cye tuꞌn tjapun cyuꞌn tcyakilju ma txi nmaꞌne cyeye.
Ex lu kine chin tele cyucꞌile tcyakil kꞌij acutzun in japun baj mancbil tkꞌijlalil.
Icxwitju.